Read Khoekhoegowab 2 Kroniks 1 Bible Online

2 Kroniks 1 - Khoekhoegowab bible

2 Kroniks 1

¹Tsî Salomob, Davib ôab ge gaosis âb ǃnâ ge ǀgaiǀgaihe, ǃKhūb ǁîb di Elob ge ǁîb ǀkha hâ i, tsî ǁîbab ge kaise kaikai amaga.

²Tsî Salomob ge Israeli hoab tsî ǀoadisigu tsî kaidisigu di ǂamsagu tsî ǂhanuǂhanu-aogu ǃoa tsî Israeli ǃnâ hâ gaosagu hoagu ǁgûgu di danagu ǃoa ge ǃhoa.

³Tsîb ge Salomob tsî ǀhaohâb hoaba ǁîb ǀkha ge ǃgû ǁnā ǀgapib, Gibeons tawa hâb ǃoa: ǁNāpas ǀhûs di tentoms Elob dis, Moseb, Elob di ǃgāb ge ǃgaroǃhūb ǃnâ kurusa ge hâ i xui-ao.

⁴Xawe ǂgaes Elob disab ge Daviba Kirjat-Jearimsa xu ge ūǃgû ǁnā ǃkhais, Davib ge ǁîsa ǂhomibas ǃoa; tentomsab ge ǁîsa Jerusalems tawa ge ǂnaumâiba xui-ao.

⁵ǁKhātib ge ǂai-altars, Besaleeli, Uri ôab, Huri ôab ge kurusa ǁnāpa ǃKhūb di tabernakeli aiǃâ ge hâ i, tsî Salomob tsî ǀhaohâb tsîn ge ǁîsa ge sari.

⁶Tsî Salomob ge ǁnāpa ǃKhūb di ais aiǃâ ǂai-altars tentoms ǀhûs dis tawa hâs aiǃâ ge ǁguiba; tsîb ge ǁîs ai ǀguiǀoadisi khauǁguibade ge ǁguiba.

⁷ǁNā tsuxub ǁkhāb ǃnâb ge Eloba Salomob tawa ǂhai tsî ǁîb ǃoa ge mî: ǂGan re, tare-e ta nî mā tsi ǃkhaisa.

⁸Ob ge Salomoba Elob ǃoa ge mî: Sats ge ti îb Daviba kai ǀkhomxaǂgaosiba ge dī-ū; tsî sats ge tita ge gao-aodī ǁîb di ǃās ǃnâ.

⁹Tsî nēsi, ǃKhū Elotse, as ama re sa mîs, ti îb Davibats ge ǃhoa-ūsa, sats ge tita ge gao-aodī ǁae-i, ǃhūbaib di tsarab a kai khami a ǂgui-i ǂama.

¹⁰ǁNâi gā-aisib tsî ǂans tsîra mā te re, î ta nē ǁaes aiǃâ ǂoa tsî ǂgâ ǁkhā; tari-e a ǁkhā nē kai ǁaes âtsa ǂhanuǂhanusa?

¹¹ǃNubaib ge Eloba Salomob ǃoa ge mî: Nē ǃkhais go ǂgaob âts ǃnâ hâ i amaga, tsî ǃkhūsib kas, xūn kas, ǃgôasib kas, sa ǁkhansaben di ǀoms kas, tsî ǂgui ûitsēdi kas hoasats ǂgaobasen tama tsî gā-aisib tsî ǂans tsîrats go ǂgaobasen amaga ta go ti ǁaes ǂama gao-aodī tsi, sats nî ǂhanuǂhanuse,

¹²ǁnā-amagats ge gā-aisib tsî ǂans tsîra go māhe. Tsî ǁîra tawa ta ge tita ǃkhūsib tsî xūn tsî ǃgôasib tsîna nîra mā tsi, gao-aogu sa aiǃâ ge hâ igu xaregu tsî sa khaoǃgâ nî hāgu xaregu ge ǁnāti īna ge ūhâ tama hâ i tsî ǁkhāti ūhâ tide.

¹³Nētib ge Salomoba Jerusalems tawa ge sī, ǁnā ǀgapib, Gibeons tawa hâba xu, tentoms ǀhûs disa xu, tsîb ge Israeli ǂama ge gaosîsen.

¹⁴Salomob ge kunidi tsî ǃgapi-aogu tsîna ge ǀhaoǀhao, ǀguiǀoadisi tsî hakakaidisi kunidi tsî disiǀgamǀaǀoadisi ǃgapi-aogu tsînab ge ūhâ is kōse, tsîb ge ǁîna kuniǃādi ǃnâ ge mâi tsî gao-aob tawa Jerusalems ǃnâ.

¹⁵Tsî gao-aob ge ǀhaiǀurib tsî ǃhuniǀurib tsîkha Jerusalems ǃnâ ǀui-i axase ge dī, tsî sederhaideb ge ǀgopehaidi axase ge dī ǃgoab ǃnâ ǀoasase hâde.

¹⁶Tsî hānab ge Salomoba Egipteb tsî Kueb tsîkha xu gere ūhābahe; gao-aob di ǁama-aogu ge ǁîga Kueb tawa sī gere ǁama.

¹⁷Tsî gu ge ge ūǃgû tsî Egipteba xu kuni-e ge ūǀkhī ǃnanikaidisi ǀhaiǀurin ama tsî hā-e ǃnanikaidisi tsî korodisin ama; tsî ǁnātin ge Hetiǁîn di gao-aogu hoagu tsî Siriab di gao-aogu tsîga ge ūǀkhība.

¹⁸Tsî Salomob ge ge ǂâibasen hâ i, ǃKhūb di ǀonsab nî omma ǂnubiba ǃkhaisa tsî ǀnî omma gaosis âba.