Read Khoekhoegowab 2 Kroniks 13 Bible Online

2 Kroniks 13 - Khoekhoegowab bible

2 Kroniks 13

¹Disiǁkhaisaǀaǁî kurib gao-aob Jerobeammi dib ǃnâb ge Abiaba ge gao-ao kai Judab ǃnâ,

²ǁîb ge ǃnona kuriga Jerusalems ǃnâ gere gaosîsen. Tsî ǀons ǁîb îs dis ge Mikaja ge i, Urieli ôas, Gibeas disa. Tsî i ge toro-e ge hâ i Abiab tsî Jerobeammi tsîkha ǁaegu.

³Tsî Abiab ge ǃkhamsa ge tsoatsoa ǂnubis ǃkham ǁkhā ǁē-aogu dis, hakakaidisiǀoadisi ǃkhōǂuihesa aogu dis ǀkha, tsî Jerobeammi ge ǃkhammi ǁga ǁîb ǃoa-ai ge ǂhomisen, ǁkhaisakaidisiǀoadisi ǃkhōǂuihesa aogu ǃgari ǁē-aogu ǀkha.

⁴Tsî Abiab ge ge khâi ǃhommi Semarajimmi, Efraimmi ǃhommi ǃnâ hâb di ǂaob ai, tsîb ge ge mî: ǁNâu te re Jerobeamtse tsî Israeli hoab dido!

⁵Amase i kha anuba du tama hâ, ǂan du nîsa, ǃKhūb, Israeli Elob ge Israeli ǂama gaosisa Daviba mā ǃkhaisa ǀamosib kōse, ǁîb tsî ǁîb ôagu tsîga ǂōb di ǃgaeǀhao-i ǀkha?

⁶Xawe Jerobeammi, Nebati ôab, Salomob Davib ôab di ǃgāb ge khâi tsî ǁîb ǀhonkhoeba ge mâǃoa.

⁷Tsî gu ge ǁkhāti ǁau khoegu, Beliali ôaga ǁîb tawa ǀhao tsî ge ǀgaiǀgaisen Rehabeammi Salomob ôab ǃoagu, Rehabeammi ge ǂkham tsî tsaura ǂgaob â-i ge i, ǁîn ǃoagub ge ǀgaiǀgaisen ǁoa is kōse.

⁸Tsî nēsi du ge ǂâibasen hâ, ǃKhūb di gaosis, Davib ôagu ǃomǁae hâs ǃoagu du nî ǀgaiǀgaisen ǃkhaisa. Sadu ge kaise a ǂgui, xawe du ge ǃhuniǀuritsâukha, Jerobeammi ge sado elose kurubakha sadu ǀkha ūhâ.

⁹ǃKhūb di pristergu, Aronni ôagu, tsî Leviǁîgu tsîga doeǁgaǂui tsî pristerga kurubasen tama du hâ, ǃhūb di ǁaedi ra dī khami? Mâb hoab ǃommi âba ǂkham tsâu-i tsî hû bairagu tsîn ǀkha ra hā ǀoaǀoab, ǁîb ge ǁnāgu hîa elo tamaga ra prister kaibahe.

¹⁰Xawe sida xasa, Elob ge a sida di Elo, tsî sida ge ǁîba ǁnāxū tama hâ, tsî ǁnā pristergu, ǃKhūba ra ǃoabagu ge a Aronni di ôa, tsî Leviǁîgu ge sîsenni ǃnâ hâ.

¹¹Tsî gu ge ǃKhūb aiǃâ khauǁguibade ra ǂhubi, mâ ǁgoas hoas ai tsî mâ ǃuis hoas ai ǃgâise ra ham ǀanǀanxūn tsîna, tsî gu ge pere-e ra ǁāǁā ǃanu tāb ai tsî ǃhuniǀurikandelari tsî ǁîb di ǃamǀaedi tsîna mâ ǃuis hoas ain nî ǃamamhese, sida ge ǃûis ǃKhūb, sida Elob disa ra ǃûi, xawe sadu ge ǁîba ge ǁnāxū.

¹²ǁNā-amaga kō, Elob ge sida ǀkha hâ danas tawa tsî ǁîb di pristergu ǀōb xâiǁnâdi dib ǀkha, sadu ǃoagub ǂkhupiǀōba nî ǀō kaise. Israeli ǀgôado, ǃKhūb sadu îgu Eloba tā ǃkhamū, amǁnā du tide xuige.

¹³Xawe Jerobeammi ge ǃgâǃhabi-aoga ǁîna ge naru kai, ǁîn khaoǃgâba xu gu nî hāse, nētin ge Judab di ais aiǃâ ge hâ tsî ǁgoeǃgâ-aogu ge ǁîn khaoǃgâba xu ge hâ.

¹⁴Tsî Judab ge kōnǃgâ, tsî mû, on ge ǃkhamma aisǀkhāba xu tsî khaosǀkhāba xu ge ūhâ i. On ge ǃKhūb ǃoa ge ǂgai, o gu ge pristerga xâiǁnâde ge xâi.

¹⁵Tsî aogu Judab digu ge ǃauǁnaesa ge dī, o i ge ge ī, Judab di oagu ge ǃauǁnaesa dīo, ob ge Eloba Jerobeammi tsî Israeli hoaba ge ǂnau Abiab tsî Judab din aiǃâ.

¹⁶On ge Israeli ôana Judab ais aiǃâ ge ǁhâ, tsî Elob ge ǁîna ǁîn ǃomǁae ge mā.

¹⁷Tsî Abiab tsî ǁîb di ǁaes ge ǁîna kai ǂnau-i ǀkha ge ǂnau, Israeli din xa gu ge korokaidisiǀoadisi ǃkhōǂuihesa aoga ǂnauhe hâse ǁō xui-ao.

¹⁸Nētin ge Israeli ôana ǁnā ǁaeb ai ge ǃgamǃgamhe, xawe Judab ôan ge ge ǀgai, ǃKhūb, ǁîn îgu di Elob ain ge ǂgomǃgâsen hâ i xui-ao.

¹⁹Tsî Abiab ge Jerobeamma sauruǃgon tsî ǁîba ǃāde ge ūǀhana, Bet-Elsa ǁîs ǃnaga hâ ǃādi ǀkha tsî Jesanasa ǁîs ǃnaga hâ ǃādi ǀkha tsî Efronsa ǁîs ǃnaga hâ ǃādi ǀkha.

²⁰Tsî Jerobeammi ge ǃaruǀî ǀgai-i xare-e ge ūhâ tama hâ i Abiab di tsēdi ǃnâ, tsî ǃKhūb ge ǁîba ge ǂnau, ob ge ge ǁō.

²¹Nētib ge Abiaba ge ǀgaiǀgaisen, tsîb ge disihakaǀa tarade ū tsî ǀgamdisi ǀgôagu tsî disiǃnaniǀa ǀgôadi tsîna ge hō.

²²Tsî nau xūn Abiab di ǃnaeǃkhaidi din, ǁîb di daogu xas kas, ǁîb di mîdi xas kas hoas, ǁîn ge ǃnaeǃkhaidi ǂkhanis kēbo-aob Idob dis ǃnâ xoahe hâ.

²³Nētib ge Abiaba ǁîb îgu ǀkha ge ǁom, tsîn ge ǁîba Davib di ǃās ǃnâ ge ǁkhō, tsî ǁîb ôab Asab ge ǁîb di ǃās ǃnâ ge gao-ao kai. ǁÎb di tsēdi ǃnâb ge ǃhūba disi kurigu kōse ǃnōsa ge i.