Read Khoekhoegowab 2 Kroniks 2 Bible Online

2 Kroniks 2 - Khoekhoegowab bible

2 Kroniks 2

¹Tsî Salomob ge hûdisiǀoadisi khoegu, ǃgomxūtani-aogu, ǁkhaisadisiǀoadisi khoegu ǃhommi ai ra ǁhāgu tsîga ge ǃgôa, tsî ǁîga ra mûǂam gu ge ǃnonaǀoadisi tsî ǃnanikaidisi ge i.

²Tsî Salomob ge Hirammi, Tires di gao-aob ǃoa sî tsî ge mî: Ti îb Davib ǀkhats ge dī khami tsî sederhainats ge ǁîba sîba khami ommab nî kurubasenga, ǁîb ǃnâb nî ǁanse, ǁnās ǁkhās khami tita ǀkha dī re.

³Mû, tita ge ǃKhūb ti Elob di ǀonsa omma nî kuruba, ǁîbab nî khaibahese, ǃgâihamxūn nî ais âb aiǃâ ǀanǀanhega, tsî hâhâ ra pereb nî ǂhomihega tsî khauǁguibadi ǁgoas ai tsî ǃuis ǃnâ tsî sâtsēdi ai tsî ǂkham ǁkhâgu ai tsî ǂnûihesa kaitsēdi ai, ǃKhūb sida Eloba nî ǁguibahese, ǀamos kōses ge ǁîsa nî ī Israeli ǃnâ.

⁴Tsî ommi hîa ta nî ǂnubib ge nî kai, sida Elob elogu hoagu xa a kai xui-ao.

⁵Tsî tari-e ǀgaiba nî ūhâ ǁîba i omma nî ǂnubibase, ǀhommi, ā, hoan xa ǀgapi ǀhommi ge ǁîba a ǃkhōǂgā ǁoa xawe? Tsî tari ta kha tita o ta tita ǁîba omma nî ǂnubiba, ǃgâihamxūna ǁîb di ais aiǃâ ǀanǀans ǃaroma tamas ga io?

⁶Îts ǁnâi gā-ai aoba sîba te re, sîsen ǁkhāba, ǃhuniǀurib ǃnâ tsî ǀhaiǀurib ǃnâ tsî ǂaib ǃnâ tsî ǂnūǀurib ǃnâ tsî purpuri ǃnâ tsî karmeseinǀapab ǃnâ tsî ǂhoab ǃnâ tsî xoaǂgāǃnâsa a ǁkhāba, ǁnā gā-aigu, ti ǀkha Judab tsî Jerusalems ǃnâ hâgu, ti îb Davib xa ǂnûihe hâgu ǀkha.

⁷Îts ǁkhāti sederhain tsî denehain tsî ǃnaruhain xa sîba te re Libanonna xu, ǂan ta a xuige, sa ǃgāgu Libanonni haina ǁhāsa a ǂan ǃkhaisa, tsî mû, ti ǃgāgu ge sa ǃgāgu ǀkha nî hâ.

⁸Î gu kaise haina ǁāǁāba te re, ǁnā ommi hîa ta nî ǂnubib ge kai tsî buruburuxase nî ī xuige.

⁹Tsî mû tita ge sa ǃgāgu, ǁhā-aogu, haina ra ǁhāga nî mā ǀgamdisiǀoadisi korga ǃhorob xa, tsî ǀgamdisiǀoadisi korga gerstǃhorob xa, ǀgamdisiǀoadisi batga ǂauxûib xa tsî ǁîn tawa ǀgamdisiǀoadisi batga olib xa.

¹⁰Ob ge Hirammi, Tires di gao-aoba ǂkhani-i ǀkha ǃeream tsî Salomob ǃoa ge sî i: ǃKhūb ǁaes âba a ǀnam amagab ge satsa ǁîn ǂama gao-aose ge mâi.

¹¹ǃAruǀîb ge Hiramma ge mî: Ab ǃkhōǀkhāhe ǃKhūb, Israeli di Elob, ǀhommi tsî ǃhūbaib tsîkha ge kuruba, ǁîb ge gao-aob Daviba gā-ai ǀgôab ǂans tsî ǁnâuǃāb tsîkha ūhâba ge mā, ǃKhūba omma nî ǂnubibab tsî ǁîb gaosisa omma nî ǂnubibaba.

¹²O ta ge tita gā-ai aob, ǁnâuǃāb â-iba ra sî, Hiram-Abiba.

¹³Taras Danni ôadi dis di ôaba, ǁgûb âb Tires di ao ge ība, sîsen ǁkhāba ǃhuniǀurib ǃnâ tsî ǀhaiǀurib ǃnâ tsî ǂaib ǃnâ tsî ǂnūǀurib ǃnâ tsî ǃuri ǀuidi ǃnâ tsî hain ǃnâ tsî purpuri ǃnâ tsî ǂhoab tsî lineǃkhaib ǃnâ tsî karmeseinǀapab ǃnâ tsî xoaǂgā ǁkhāba tsî ǁnâuǃāxa hōǂui-ai-i mâi-aiǃâheb ka-i hoa-e ǂâiǂâisenǂui ǁkhāba, sa gā-aigu ǀkha tsî ti ǀhonkhoeb, sa îb Davib di gā-aigu ǀkha.

¹⁴Îts ǁnâi nēsi ti ǀhonkhoetsa sa ǃgāga sîba ǃhorob xa tsî gerstǃhorob xa, olib tsî ǂauxûib tsîn hîats ge mîna,

¹⁵o ge ge sige haina nî ǁhā Libanonna xu, ǂhâbats hâs hoas kōse, tsî ge ge ǂgaudi ǀkha huriba-ū nî ūsība tsi Jopas ǁga, ots ge satsa ǁîna Jerusalems ǃoa nî ǃgû-ū kai.

¹⁶Tsî Salomob ge ǃhao aogu Israelǃhūb ǃnâ hâgu hoaga ǁnā ǃgôas ǁîb di îb Davib ge ǁîga ǃgôas ǀkha ge ǃgôakhâi, o gu ge ǀguikaidisikorodisiǃnonaǀaǀoadisi tsî ǃnanikaidisise ge hōhe.

¹⁷Tsîb ge ǁîga xu hûdisiǀoadisi ǃgomtani-aoga ge dī tsî ǁkhaisadisiǀoadisi ǁhā-aoga ǃhommi ai tsî ǃnonaǀoadisi tsî ǃnanikaidisi kōǂamaoga, ǁaesa gu nî sîsen kaise.