Read Khoekhoegowab 2 Kroniks 15 Bible Online

2 Kroniks 15 - Khoekhoegowab bible

2 Kroniks 15

¹ǃNubaib ge Elob di Gagaba Asariab, Odedi ôab, ai ge hā.

²Ob ge Asab ǀkhab nî ǀhaose ǂoa, tsî ǁîb ǃoa ge mî: ǃGâ te re, Asats tsî Judab didu hoado tsî Benjaminni dido, ǃKhūb ge sadu ǀkha hâ, sadu ǁîb ǀkha hâ xui-ao. Tsî ǁîba du ga ôao, ob ge ǁîba sado nîra hōkaisen xawe ǁîba du ga ǁnāxūo, ob ge sado nîra ǁnāxū.

³Tsî Israeli ge ǂgui tsēde ama Elob ose ge hâ i, tsî ǁkhāǁkhā ra prister-i ose tsî ǂhanub ose.

⁴Xawe ǂōǂōsib ân ǃnân ge ǃKhūb, Israeli di Elob ǃoa ǃhobasen, tsî ǁîba ôao, ob ge ǁîna ge hōkaisen.

⁵Tsî ǁnā ǁaegu ai i ge ǂkhî-i xare-e ǁnā-i ǂgâxa ra-i kas, ǁnā-i ǂoa ra-i kas hoasa ge hâba tama hâ i, tsî kai khâikhâiǃnâdi xan ge ǁnā ǃhūgu di ǁanǂgāsaben hoana ge hāǂamhe,

⁶ǁaes ge ǁaes ǃoagu tsî ǃās ge ǃās ǃoagu ǂkhūs kōse; Elob ge ǁîna hoatsama ǂōǂōsib ǀkha ǃhuriǃhuri amaga.

⁷ǁNā-amaga satsa ǀgaisa, î kha sa ǃomkha tā ǃopo, amǃnâ-i sa sîsenni ǃnâ hâ xuige.

⁸Tsî Asab ge nē mîde ǁnâuo, tsî Odedi di kēbosisa, ob ge ge ǀgaiǀgaisen tsîb ge ǁgaiǁgaisana Judab tsî Benjaminni di ǃhūb hoaragaba xu ge dībē, tsî ǁnā ǃādi, Efraimmi di ǃhomma xub ge ūde xu, tsîb ge ǃKhūb di altars, ǃKhūb di ai-ommi ǃnâ hâsa ge ǀasa kai.

⁹Tsîb ge Judab tsî Benjaminni tsî ǃhaokhoen Efraimmi tsî Manaseb tsî Simeonni din tsîna ǁîn ǀkha ge ǀhaoǀhao, Israeli din xan ge ǂguina ǁîba ge ǁae, ǃKhūb ǁîb di Elob ǁîb ǀkha hâ ǃkhaisan ge mûo.

¹⁰Tsîn ge Jerusalems tawa ge ǀhao ǃnonaǁî ǁkhâb ǃnâ, disikoroǀaǁî kurib Asab di gaosis dib ǃnâ.

¹¹Tsîn ge ǃKhūba ǁnā tsēs ǁkhās ai, ǁnā ǁkhâuǁnâxūn hîan ge ūhān xa ge ǁguiba hûkaidisi goman tsî hûǀoadisi gūn tsîna.

¹²Tsîn ge ǃgaeǀhao-i ǃnâ ge ǂgâ, ǃKhūb, ǁîn îgu Eloban ǁîn di ǂgaob hoab ǀkha tsî ǁîn di ǀoms hoas ǀkha nî ôa ǃkhaisa.

¹³Tsî mâ-i hoa-i, ǃKhūb, Israeli di Eloba ga ôa tama i-i, ǁî-i ge nî ǃgamhe, ǂkhari-e xu kai-i kōse tsî aoba xu taras kōse.

¹⁴Tsîn ge ǃKhūba ge nūba ǃgari dommi ǀkha tsî dâb ǀkha tsî xâiǁnâdi tsî ǀgapadadi on ǀkha.

¹⁵Tsî Judab hoab ge nē nūs xa ge ǃgâiaǂgao, ǁîn di ǂgaob hoab ǀkhan ge ǁîba ge ôa xui-ao, tsîb ge ǁîba ǁîn xa ge hōhe, tsî ǃKhūb ge ǁîna ǁîn ǂnamipe sâba ge mā.

¹⁶Tsî ǁkhāti Maaxas, gao-aob Asab di îs xasa, ǁîsab ge ǁîba gaosis âsa xu ge ūǁnâ, ǁgaiǁgaisa ǁgôa-elo-es ge ǀhomas ǃnâ dī amaga, tsî ǁgaiǁgaisa ǁgôa-elob âsab ge Asaba ǁkhāti ge hîkākā, tsî ǁîba ǂkhūǂkhū tsî ge khauǃkhū ǃārob Kidronni tawa.

¹⁷ǀGapigu ge Israela xu hoaragase ūbēhe tama hâ i, xaweb ge ǂgaob Asab diba ǀoasase ǃKhūb ǀkha ge hâ i ǁîb di tsēdi hoade.

¹⁸Tsîb ge Elob di ommi ǃnâ ge ūǂgā ǁîb îb di khaihesa xūn, tsî ǁîb di khaihesa xūn, ǀhaiǀurib, ǃhuniǀurib tsî xapan tsîna.

¹⁹Tsî i ge toro-e ge hâ tama i ǃnonadisikoroǀaǁî kurib Asab di gaosis dib kōse.