Read Khoekhoegowab 2 Kroniks 23 Bible Online

2 Kroniks 23 - Khoekhoegowab bible

2 Kroniks 23

¹Xawe hûǁî kurib ǃnâb ge Jojadaba ǀgaiǀgaisen tsî kaidisigu di ǂamsagu, Asariab, Jerohammi ôab, tsî Ismaeli, Johananni ôab, tsî Asariab, Obedi ôab, tsî Maasejab, Adajab ôab, tsî Elisafati, Sixrib ôab tsîgu ǀkha ge ǃgaeǀhaosen.

²ǁÎgu ge Judab ǃnâ ǃgûma tsî Leviǁîga ge ǀhaoǀhao Judab di ǃādi hoade xu tsî danagu Israeli îgu diga, tsî gu ge Jerusalems tawa ge sī.

³Ob ge ǁnā ǀhaohâb hoaba ǃgaeǀhao-e ge dī Elob ommi ǃnâ gao-aob ǀkha. Tsîb ge Jojadaba ǁîn ǃoa ge mî: Mû, gao-aob ôab ge nîra gao, ǃKhūb ge Davib di ôagu xa mîs xase.

⁴Nēs ge ǃkhais, dī du nîsa: ǃNonaǁî ǃâs sadu, sâtsēs ai ra ǂgâ du disa, pristergu tsî Leviǁîgu tsîgu ge ǁāb ǃûi-aogu dāǃkhaidi digu ase nî ī.

⁵Tsî ǃnonaǁî ǃâs ge gao-aob ommi tawa nî hâ; tsî ǃnonaǁî ǃâs ǃgaoǃgaos di ǁāb tawa; tsî ǁaes hoas ge ai-omgu ǃKhūb ommi digu ǃnâ nî hâ.

⁶Xawe ǀnî khoe-i xare-i ge ǃKhūb di ommi ǃnâ sī tide, pristergu tsî Leviǁîgu hîa ra ǃoabagu ǀguigu; ǁîgu ge nîra ǂgâ, ǁîgu a anu xui-ao; tsî ǁaes hoas ge ǃKhūb di ǃûisa nî ǃûi.

⁷Tsî Leviǁîgu ge gao-aoba nî hâǂnamipe, mâb hoaba ǀāxū-i âba ǁîb ǃomǁae ūhâǃâ tsî ommi ǃnâ ga ǂgâ-i hoa-i ge nîra ǃgamhe, xawe sago ge gao-aob ǀkha nî hâ, ǂgâb kas, ǂoab kas hoasa.

⁸O gu ge Leviǁîgu tsî Judab hoab diga pristeri Jojadab ge mîmān hoana ge dī, tsî gu ge mâb hoaba ǁîb di aogu hîa sâtsēs ai ra ǂgâga, ǁnāgu sâtsēs ai ra ǂoagu ǀkha ge ū; pristeri Jojadab ge ǀgorade mā-amsa dī tama i xui-ao.

⁹Ob ge pristeri Jojadaba kaidisigu di ǂamsaga ǁhâigôagu tsî kai khōsikhōgu tsî ǂkhari khōsikhōgu gao-aob Davib digu, ǃKhūb di ommi ǃnâ ge hâ iga ge mā.

¹⁰Tsîb ge ǁaes hoasa mâb hoaba, ǀāxū-i âba ǁîb ǃomǁae ūhâǃâ ge mâi ommi di amǀkhāba xu ommi di ǁareǀkhāb kōse, altarsǀî tsî ommiǀî gao-aob ǂnamipe.

¹¹ǁNās khaoǃgâb ge gao-aob ôaba ūǀkhī tsî kronsa ǀgapa bi tsî ǀhûǀguitimîsa ge mā bi tsî ge gao-aodī bi; tsî Jojadab tsî ǁîb ôagu ge ǀnau bi tsî: Ab gao-aoba gaxuse ûi re! ti ge mî.

¹²Tsî Atalias ge ǁaes ǃkhoehā tsî gao-aoba ra ǃkhōǀkhās di domma ǁnâuo, os ge ǁaes tawa ǃKhūb di ommi ǃnâ ge hā.

¹³Tsî kōs geo, mû, ob ge gao-aoba ǂkhâǃnâhaib ǃgao ge mâ i, ǂgâǃkhaib tawa. Tsî ǂamsagu tsî ǀgapadadi tsîn ge gao-aob tawa ge hâ i; tsî ǁaes ǃhūb dis hoas ge ge ǃgâiaǂgao hâ i, tsî ǀgapadade gere xâi, tsî ǁnae-aogu ge ǁaes di ǀkhōxūn ǀkha ge hâ i tsî ge ǂanǂan, ǃkhōǀkhāhe i nî ǃkhaisa. ǃNubais ge Ataliasa saran âsa ǀkhauǃā tsî: ǀApexūs ge, ǀapexūs ge! ti ge ǂgai.

¹⁴Ob ge pristeri Jojadaba kaidisigu di ǂamsagu, ǂnubis ǂama mâihe hâga-ū ǂoa tsî ǁîgu ǃoa ge mî: Ūǂui si ǁgaragu ǁaegu ǃaugab kōse, tsî ǁîsa ga sao-i, ǁnā-i ge gôab ǀkha nîra ǃgamhe; pristeri ge: ǃKhūb ommi ǃnâ go ǁîsa ǃgam tide, ti ge mî.

¹⁵O gu ge ǃomga ge ǁgui ǁîs ai, tsîs ge hānǁāb di ǂgâǃkhaisa-ū gao-aob ommi ǃoa ge ǃgû, o gu ge ǁnāpa ge ǃgam si.

¹⁶Tsî Jojadab ge ǃgaeǀhao-e ge dī, ǁîb ǁaegu tsî ǁaes ǁaegu tsî gao-aob ǁaegu, ǃKhūban ǁaese ība ti.

¹⁷ǁNās khaoǃgâs ge ǁaes hoasa Baali di ommi ǃoa ǁgôa tsî ǁîba ge khôaǁnâ, tsî altardi âb tsî īgu âban ge ge khôaǂkhūǂkhū, tsî Matanni, Baali di pristeran ge altardi aiǃâ ge ǃgam.

¹⁸Tsî Jojadab ge ǂamkhoeside ge mâi ǃKhūb di ommi ǃnâ Leviǁî pristergu ǃomǁae, Davib xa ǃKhūb di ommi ǃnâ ge ǀgorahegu, ǃKhūb di khauǁguibasa gu nî ǁguibase, Moseb di ǂhanub ǃnâ xoahe hâ khami, ǃgâiaǂgaob tsî ǁnaeb tsîra ǀkha Davib di ǂnûiǂgās ǃoa.

¹⁹Tsîb ge ǁāb ǃûi-aoga ge mâi ǃKhūb ommi di ǁāgu tawa, khoe-i xū-i hoa-i ǃnâ ǃanu tama-i xare-i ǂgâ tidese.

²⁰Tsîb ge kaidisigu di ǂamsagu tsî ǀgaisagu tsî ǁaesa ra gaoǂamgu tsî ǃhūb di ǁaes hoas tsîna ū tsî gao-aoba ǃKhūb di omma xu ge ūǁgôa, tsîn ge ǀgapi ǁāb di ǁaeguba xu gao-aob di ommi ǃnâ ge sī, tsîn ge gao-aoba gaosis di trons ai ge ǂnûi.

²¹Os ge ǃhūb di ǁaes hoasa ge ǃgâiaǂgao, tsî ǃās ge ge ǃnō, Ataliasan ge gôab ǀkha ǃgam ǃnubai.