Read Khoekhoegowab 2 Kroniks 19 Bible Online

2 Kroniks 19 - Khoekhoegowab bible

2 Kroniks 19

¹Tsî Josafati, Judab gao-aob ge ǂkhîb ǀkha ǁkhawa ǁîb di ommi ǃoa Jerusalems ǁga ge ǁaru.

²Ob ge Jehub, Hananib ôab, mû-aoba gao-aob Josafati ǃoa ge mî: Eloxoresabats kha nî hui, tsî ǃKhūba ǁkhan hâna nî ǀnam? ǁNā-amaga i ge sats ǂama kai ǁaixasi-e hâ ǃKhūb di ais aiǃâ.

³Xawen ge ǃgâi xūna sa tawa ge hōhe: Sats ge ǀhomade ǃhūba xu ge dībē, tsîts ge ǂgaob âtsa ge ǁāǁā, Elobats nî ôase.

⁴Tsî Josafati ge Jerusalems tawa ge ǁan, tsîb ge ǁkhawa ǁaesa ge ǃgûǃnâǃganu Bersebasa xu Efraimmi ǃhommi kōse tsî ǁîna ǁkhawa ge oa kai ǃKhūb ǁîn îgu di Elob ǃoa.

⁵Tsîb ge ǂhanuǂhanu-aoga ǃhūb ǃnâ ge mâi, ǁaposa ǃādi Judab didi hoadi ǃnâ, ǃāsa xu ǃās ǃoa.

⁶Tsîb ge ǂhanuǂhanu-aogu ǃoa ge mî: Mûbasen re, tare-e go ra dī ǃkhaisa, khoe tama i tsî go ǃKhūba ra ǂhanudība xuige, tsî ǁîb ge sago ǀkha hâ ǂhanub di dīǃkhais ǃnâ.

⁷Tsî nēsi ab ǃhurib ǃKhūb diba sago ai hâ. ǂAn î go ǁîsa dī, ǃKhūb sada Elob tawa i ge ǂhanuoǃnâsi-i kas, khoe-i ǃkhōǃoas kas, ǀkhaexūn ǃkhōǃoas kas hoasa a ǀkhai xuige.

⁸ǁNā-amagab ge Josafata ǁkhāti Jerusalems tawa ǀnîgu Leviǁîn digu tsî pristergu digu tsî Israeli îgu di danagu diga ge mâi, ǂhanub ǃKhūb dib ǂama tsî ǂhanub di ǂnoaguǃkhaidi ǂama, tsî gu ge ǁkhawa Jerusalems ǃoa ge hā.

⁹Tsîb ge ǁîga nēti ge mîmā: Î go ǁnâi nēti dī ǃKhūb di ǃaoǃgâb ǃnâ îǂhôasib ǀkha tsî ǀoasa hâ ǂgaob ǀkha.

¹⁰Tsî mâ ǂnoaguǃkhai-i hoa-i, sago ǃgâsagu, ǃādi ǃnâ ǁan hâga xu ga sago tawa hā-i, ǀaob tsî ǀaob ǁaegu tsî ǂhanub tsî mîmās ǁaegu tsî ǂnûiǂgādi tsî ǂhanu-aisigu ǁaegu: Î go ǁnâi ǁîna ǁnama, în tā ǃKhūb tawa ǀhapixa, îb tā kai ǁgôasi-e sago ǂama tsî sago ǃgâsagu ǂama hā kai; dī ǁnāti, o go ge ǀhapixa tide.

¹¹Tsî mû, Amariab, ǀgapipristeri ge sago ǂamai hâ ǃKhūb di dīxū-i hoa-i ǃnâ; tsî Sebadjab, Ismaeli ôab, Judab ommi gaosab gao-aob di dīǃkhai-i hoa-i ǃnâ; ǁkhāti gu ge ǃoabasabegu, Levi ǁîga ais âgo aiǃâ hâ: ǀGai re î go ǁîsa dī. Ab ǃKhūba ǃgâina hâǀkhā re.