Read Khoekhoegowab 2 Kroniks 11 Bible Online

2 Kroniks 11 - Khoekhoegowab bible

2 Kroniks 11

¹Tsî Rehabeammi ge Jerusalems tawa sīo, ob ge Judab tsî Benjaminni tsîkha diga ge ǀhaoǀhao, ǀguikaidisiǁkhaisadisiǀoadisi ǃkhōǂuihesagu, toroba a ǁkhābaga, Israela ǃkhamū tsîb nî gaosisa ǁkhawa Rehabeammi tawa ūhāga.

²Os ge ǃKhūb di mîsa Semajab, Elob aoba ge hāba, mî rase:

³Mîba Rehabeammi, Salomob ôab, Judab gao-aoba tsî Israeli, Judab tsî Benjaminni tsîkha dib hoaba, mî raǃâ:

⁴Nētib ra ǃKhūba mî: Sadu ge ǃgûǂoa tsî sadu ǃgâsaga ǃkhamū tide. Ab mâb hoaba ǁkhawa ǁîb di oms ǃoa ǁaru, nē ǃkhais ge tita xu go ī xuige. On ge ǃKhūb di mîde ǁnâu tsî Jerobeamma ǃgûǃoas ǀkha ge ǀû.

⁵Tsî Rehabeammi ge Jerusalems tawa ge ǁan, tsîb ge ǃāde ǁaposa ǃkhaise gere ǂnubi Judab ǃnâ.

⁶Tsîb ge Betlehemsa gere ǂnubi tsî Etams, Tekoas,

⁷Bet-Surs, Soxos, Adulams,

⁸Gats, Maresas, Sifs,

⁹Adoraims, Laxis, Asekas,

¹⁰Soras, Ajalons tsî Hebrons tsîdi, Judab tsî Benjaminni tsîkha ǃnâ ge ǁapoǁaposa i ǃāde.

¹¹Tsîb ge nē ǁaposa ǃkhaide ge ǀgaiǀgai, tsîb ge ǂamsaga ǁîdi ǃnâ ge ǁgui tsî ǁhōga ǂûn xa tsî olib xa tsî ǂauxûib xa.

¹²Tsî mâ ǃās hoas ǃnâ ǃgupu khōsikhōgu tsî ǁhâigôagu tsîna tsî ǁîde kaise ge ǀgaiǀgai. Nēti kha ge Judab tsî Benjaminni tsîkha ǁîb di ge i.

¹³ǁNās tawa gu ge pristergu tsî Leviǁîgu, Israeli hoab ǃnâ hâga ǁîb tawa ge hā mâisen ǁîgu di ǀkharigu hoaga xu.

¹⁴Leviǁîgu ge ǁîgu di aiǃādi tsî ū gu hân tsîna ǁnāxū tsî Judab ǃnâ tsî Jerusalems ǃnâ ge hā, Jerobeammi tsî ǁîb ôagu tsîgu ge ǁîga ǃKhūb di pristersi ǃoabasa xu ǂhāxu xui-ao.

¹⁵Tsîb ge pristerga ge mâibasen ǀgapigu diga tsî ǁgâuagu diga tsî ǁnā tsâukha hîab ge kurukha diga.

¹⁶Tsî ǁîgu khaoǃgân ge ǁkhāti Israeli di ǃhaodi hoade xu Jerusalems tawa ge hā, ǁîn di ǂgaoba ge māna, ǃKhūb Israeli di Eloban nî ôase, ǃKhūb, ǁîn îgu di Eloban nî ǁguibade ǁguibase.

¹⁷Nētin ge Judab di gaosisa ge ǀgaiǀgai tsî Rehabeammi, Salomob ôaba ge ǁapoǁapo ǃnona kurigu kōse, ǃnona kurigan ge daob Davib tsî Salomob tsîkha dib ǃnâ a ǃgû xui-ao.

¹⁸Tsî Rehabeammi ge Mahalats, Jerimoti, Davib ôab di ôas xōǀkhā Abigails, Eliab, Isaib ôab di ôasa tarase ge ū.

¹⁹ǁÎs ge ǁîba ǀgôaga ge ǁoraba: Jeub, Semarjab tsî Sahammi tsîga.

²⁰Tsî ǁîs khaoǃgâb ge Maaxas, Absalommi ôasa ge ū, ǁîs ge ǁîba Abiab, Ataib, Sisab tsî Selomiti tsîga ge ǁoraba.

²¹Tsî Rehabeammi ge Maaxas, Absalommi ôasa ǁîb taradi tsî ǁîb ǀgamitaradi hoadi ǃgâ-ai ge ǀnam i. Disiǁkhaisaǀa taradeb ge ge ū, tsî ǃnanidisi ǀgamitarade, tsîb ge ǀgamdisiǁkhaisaǀa ǀgôagu tsî ǃnanidisi ǀgôadi tsîna ge hō.

²²Tsî Rehabeammi ge Abiab, Maaxas di ôaba danase ge mâi, ǃgâsan âb ǃnâb nî ǂamsase īga, ǁîbab ge gao-aodī ǂgao hâ i xui-ao.

²³Tsîb ge ǁnâuǃāxase ge dī, ǁîb ôagu hoagu xab ge Judab tsî Benjaminni tsîkha di ǃhūgu ǃnâ ǀgaruǀgaru ǃkhaisa, tsîb ge ǁîga kaise ge ǂûmā, tsîb ge ǁîga ǂgui tarade ge ǂgaoba.