Read Khoekhoegowab 2 Kroniks 18 Bible Online

2 Kroniks 18 - Khoekhoegowab bible

2 Kroniks 18

¹Tsî Josafati ge kaise kai ǃkhūsib tsî ǃgôasib tsîkha ge ūhâ i, tsîb ge ǁîba Axaba ge ǀui.

²Tsî ǀnî kurigu di ǀunis aib ge Axab ǁga ge ǁgôa Samarias ǃoa. Ob ge Axaba ǁîb tsî ǁaes, ǁîb ǀkha hâsa kaise ǂgui gomana ge ǂāba tsîb ge ǁîba ge mîmā, îb Ramot-Gileads ǃoa ǃgû, ti.

³Tsî Axab Israeli gao-aob ge Josafati Judab gao-aob ǃoa ge mî: ǃGûts kha nî tita ǀkha Ramot-Gileads ǃoa? Ob ge ǁîb ǃoa ge mî: Î ta tita sats khami ī, îs sa ǁaes ī khami ti ǁaesa ī, î ge sats ǀkha hâ nē torob ǃnâ.

⁴ǃAruǀîb ge Josafata Israeli gao-aob ǃoa ge mî: ǁNâi nētsē ǃKhūb di mîsa dî re.

⁵ǃNubaib ge Israeli di gao-aoba kēbo-aogu, hakakaidisi ge iga ǀhaoǀhao tsî ǁîgu ǃoa ge mî: ǃGû khom nî sikhoma, Ramot-Gileadsa khom nî ǃkhamūse, tamas ga io ǀû khom nî? O gu ge: ǃGû re, Elob ge ǁîsa gao-aots ǃomǁae nîra mā xuige, ti ge mî.

⁶Ob ge Josafata ge mî: ǀNî kēbo-ao-i ǃKhūb di-e hâ tama nēpa, ǁî-e khom nî dî-e?

⁷Ob ge Israeli gao-aoba Josafati ǃoa ge mî: ǀNî aob ge hâ, ǁîba xub ga ǃKhūba dîbaheba; xawe ta ge ǁkhan bi hâ, tita xab ǃgâi-i xare-e kēbo tama tsî ǂkhabab ǀguibab ra kēbo xui-ao. ǁNāb ge Mikajab Jimlab ôaba. Ob ge Josafata: Tāts gao-aotsa ǁnāti mî, ti ge mî.

⁸ǁGoasib ge Israeli gao-aoba omǃnāb di ǃoabasabeba ǂgai tsî ǁîb ǃoa ge mî: ǃHaese Mikajab, Jimlab ôaba ūhā.

⁹Tsî Israeli gao-aob tsî Josafati, Judab gao-aob tsîkha ge tronra âkha ai ge ǂnôa i, gao-aosi sarana anasen hâǃâ, ǁnā ǂhaba ǃkhais Samarias di ǁāb tawa hâs ai, tsî kēbo-aogu hoagu ge ǁîkha aiǃâ gere kēbo.

¹⁰Tsî Sedekiab, Kenaanab ôab ge ǂnūǀuriǁnâkha dībasen tsî ge mî: Nētib ra ǃKhūba mî: Nēkha ǀkhats ge Siriaǁîna nî ǃkhā, ǁînats nî hoaragase hîkākās kōse.

¹¹Tsî kēbo-aogu hoagu ge ǁnāti kēbo tsî ge mî: ǃGû Ramot-Gileads ǃoa, ots ge nîra ǃgâiǃgâ, ǃKhūb nî ǁîna gao-aots ǃomǁae mā xuige.

¹²Tsî ǁnā sîsabeb hîa Mikajaba nî ǂgaise ge ǃgûb ge ǁîb ǃoa ge mî: Kō re, kēbo-aogu di mîdi ge ǀgui ams ǀguisa xus khami gao-aoba a ǃgâiba; as ǁnâi sa mîs ona ī, ǀguib âgu di mîs ī xase, îts ǃgâiba ǃhoa re.

¹³Xawe Mikajab ge ge mî: ǃKhūb a ûitsama ǃkhais ao ta ge tita ti Elob ga mîba tena nî ǃhoa.

¹⁴Tsî gao-aob tawab ge hāo, ob ge gao-aoba ǁîb ǃoa ge mî: Mikajatse, ǃgû ge nî Ramot-Gileads ǃoa, ǃkhamū si ge nîse, tamas ka io, ǀû ge nî? Ob ge ǁîba ge mî: ǃGû, ots ge nî ǃgâiǃgâ, sa ǃomǁaen nî māhe xui-ao.

¹⁵Ob ge gao-aoba ǁîb ǃoa ge mî: Matikō ǃnāde ta kha ǁnâi nî nūba tsi, ǃKhūb di ǀons ǃnâts ǀnî xū-e tiǀî ǃhoa tide ǃkhaisa, amab ǀguiba?

¹⁶Ob ge ǁîba ge mî: Tita ge Israeli hoaba ǃhomgu ai ǀgaruǀgaruhe hâse ge mû, gūn, ǃûi-ao-i xare-e ūhâ tama hân xase. Ob ge ǃKhūba ge mî: Nēn ge ǀhonkhoe-e ūhâ tama hâ; a-i mâ-i hoa-e ǁî-i di oms ǃoa ǁkhawa ǂkhîb ǃnâ oa.

¹⁷ǃNubaib ge Israeli gao-aoba Josafati ǃoa ge mî: Mîba tsi tama ta hâ, ǁîb ge tita ǃgâi-i xare-e kēboba tide tsî ǂkhabab ǀguiba nî kēbo ti?

¹⁸ǃAruǀîb ge Mikajaba ge mî: ǁNâu ǃKhūb di mîsa: Tita ge ǃKhūba go mû trons âb ai ǂnôase tsî ǀhommi di ǂnubisa ǁîb amǀkhāb tsî ǁîb di ǁareǀkhāb tawa mâse.

¹⁹Tsî ǃKhūb ge ge mî: Tari-e nî Axab, Israeli di gao-aoba ǃhoadan, ǃgû tsîb nî Ramot-Gileads ǃnâ ǁnā ǃkhaisa? Ob ge: Nēb ge nēti tsî naub ge ǁnāti ra mî, ti ge mî.

²⁰ǃNubaib ge ǀgui gagaba ǂoaxa tsî ǃKhūb di ais aiǃâ mâ tsî ge mî: Tita ge ǁîba nî ǃhoadan. Ob ge ǃKhūba: Mâ xū-i ǀkha? ti ge mî.

²¹Ob ge ǁîba ge mî: ǂOa tsî ta ge ǂhumi gagase nî ī ǁîb di kēbo-aogu hoagu di ams ǃnâ. Ob ge: ǃHoadan, tsîts ge ǁkhāti nîra ǃgâiǃgâ; ǂoa îts ǁnāti dī, ti ge mî.

²²Tsî nēsi mû, ǃKhūb ge ǂhumi gaga-e nē kēbo-aogu, sagu hoagu di ams ǃnâ go mā; tsî ǃKhūb ge ǂkhababa sats ǂama go ǃhoa.

²³ǃNubaib ge Sedekiab, Kenaanab ôaba dāsī tsî Mikajaba xōb ai ǁapu tsî ge mî: Mâ daoba-ūb kha ǃKhūb di Gagaba tita xu go ǂoa, satsab nî ǃhoaǀîse?

²⁴Ob ge Mikajaba ge mî: Kō, sats ge ǁî ǃkhaisa nîra mû, nē ǃnā-omsa xu nau ǃnā-oms ǃoats ga ǃgû ǃnubai, gaugausents nîga.

²⁵Ob ge Israeli gao-aoba ge mî: Mikajaba ū îts ǁîba ǁkhawa Amonni, ǃās di ǂamsab ǃoa ūsī tsî Joab, gao-aob ôab ǃoa,

²⁶îts mî: Nētib ra gao-aoba mî: Nēba ǂnûi ǃkhō-oms ǃnâ î ǁîba ǂōǂōsib di pere-e ǂûmā tsî ǂōǂōsib di ǁgam-e āsi, ǂkhîb ǀkha ta nî oahās kōse.

²⁷Ob ge Mikajaba ge mî: ǂKhîb ǀkhats ga satsa oahāo, ob ge ǃKhūba tita xu ǃhoa tama hâ. Tsîb ge ǃaruǀî: ǁNâu ǁaedu hoado! ti ge mî.

²⁸Nēti kha ge Israeli gao-aob tsî Josafati, Judab gao-aob tsîkha Ramot-Gileads ǃoa ge ǃgû.

²⁹Tsî Israeli gao-aob ge Josafati ǃoa ge mî: ǀKharati ǂgaeǂgāsen tsî ta ge ǃkhammi ǃnâ nî sī, xawe satsa sa sarana ǂgaeǂgā. Nētib ge Israeli gao-aoba ǀkharati ge ǂgaeǂgāsen tsî ǃkhammi ǃnâ ge sī.

³⁰Tsî Siriab gao-aob ge ūb hâ kunidi di ǂamsaga mîmā tsî ge mî: Sago ge ǂkharigu kas, kaigu kas hoasa ǃkhamū tide, tsî go ge Israeli gao-aob ǀguiba nî ǃkhamū.

³¹Tsî i ge ge ī, kunidi di ǂamsagu ge Josafata mûo, o gu ge ge mî: Nēb ge gao-aob Israeli diba. O gu ge ǁîba ge hâǂgā, ǃkhamū bi gu nîga, xawe Josafati ge ge ǂgai, ob ge ǃKhūba ǁîba ge hui, ob ge Eloba ǁîga ǁîba xu ge ǁkhaedawa.

³²O i ge ge ī, kunidi di ǂamsagu ge mûo, Israeli gao-ao tamab a ǃkhaisa, o gu ge ǁîb khaoǃgâba xu ge oa.

³³ǃNubaib ge ǀgui khoeba ǀguiǃnâxasib âb ǃnâ ǁîb di khāsa ǂgaeǃnâ tsî Israeli gao-aoba ǁkhaiǁâsarab tsî ǃkhoas tsîra ǁaegu ge ǁkhâu. ǃNubaib ge doeǁga-aob âb ǃoa ge mî: Dabasen îts ǃkhammi ǃkhaisa xu ǂgaeǂguiǂui te, tsuihe ta go xuige.

³⁴Tsî ǃkhammi ge ǁnātsē ǃaruǀî ge kai, tsî gao-aob Israeli dib ge kunis ǃnâ ge mâǀgara Siriaǁîgu ǃoa-ai ǃuis kōse, tsîb ge sores ra ǂgâ ǁaeb ai ge ǁō.