Read Khoekhoegowab 2 Kroniks 20 Bible Online

2 Kroniks 20 - Khoekhoegowab bible

2 Kroniks 20

¹Tsî i ge nēn khaoǃgâ ge ī, Moabǁîn tsî Amonǁîn tsî ǀnîn Amonǁîn tawa hân ge Josafati ǃoagu hā ǃkhaisa, ǃkhamn nîga.

²ǃNubai gu ge hā Josafata ǂhôa tsî ge mî: Kai ǂnubis ge sa ǃoagu ra hā hurib nau ǀkhāba xu Siriaba xu, tsî mû, ǁîn ge Hasason-Tamars, ǁnās ge Engedis tawa hâ, ti.

³Ob ge Josafata ǃao tsî ais âba ge unu, ǃKhūbab nî ôase, tsîb ge ǂûtama hâ-e ge ǂgaiǂui Judab hoab ǃnâ.

⁴Ob ge Judaba ge ǀhû, ǃKhūb tawan nî hui-ôase, ǁkhātin ge Judab di ǃādi hoade xu ge hā, ǃKhūban nî ôase.

⁵Tsî Josafati ge ǀhaohâb Judab tsî Jerusalems tsîra dib ǃnâ ge mâ i, ǃKhūb di ǀasa ai-ommi aiǃâ.

⁶Tsîb ge ge mî: Ti ǃKhūtse, sida îgu Elotse, satsa ǁnā Elo tamatsa, ǀhommi ǃnâ hâtsa? Ā, sats ge a ǀūben gaosidi hoadi di gaosa, sa ǃomǁae kha ge ǀgaib tsî ǁkhāsib tsîkha hâ, khoe-i xare-i sa ǃoa-ai a mâ ǁoas kōse.

⁷Sats, sida Elotsa, ǁanǂgāsaben nē ǃhūb dinats kha satsa sa ǁaes Israels di ais aiǃâba xu doeǁgabē tsî ǁîba Abrahammi, sa ǀnamsabeb di suriba mā tama ge i ǀamosib kōse?

⁸Tsîn ge ǁîb ǃnâ ge ǁan, tsîn ge ǁîb ǃnâ sa ǀonsa ǃanusi-e ge ǂnubiba mî raǃâ:

⁹ǂKhaba-i hoa-i xa da ga hāǂamheo, ǀgoraǃgâs di gôab xas kas, ǂhīǁōb xas kas, ǃâtsūǀkhāb xas kas hoasa, o da ge nē ommi aiǃâ tsî sa ais aiǃâ nî mâ, sa ǀons nē ommi ǃnâ hâ xui-ao, o da ge sida di ǂōǂōsiba xu sa ǃoa nî ǂgai, ots ge satsa sida nîra ǁnâu-am tsî ore.

¹⁰Tsî nēsi mû, Amonni ôan tsî Moabǁîn tsî ǁnān ǃhommi Seiri din, Israelats ge ǁîna-ū doesa mā-am tama ina, Egipteba xun ge doe ǃnubai, xawen ge ǁîna ge ǂgō tsî ǁîna hîkākā tama ge i.

¹¹Mû ǁnâi, ǁîn ra mādawa-am da, hā raǃâ, sa ǀumis, sats ge sida ǀumise mā dasa xun nî doeǁgaǂui daga.

¹²Okha sida di Elotse, ǁîna kha ǂhanuǂhanuts tide? Sida ǃnâ i ge ǀgai-i xare-e a ǀkhai amaga nē ǂguib sida ǃoagu ra hāb ǃoa-ai, tsî sida ge a ǀū, tare-e da nî dī ǃkhaisa, tsî sida di mûdi ge sa ai hâ.

¹³Tsî Judab hoab ge ǃKhūb di ais aiǃâ ge mâ i, ǁkhāti ǁîn ôaron, ǁîn taradi tsî ǁîn ôagu tsîna.

¹⁴ǃNubaib ge Gagab ǃKhūb diba ǀhaohâb ǁaegub ǃnâ Jahasieli, Saxariab ôab, Benajab ôab, Jeieli ôab, Matanjab ôab, Leviǁîb Asafi ôagu dib ai ge hā.

¹⁵Ob ge ge mî: ǃGaoǃgâ Judats hoatse, tsî sadu, Jerusalems di ǁanǂgāsabedo, tsî sats gao-ao Josafatse, nētib ra ǃKhūba mî sadu ǁga: Tā ǃao, î du tā ǃhuri nē kai ǂguib xa, ǃkhammi ge sadu di tama hâ, tsîb ge a Elob di xuige.

¹⁶ǁAri ǁgôa ǁîn ai, mû ǁîn ra ǂoaxa Sis di ǂkhâb ai, tsî du ge ǁîna nîra hō ǃgoaǃnāb di ǀams tawa Jerueli di ǃgaroǃhūb aiǃâ.

¹⁷Sadu ge nē ǃkhammi ǃnâ ǃkham tide, dāǀgū î du mâ, î du ǁnā huib ǃKhūb dib sadu ǀkha hâba kōǀî, sats Judats tsî sas Jerusalemse. Tā ǃoa, î du tā ǃhuri, ǂoa ǁari, î du ǁîna ǃoa, ǃKhūb ge sadu ǀkha nîra hâ xuige.

¹⁸ǃNubaib ge Josafata ais âb ǀkha ǃhūb ai ge ǃgamǃgâ, tsî Judab hoab tsî Jerusalems di ǁansaben hoan ge ǃKhūb di ais aiǃâ ǁnāǁgoe tsî ǃKhūba ge ǀgoreǀî.

¹⁹Tsî Leviǁîgu Kehati ôab digu tsî Koraxǁîn digu ge ge khâi, ǃKhūb Israeli Eloba gu kaise ǃgari dommi ǀkha nî karese.

²⁰On ge ǃnauǁgoaga khâi tsî ǃgaroǃhūb Tekoas dib ǃoa ge ǂoa, tsî ǂoan ge, ob ge Josafata mâ tsî ge mî: ǁNâu te re sats Judatse tsî sadu Jerusalems ǁanǂgāsabedo! ǂGom du re ǃKhūb sadu Elob ǃnâ, o du ge nîra ǁapoǁapohe; ǂgom du re ǁîb di kēbo-aoga, o du ge nîra ǃgâiǃgâ.

²¹Ob ge ǁîba ǁaes ǀkha ge ǀape, tsîb ge ǃKhūba ǁnae-aoga ge ǂnûiba, ǃanu ǃanusiba gu nî karese, ǁnāgu hîa ǂhomisen hâgu aiǃâ ǃgû tsî: ǃKhōǀkhā du re ǃKhūba, ǀkhomxaǂgaosib âb ǀamosib kōse hâ xuige, ti ra mîga.

²²Tsî ǁîgu ge dâb di ǂgais tsî koa-amsa tsoatsoa ǃnubaib ge ǃKhūba ǃgâǃhariba ge ǁgui Amonni ôan tsî Moabǁîn tsî Seirǃhommi din, Judab ǃoagu ge hān ǃoagu, on ge ge ǂnauhe.

²³Amonni ôan tsî Moabǁîn tsîn ge Seirǃhommi di ǁanǂgāsaben ǃoagu ge khâi, ǀâxare tsîn nî hîkākāse, tsî Seiri di ǁansabenan ge dītoao, on ge nē-e nau-e ge hîkākāsen hui.

²⁴Tsî Judab ge ǃûiǂgō-ommi ǃgaroǃhūb dib kōse sīo, on ge ǂguibǀî ge unusen, tsî mû, ǁnāpa di ge ǁō hâ sorode hâ, ǃhūb ai ǁgoede, tsî khoe-i xare-i ge ûi tama ge i.

²⁵Ob ge Josafati tsî ǁîb di ǁaesa ge hā, ǁkhâuǁnâxūnan nî ǃnaribasense, tsîn ge ǁîn tawa kaise ǂgui xūna ge hō, xūn xas kas, ǁō hâ sorodi xas kas, ǃgomǀgausa sîsenūxūn xas kas hoasa, tsîn ge ge ūbēbasen, ǃaruǀîn ge tani ǁoa is kōse, tsîn ge ǁkhâuǁnâxūna ǃnona tsēdi kōse ge ǃnaribasen, kaise ǂgui xūn ge i xui-ao.

²⁶Tsî hakaǁî tsēs ain ge ǃgoaǃnāb Beraxab dib ǃnâ ge ǀhû, ǁnāpan ge ǃKhūba koa xui-ao; ǁnā-amagan ge ǀons ǁnā ǃkhais disa Beraxab di ǃgoaǃnāb, ti ge ǂgai nētsēs kōse.

²⁷ǁNās khaoǃgâ gu ge aogu Judab tsî Jerusalems tsîra digu hoaga ge oa tsî Josafata danas ân ai, ǁkhawan nî ǃgâiaǂgaob ǀkha Jerusalems tawa hâse; ǃKhūb ge ǁîna ǃgâiaǂgao kai ǁîn di khākhoen ǂama xui-ao.

²⁸Tsîn ge Jerusalems tawa ge hā ǀganaǀkhōxūn ǀkha tsî harpdi ǀkha tsî ǀgapadadi ǀkha, ǃKhūb di ommi ǃoa.

²⁹Ob ge Elob di ǃhuriba ǁnā ǃhūgu gaosidi hoadi ǂama ge hā, ǁnâun geo, ǃKhūb ge Israeli khākhoena ǃkhamū ǃkhaisa.

³⁰Nētis ge gaosis Josafati disa ǃnōsa ge i, tsî ǁîb di Elob ge ǁîba ǁîb ǂnamipe sâba ge mā.

³¹Tsî Josafati ge ge gao-ao kai Judab ǂama. ǃNonadisikoroǀa kurixab ge ǁîba ge i, gao-ao kaib ge ǃnubai, tsîb ge ǀgamdisikoroǀa kuriga Jerusalems ǃnâ gere gaosîsen; tsî ǀons ǁîb îs dis ge Asuba ge i, Silhib ôasa.

³²Tsîb ge ǁîb îb Asab di daob ǃnâ ge ǃgû, tsîb ge ǁîba xu ǁgôa tama ge hâ i, ǃKhūb mûǁae a ǂhanuna ra dīǃâ.

³³Xawe gu ge ǀgapiga dībēhe tama ge hâ i; ǁaes ge ǂgaob âsa ganupe ǁaposase ǁîs îgu di Elobǀî ūnu tama hâ i xui-ao.

³⁴Tsî nau xūn Josafati ǃnaeǃkhaidi din, ǂguron tsî ǀunigan, mû, ǁîn ge xoahe hâ ǁnā ǃnaeǃkhaidi Jehub, Hananib ôab didi ǃnâ, ǁîban ge xoamâi kaide Israeli gao-aogu di ǂkhanis ǃnâ.

³⁵Xawe nēn khaoǃgâb ge Josafati, Judab gao-aoba, Ahasiab Israeli gao-aob ǀkha ge ǃgaeǁaesen; ǁîb ge dīs âb ǃnâ eloxoresase ge dī.

³⁶Tsîb ge ǁîb ǀkha ge ǃgaeǁaesen doe-omga dī tsîb nî ǁîga Tarsis ǃoa ǃgû kaise; tsî kha ge doe-omga ge dī, Esion-Gebers tawa,

³⁷xawe Elieseri, Dodavahub ôab, Maresas dib ge Josafati ǃoagu kēbo tsî ge mî: Ahasiab ǀkhats ǃgaeǁaesen hâ amagab ge ǃKhūba sa sîsenga go hîǀhuru. Nēti gu ge doe-omga ge khôahe, Tarsis ǃoa gu ge ǃgû ǁoa is kōse.