Read Khoekhoegowab 2 Kroniks 10 Bible Online

2 Kroniks 10 - Khoekhoegowab bible

2 Kroniks 10

¹Tsî Rehabeammi ge Sexems ǃoa ge ǃgû, Israeli hoab ge Sexems tawa sī xui-ao, ǁîban nî gao-aodīse.

²Tsî i ge ge ī, Jerobeammi, Nebati ôab ge ǁnāsa ǁnâuo, Egipteb ǃnâb hâ hîa, gao-aob Salomob di ais aiǃâba xub ge ǁhâ hâ i xui-ao, ob ge Jerobeamma Egipteba xu ge oa.

³On ge sî tsî ge ǂgai kai bi; tsîn ge Jerobeammi tsî Israeli di ǀhaohâb hoaba hā tsî Rehabeammi ǃoa ge mî:

⁴Sa îb ge ǃnaoba ge ǃgomǃgomba da; xawe satsa ǁnâi sa îb di ǃgom ǃoabas tsî ǁîb di ǃgom ǃnaob, sidab ge ǁgui-aiba supusupuba da, o da ge nî ǃoaba tsi.

⁵Ob ge ǁîba ǁîn ǃoa ge mî: ǃNona tsēdi khaoǃgâ ǁkhawa hā tita ǁga. Os ge ǁaesa ge ǃgû.

⁶Tsî gao-aob Rehabeammi ge ǁnā kaigu, ǁîb îb Salomob di ais aiǃâ ganupeb a ûitsamab hîa ge mâgu ǀkha ǀapeǀhao-e dī tsî ge mî: Mati go sago ra ǀapemā ǁaes nî ǃereamhesa?

⁷O gu ge ǁîb ǃoa ge mî: Nē ǁaesats ga ǀkhom tsî khoexaǃnâbao tsî ǃgâi mîde ǁîna ǃhoa-ūo, on ge hoaǁae sa ǃgāse nî ī.

⁸Xaweb ge ǁîba kaigu di ǀapes, ǁîgu ge ǀapemā bisa ǁnāxū tsî ǂkhamkhoegu, ǁîb ǀkha ge kaigu, ais âb aiǃâ mâgu ǀkha ǀapeǀhao-e ge dī.

⁹Tsîb ge ǁîgu ǃoa ge mî: Tare-e go sago ra ǀapemā, nē ǁaes, tita ǃoa ge ǃhoasa ge nî ǃereamse: ǁNā ǃnaob, sa îb ge sida ǁgui-aiba supusupuba da, ti ge mîsa?

¹⁰O gu ge ǂkham khoegu ǁîb ǀkha ge kaiga ǁîb ǃoa ge mî: Nētits ge ǁnā ǁaes, sa ǁga ge ǃhoa tsî: Sa îb ge sida di ǃnaoba ge ǃgomǃgomba da, îts ǁnâi satsa ǁîba supusupuba da, ti a mîs ǃoa nî mî: Ti ǂkharigeǂeneb ge ti îb di kamanab ǃgâ-ai nîra ǁau.

¹¹Tsî nēsi ti îb ga ǃgom ǃnao-e sado ǃnao-ai hâo io, o ta ge tita ganupe sadu di ǃnaoba ǃnāsase nî dīǀaro; ti îb ga sado ǃnabagu ǀkha ǂnau hâo, o ta ge tita ǀhūn ǀkha sado nîra ǂnau.

¹²Nētin ge Jerobeammi tsî ǁaes hoasa ǃnonaǁî tsēs ai Rehabeammi tawa ge hā, gao-aob ge ǃhoa tsî: ǃNonaǁî tsēs ai ǁkhawa hā tita ǁga, ti mî khami.

¹³Ob ge gao-aoba karosase ǁîna ge ǃeream, gao-aob Rehabeammi ge kaigu di ǀapemāsa ǁnāxū xui-ao.

¹⁴Tsîb ge ǁîn ǀkha ǂkhamkhoegu di ǀapemās ǃoa ǃhoa tsî ge mî: Ti îb ge sadu di ǃnaoba ge ǃgomǃgom, xawe ta ge tita ǁnās ǃgâ-ai nî dīǀaro. Ti îb ge sado ǃnabagu ǀkha gere ǀham, xawe ta ge tita ǀhūn ǀkha nîra ǂnau du.

¹⁵Nētib ge gao-aoba ǁaesa ǁnâu ǂgao tama ge i; nē ǃnaeǃkhais ge Eloba xu hâ i xui-ao, ǃKhūb nî mîs âba ǁapoǁapose, Ahiab, Silonǁîb di ǃoabasa xub Jerobeammi, Nebati ôab ǁga ge ǃhoasa.

¹⁶Tsî Israeli hoab ge mûo, gao-aob ǁîna ǁnâu ǂgao tama hâ ǃkhaisa, os ge ǁaesa gao-aoba ǃeream tsî ge mî: Mâ amǃnâ-e da ūhâ Davib tawa? Hî-î, ǀumi-i xare-e da ge Isaib ôab tawa ūhâ tama hâ, xuige mâ-i hoa-i ǁî-i di tentoms ǃoa, Israeltse! Îts ǁnâi mûbasen sa omma, Davitse! Nētib ge Israeli hoaba ǁîb tentomdi ǃoa ge ǁaru.

¹⁷Xawe ǁnā Israeli ôan, Judab di ǃādi ǃnâ ǁan hân ǂamab ge Rehabeamma ǁkhāti ge gao.

¹⁸ǃNubaib ge gao-aob Rehabeamma Hadorammi, ǁgarisîsenni ǂama hâba ge sî, on ge Israeli ôana ǁîba ge ǀuiǁhom, ǁōb ges kōse. Xawe gao-aob Rehabeammi ge ǃhae tsî kunis ai ge ǃapa, Jerusalems ǃoab nî ǃhūse.

¹⁹Nētin ge Israelǁîna Davib omma xu ge ǁnāǁgôa nētsēs kōse.