Read Khoekhoegowab 2 Kroniks 24 Bible Online

2 Kroniks 24 - Khoekhoegowab bible

2 Kroniks 24

¹Joab ge hû kurixa ge i, gao-ao kaib ge ǃnubai, tsîb ge hakadisi kuriga gere gaosîsen Jerusalems tawa; tsî ǁîb îs di ǀons ge Sibja ge i, Bersebas disa.

²Tsî Joab ge ǃKhūb mûǁae a ǂhanuna gere dī, pristeri Jojadab di tsēdi hoadi kōse.

³Tsî Jojadab ge ǀgam tarara ǁîba ge ūba, tsîb ge ǀgôagu tsî ǀgôadi tsîna ge hō.

⁴Tsî i ge nēn khaoǃgâ ge ī, Joab ge ǂgaob âb ǃnâ ǃKhūb di ommab nî ǀasa kaisa ǂâibasensa.

⁵Nētib ge pristergu tsî Leviǁîgu tsîna ǀhaoǀhao tsî ǁîgu ǃoa ge mî: ǃGûǂoa go Judab di ǃādi ǃoa, î go Israeli hoab tawa marina ǀhaoǀhao, ommi sadu Elob dib nî ǀasa kaihega, kuriba xu kuriba ǃoa. Î go sago ǃhae nē ǃkhais ǀkha. Xawe gu ge Leviǁîga ǃhae tama ge i.

⁶Ob ge gao-aoba Jojadab, ǂamsaba, ǂgai tsî ǁîb ǃoa ge mî: Tarexats kha satsa Leviǁîgu tawa ôaǃnâsa dī tama hâ, Judab tsî Jerusalemsa xu gu nî ūǂgāse ǁnā ǁguibas, Moseb, ǃKhūb ǃgāb dis tsî ǀhaohâb Israeli dib disa, tentoms ǀhûǀguitimîs dis ǃaroma?

⁷Atalias ge eloxoresase sîseno, o gu ge ǀgôagu âsa Elob omma ge ǂnauǃkhopa, tsî gu ge khaihesa xūn ǃKhūb ommi din hoana Baalga ge khaiba.

⁸Tsî gao-aob ge mîmāo, o gu ge ǂgae-e dī tsî ǁî-e ǁāb ǃKhūb ommi dib tawa ǃauga ge mâi.

⁹Tsîn ge Judab tsî Jerusalems tsîra ǃnâ ge ǂgaiǂui kai, ǃKhūb nî ǁnā ǁguibas Moseb, Elob ǃgāb dis, Israelab ǃgaroǃhūb ǃnâ ge mîmāsa ūǂgābahesa.

¹⁰ǃNubain ge ǂamsagu hoagu tsî ǁaes hoasa ǃgâiaǂgao tsî ǂgaesa ūǂgā tsî ǁîs ǃnâ ge aoǂgā ǀoas ges kōse.

¹¹Tsî i ge ge ī, ǂgaesab ge gao-aob di mîmās ai Leviǁîgu di ǃommi ǀkha ūǂgā tsî ǀoasa marin hâ ǃkhaisan ge mû, ob ge gao-aob di xoa-aoba ge hā, tsî ǀgapipristeri xa ǂnûihe hâb on, tsî kha ge ǂgaesa ge ǀkhaiǀkhaiǃnâ tsî ǁîsa ǃkhōkhâi tsî ǁîsa ǁkhawa mâs ra ǃkhais ǃoa ge ūsī. Nētin ge tsēsa xu tsēs ǃoa dī tsî kaise ǂgui marina ge ǀhaoǀhao.

¹²Tsî gao-aob tsî Jojadab tsîkha ge ǁîna ǁnāgu ǃKhūb ommi ǃoabas ai sîsenna ra dīga ge mā; o gu ge ǁhā-aogu tsî haikuru-aogu tsîna ge ǃgae, ǃKhūb di omma gu nî ǀasa kaise, tsî ǁkhāti ǂnūǀurib tsî ǂaisîsenaoga, ǃKhūb di omma gu nî dī-unuse.

¹³Nēti gu ge sîsenna ra sîsenaoga ge dī, ob ge dī-unus di sîsenna ǁîgu di ǃommi ǃnâ ge ǃhae. O gu ge Elob di omma aibekam īsib âb ǃnâ ge dī-unu tsî ǁîba ge ǁapoǁapo.

¹⁴Tsî dītoa gu ge, o gu ge gao-aob tsî Jojadab tsîkha aiǃâ ǃgau hâ mariba ge ūhā, ǁîba xu gu ge ǃKhūb di omma xapana kurubaba, xapan ǁîn ǀkha gu nî ǃoaba tsî ǁguibana, ǀanǀanǃoredi tsî ǃhuniǀuri tsî ǀhaiǀurisoan tsîna. O gu ge hugaǀgui Jojadab di tsēdi ǃnâ khauǁguibade ǃKhūb di ommi ǃnâ ge ǁguiba.

¹⁵Tsî Jojadab ge ge kairatoa, tsî ǀguikaidisi tsî ǃnonadisi kurixab ge, ob ge ge ǁō.

¹⁶Tsîn ge ǁîba ge ǁkhō Davib di ǃās ǃnâ gao-aogu tawa, ǁîb ge Israeli ǃnâ ǃgâise ge sîsen Elob tsî ǁîb di ommi tsîkha tawa.

¹⁷Xawe Jojadab ǁōb khaoǃgâ gu ge Judab gaosaga hā tsî gao-aob aiǃâ ge ǃhonǁgoa, ob ge gao-aoba ǁîga ge ǁnâu.

¹⁸Nētin ge ǃKhūb, ǁîn îgu Elob di omma ǁnāxū tsî haiǃgaodi tsî ǁgôa-elogu tsîna gere ǃoaba, ǃnubaib ge kai ǁaixasiba Judab tsî Jerusalems tsîra ǂama ge hā, nē ǀhapis ân ǃaroma.

¹⁹Ob ge ǁîba kēbo-aoga ǁîn ǁaegu ge sî, ǁîna gu nî ǃKhūb ǃoa ǁkhawa ǃhobasen kaise, ǁîgu ge ǁîn ǃoagu ge ǃkhō-am, xawen ge ǁnâu ǂgao tama ge i.

²⁰Tsî Gagab Elob dib ge Saxariab Jojadab ôab, pristeri, ǁaes ǂama mâba ge hāǂam, ob ge ǁîn ǃoa ge mî: Nētib ra Eloba mî: Tarexa du kha Elob di mîmāde ra ǃûǂam? ǁNā-amaga du ge ǃgâiǃgâ tide, ǃKhūba du ge ǁnāxū ǃkhais ǃaromab ge ǁîba sado nî ǁnāxū.

²¹Tsîn ge ǃgaeǀhao-e ge dī ǁîb ǃoagu tsîn ge ǁîba ge ǀuiǁhom gao-aob di mîmās ai, ǃKhūb ommi di ai-ommi ǃnâ.

²²Nētib ge gao-aob Joaba ǁnā ǃgâidīb, ǁîb îb Jojadab ge ǁîba dīb xa ǂâi tama i tsî ǁîb ôaba ge ǃgam, ǁîb hîa ge ǁōb ge ǃnubai: ǃKhūb ge ǁî ǃkhaisa mû tsî nîra ôa, ti mîba.

²³O i ge kurib di ǀunis ai ge ī, Siriab di toroǂnubis ge ǁîb ǃoagu khâi ǃkhaisa, tsîb ge Judab tsî Jerusalems tsîra tawa hā tsî ǁaes ǃnâ ǁaes gaosagu hoaga ge hîkākā, tsîn ge ǁkhâuǁnâs ân hoana Damaskus gao-aob tawa ge ūsī.

²⁴Toroǂnubis Siriab dis ge ǀoro khoerogu ǀkha hā, xaweb ge ǃKhūba ama kai ǂguib di toroǂnubisa ǁîgu ǃomǁae ge mā, ǃKhūb, ǁîn îgu Eloban ge ǁnāxū amaga. Nēti gu ge ǁîga ǀgoraǃgâde Joab ai ge sîsenǂui.

²⁵Tsî ǁîba xu gu ge ǃgûbēo, kai ǀaesenni ǃnâ gu ge ǁîba ǁnāxū xui-ao, o gu ge ǃgāgu âba pristeri Jojadab ôagu di ǀaob ǂama ǃgaeǀhao-e ǁîb ǃoagu dī tsî ǁîba kharob âb ai ge ǃgam, ob ge ge ǁō. Tsîn ge ǁîba Davib di ǃās ǃnâ ge ǁkhō, xawen ge gao-aogu di ǀhobadi ǃnâ ǁkhō bi tama ge i.

²⁶Tsî nēkha ge ǁîkha, ǃgaeǀhao-e ǁîb ǃoagu ge dīkha: Sabadi, Simeats, Amonǁîs ôab, tsî Jehosabadi, Simrits, Moabǁîs ôab tsîkha.

²⁷Tsî ǁîb di ôagu xasa tsî kaisib, ǁnā ǃgommi ǁîb ge ǁguiǂamheb dib tsî Elob ommi di kurus xasa, ǁîn ge xoahe hâ ǃnaeǃkhaidi ǂkhanis gao-aogu dis ǃnâ. ǁÎb di ôab Amasiab ge ǁîb di ǃās ǃnâ ge gao-ao kai.