Read Khoekhoegowab 2 Kroniks 21 Bible Online

2 Kroniks 21 - Khoekhoegowab bible

2 Kroniks 21

¹ǁNās khaoǃâb ge Josafata ǁō tsî ǁîb îgu tawa ge ǁkhōhe Davib di ǃās ǃnâ. Tsî ǁîb ôab Jorammi ge ǁîb di amǃnâs ai ge gao-ao kai.

²Tsîb ge ǃgâsaga ge ūhâ i, Josafati ôagu, Asariab, Jehieli, Saxariab, Asariab, Mixaeli tsî Sefatjab tsîga. Nēgu hoagu ge Josafati, Judab gao-aob di ôa ge i.

³Tsî ǁîgu îb ge ǁîga ǂgui hōde ge mā ǀhaiǀurib xa tsî ǃhuniǀurib xa tsî ǃgomǀgausan xa tsî Judab ǃnâ ǁgoe ǁaposa ǃādi xa, xawe gaosisab ge Joramma ge mā, ǁîb a ǂguroǃnaesabe amaga.

⁴Tsî Jorammi ge ǁîb îb di gaosis ǃnâ khâi tsî ǀgaiǀgaiseno, ob ge ǁîb ǃgâsagu hoaga gôab ǀkha ge ǃgam tsî ǁkhāti ǀnîgu Israeli gaosagu diga.

⁵ǃNonadisiǀgamǀa kurixab ge Joramma ge i, gao-ao kaib ge ǃnubai, tsîb ge ǁkhaisa kuriga ge gaosîsen, Jerusalems tawa.

⁶Tsîb ge daob Israeli gao-aogu dib ǃnâ ge ǃgû, Axab di ommi digu gere dī khami; Axab di ôasab ge tarase ūhâ i xui-ao; tsîb ge ǃKhūb mûǁae a ǂkhabana gere dī.

⁷Xawe ǃKhūb ge Davib di omma hîǀhuru ǂgao tama ge hâ i, ǁnā ǃgaeǀhaos, Davib ǀkhab ge dīs ǃaroma, tsî ǁîb ge mîmâis ǁkhās xase ǁîb tsî ǁîb ôagab nî mâ tsēs hoasa ǃamamǀae-e mā ti.

⁸ǁÎb di tsēdi ǃnân ge Edomǁîna, Judab gaosisa xu ge ǁnāǁgôa, tsîn ge gao-ao-e ǁîn ǂama ge mâibasen.

⁹ǁNā-amagab ge Joramma ge bē ǁîb di ǂamsagu ǀkha tsî kunidi hoade ǁîb ǀkha; tsîb ge tsuxuba khâi tsî Edomǁîn, ǁîb ǂnamipe hâna ge ǂnau tsî kunidi di ǂamsagu tsîna.

¹⁰Xawen ge Edomǁîna Judab gaosis ǃnagaba xu ge ǁnāǁgôa nētsēs kōse. ǁNā ǁaeb ǁkhāb ais ge Libnasa ǁîb gaosisa xu ge ǁnāǁgôa: ǃKhūb, ǁîn îgu Elobab ge ǁnāxū xui-ao.

¹¹Tsîb ge ǁkhāti ǀgapiga ge dī Judab di ǃhomgu ai, tsîb ge ǁansaben Jerusalems dina ge ǀai kai, tsîb ge Judaba ge ǂgaeǂhapu.

¹²Tsî i ge xoa-ai-e ǁîb tawa ge hā kēbo-aob Eliaba xu, mî raǃâ: Nētib ra mî ǃKhūb sa îb Davib di Eloba: Daogu sa îb Josafati digu ǃnâ tsî daogu Asab, Judab gao-aob digu ǃnâts ǃgû tama,

¹³tsîts ge daob Israeli gao-aogu dib ǃnâ ge ǃgû, tsîts ge Judab tsî Jerusalems di ǁanǂgāsabena ge ǀai kai, Axab di ommi ge ǀai kais ǁkhās xase, tsî sa ǃgâsagu sa îb ommi digu, sats xa ge ǃgâi igats ge ǃgam ǃkhais ǃaroma.

¹⁴Mû, ob ge ǃKhūba kai ǁnora-ai-i ǀkha nîra ǁnora tsi sa ǁaes tawa tsî sa ôan tawa tsî sa taradi tawa tsî sa xūn tawa.

¹⁵Tsîts ge ǁkhāti kai ǀaesenaigu ǃnâ nîra hâ sa ǃnāǁōb xa, sa ǃnāxūn nî ǁōb xa ǂoas kōse, kuriba xu kuriba ǃoa.

¹⁶Nētib ge ǃKhūba Jorammi ǃoagu gagas Filisteǁîn tsî Arabiaǁîn, Etiopiaǁîn nau ǀkhāb ai hân disa ge ǂkhaiǂkhaikhâi.

¹⁷On ge ǁîna Judab ǃnâ ǃgû tsî ǁgūǂgâ tsî ǁnā xūn, gao-aob di ommi ǃnâ ge hōhen hoan tsî ǁîb ôan tsî ǁîb taradi ona ge ūǃgûbē, ǀnî ǀgôabab ge ǃgaubahe tama is kōse, Joahab, ǀgôagu âb xa ǂkhammi ǀguib.

¹⁸Tsî nēn hoan khaoǃgâb ge ǃKhūba ǁîba ǃnāb âb ǃnâ ǁō-ai-i hîa ǂuruǂuruhe ǁoa-i ǀkha ge ǁnora.

¹⁹ǁÎ-i ge kuriba xu kuriba ǃoa gere ī, ǀgam kurikha di ǁaeb ge ǀamǂoa, on ge ǃnāxūn âba ǁōb xa ge ǂoa, ob ge ǃgom ǀaesenaigu xa ge ǁō. Os ge ǁaes âba ǀae-e khauba bi tama ge i, ǁîb di îgu di ǀae-i ge ī-i xase.

²⁰ǁÎb ge ǃnonadisiǀgamǀa kurixa ge i, gao-ao kaib ge ǃnubai, tsîb ge ǁkhaisa kuriga gere gaosîsen Jerusalems tawa, tsîb ge ǂgaohe tama hâse ge ǁō, tsîn ge ǁîba ge ǁkhō Davib di ǃās ǃnâ, xawe gao-aogu di ǀhobadi ǃnâs ose.