Read Khoekhoegowab 2 Kroniks 22 Bible Online

2 Kroniks 22 - Khoekhoegowab bible

2 Kroniks 22

¹Tsî Jerusalems di ǁansaben ge Ahasiab, ǁîb ôab ǂkhamma ge gao-aodī ǁîb di ǃās ǃnâ, ǂnubi-i, Arabiab din ǀkha ǁgoeǃkhais ǃnâ ge hā-i ge ǂgurogu hoaga ǃgam xui-ao. Ob ge Ahasiab, Jorammi, Judab gao-aob ôaba gere gaosîsen.

²Hakadisiǀgamǀa kurixab ge Ahasiaba ge i, gao-ao kaib ge ǃnubai, tsîb ge ǀgui kuriba ge gaosîsen Jerusalems tawa. Tsî ǀons ǁîb îs dis ge Atalia ge i, Omrib ôasa.

³ǁÎb ge ǁkhāti daogu Axab ommi digu ǃnâ ge ǃgû, ǁîb îs ge ǁîb di ǀapemā-ao i xui-ao, tsūdīb nîse.

⁴Ob ge ǃKhūb mûǁae a ǂkhabana gere dī, Axab di ommi khami, ǁîn ge ǁîb îb di ǁōb khaoǃgâ ǁîb di ǀapemā-ao i xui-ao, kāǁōs âbǀî.

⁵Tsîb ge ǁkhāti ǁîn di ǀapes ǃnâ ge ǃgû, tsîb ge Jorammi, Axab ôab, Israeli gao-aob ǀkha ǃkhammi ǁga ge oa, Ramot-Gileads ǃoa, Hasaeli, Siriab gao-aob ǃoagu; tsî Siriaǁîgu ge Joramma ge ǂnau.

⁶ǃNubaib ge ǁkhawa ge oa, Jesreels tawab nî ǂgaukaisense ǁnā ǀhapidi, Ramas tawab ge tsuihede xu, Hasaeli, Siriab gao-aobab ra ǃkhamū hîa. Ob ge Ahasiab, Jorammi ôab, Judab gao-aoba ge ǁgôaxa, Jorammi, Axab ôabab nî Jesreels tawa si kōse, ǁîb ge ǀaesen hâ i amaga.

⁷Tsî dākākās Ahasiab dis ge Eloba xu ge hā, ob ge Jorammi tawa ge sī. Tsî sīb ge, ob ge Jorammi ǀkha Jehub, Nimsib ôab ǃKhūb xa ge Axab di ommab nî hîkākāse ǂkhauǀkhāheb ǁga ge ǂoa.

⁸Tsî i ge ge ī, Jehub ge Axab di omma ǀgoraǃgâ ǃnubaib ge Judab gaosagu tsî Ahasiab ôagu, Ahasiaba ra ǃoabaga hō tsî ǁîga ǃgam ǃkhaisa.

⁹ǁNās khaoǃgâb ge Ahasiaba ge ôa, tsîn ge ge hō bi, Samarias ǃnâb ge gau hâ i xui-ao, tsîn ge ǁîba Jehub tawa ūsī tsî ǃgam tsî ge ǁkhō bi. Josafati ôab, ǂgaob hoab ǀkha ǃKhūba ge ôab kom ǁîbao, tin ra mî xui-ao. Nētib ge Ahasiab omma khoe-i, gaosisa ǁkhāba hâ-i xare-e ge ūhâ tama hâ i.

¹⁰Tsî Atalias, Ahasiab îs ge mûo, ǀgôab âs ǁō hâ ǃkhaisa, os ge khâi tsî gao-aosi surib Judab ommi dib hoaba ge ǃgam.

¹¹Xawe Jehosebas, gao-aob ôas, ge Joab, Ahasiab ôaba ū tsî ǁîba ge ǃnari gao-aob ôagu hîa nî ǃgamhegu di ǁaeguba xu tsî ǁîba kaikai-aos âb ǀkha ǁomoms ǃnâ ge ǂnûi. Nētis ge Jehosebas, gao-aob Jorammi ôas, pristeri Jojadab di tarasa, Ahasiab di ǃgâsas a xui-ao, Ataliasa xu ge sâu bi, ǃgam bis tidega.

¹²Tsîb ge ǁîn tawa Elob ommi ǃnâ ǃnani kuriga ge sâuhe hâ i, tsî Atalias ge ǃhūba ge gaoǂam.