Read Khoekhoegowab 2 Kroniks 16 Bible Online

2 Kroniks 16 - Khoekhoegowab bible

2 Kroniks 16

¹ǃNonadisiǃnaniǀaǁî kurib gaosis Asab dis ǃnâb ge Basab, Israeli gao-aoba Judab ǃoa ǃgû tsî Ramasa ge ǂnubi, khoe-i nî Asab, Judab gao-aob tawa ǂgâ tsî ǂoa ǃkhaisab nî ǃkhâise.

²ǃNubaib ge Asaba ǀhaiǀurib tsî ǃhuniǀurib tsîkha ǃKhūb ommi tsî gao-aob ommi di ǁuiga xu ūǀkhī tsî ǁîkha Benhadadi, Siriab gao-aob, Damaskus tawa ǁan hâb ǃoa sî tsî ge mî:

³ǃGaeǀhao-i ge hâ, tita tsî sats tsîkhom ǁaegu tsî ti îb tsî sa îb tsîkha ǁaegu, mû, tita ge satsa ǀhaiǀurib tsî ǃhuniǀurib tsîkha ra sîba, ǃgû îts sa ǃgaeǀhaos, Basab, Israeli gao-aob ǀkhats ūhâsa ǁauǁau, îb tita ǃoa hāsa ǀû ti.

⁴Ob ge Benhadada gao-aob Asaba ǁnâu tsî ǁnā ǂnubidi hîab ūhâdi di ǂamsaga Israeli di ǃādi ǃoagu ge sî, o gu ge Ijons, Dans, Abel-Majims tsî ǁuib ǃādi Naftalib didi hoade ge ǂnau.

⁵Tsî i ge ge ī, Basab ge ǁnâuo, ob ge Ramasa ge ǂnubiǀû, tsî sîsenni âb ge ge mâ.

⁶ǁGoasib ge gao-aob Asaba Judab hoaba ū, tsîn ge ǀuidi Ramas dide gere tanibē tsî ǁîs di hain, Basab ge ǁîn ǀkha ǂnubina, tsîb ge ǁîn ǀkha Gebas tsî Mispas tsîra ge ǂnubi.

⁷Tsî ǁnā ǁaeb ǁkhāb aib ge mû-aob Hananiba Asab, Judab gao-aob tawa hā tsî ǁîb ǃoa ge mî: Gao-aob Siriab dib aits ge ǂgomaiǂnûi tsî ǃKhūb, sa Elob aits ge ǂgomaiǂnûi tama ǃkhais ǃaromas ge Siriab gao-aob di ǂnubisa sa ǃomǁaeba xu ge ûiǂoa.

⁸Etiopiaǁîn tsî Libiaǁîn tsîna kha kai ǂnubi tamana ge i, kaise ǂgui kunidi tsî ǃgapi-aon tsîn ǀkha? Xawe ǃKhūb aits ge ǂgomaiǂnûio, ob ge ǁîba ǁîna sa ǃomǁae ge mā.

⁹ǃKhūb di mûra xasa: ǁÎb di mûra ge ǃhūbaib hoaba ra ǃganu, ǀgaisaseb nî ǁgausenga, ǁnān ǂgaob ân ǀoasase ǁîb tawa ǂae hâna. Sats ge nē ǃkhais ǃnâ gârese ge dī, nēsisa xub toroba sa ǃoagu nî hâ xui-ao.

¹⁰Ob ge Asaba mû-aoba ǁaixaǂam tsî ǃkhō-oms ǃnâ ge ǂgā kai bi, nē ǃkhais ǂamab ǁaixa-ū bi hâ xui-ao. ǁNās tawab ge Asaba ǁnā ǁaeb ǁkhāb ai ǀnîn ǁaes dina ge ǁgâiǀā.

¹¹Tsî mû, ǃnaeǃkhaidi Asab didi, ǂgurodi tsî ǀunidi, ge ǂkhanis Judab tsî Israeli tsîkha di gao-aogu dis ǃnâ xoahe hâ.

¹²Tsî Asab ge ǃnonadisikhoeseǀaǁî kurib gaosis âb dib ai ge ǀaesen ǂaira âb ǃnâ; kaiseb ge ǀaesenni âba ge ǃgom. ǁNās tawab ge ǁkhāti ǀaesenni âb ǃnâ ǃKhūba ôa tama i tsî soǀôadī-aoga ge ôa.

¹³Nētib ge Asaba ge ǁō, hakadisiǀguiǀaǁî kurib ǁîb gaosis dib ǃnâ.

¹⁴Tsîn ge ǁîba ge ǁkhō ǀhobas âb hîab ge Davib di ǃās ǃnâ khaobasen hâ is ǃnâ, tsîn ge ǁîba ǁnā ǁgoeǃkhais, ǃgâihamxūn ǀkhab ge ǀoaǀoas tsî ǃkharaga xūǃnôan, ǂkhauxūkuru-aob ǁāǁāǁkhās ai ǂhomi hân ǀkha, tsîn ge ama kai ǀaesa ǁîb ǂama ge khau.