Read Khoekhoegowab 2 Kroniks 25 Bible Online

2 Kroniks 25 - Khoekhoegowab bible

2 Kroniks 25

¹Amasiab ge ǀgamdisikoroǀa kurixa ge i, gao-ao kaib ge ǃnubai, tsîb ge ǀgamdisikhoeseǀa kuriga Jerusalems tawa ge gaosîsen; tsî ǀons ǁîb îs dis ge Joadan ge i, Jerusalems disa.

²Tsîb ge ǁîba ǃKhūb mûǁae a ǂhanuna gere dī, xawe ǂgaob hoab ǀkha tama i tsî.

³Tsî i ge ge ī, gaosis ge ǃommi âb ǃnâ ǀgaio, ob ge ǁîb di ǃgāgu hîa gao-aob ǁîb di îba ge ǃgamga ge ǃgam.

⁴Xawe ǁîgu ôanab ge ǃgam tama ge i, ǂhanub Moseb dib di ǂkhanis ǃnâ xoahe hâ xase, ǃKhūb ra ǁîs ǃnâ mîmāsa: ǁGûgu ge ǀgôan amǃnâs ai ǃgamhe tide, tsî ǀgôan ge ǁgûgu amǃnâs ai ǃgamhe tide, xawe mâ-i hoa-i ge ǁî-i di ǁoreb ǂhanib ǃaroma nîra ǁō.

⁵Tsî Amasiab ge Judaba ge ǀhaoǀhao, tsîb ge ǁîga ǁgûgu di omgu ǃoa ǀoadisigu di danakhoese tsî kaidisigu di danakhoese ge mâi, Judab tsî Benjaminni tsîkha hoakha ǃnâ. Tsîb ge ǁîga ge ǃgôa ǀgamdisi kurigu â-iba xu ǁnās ǃgâ-ai a kaib kōse, tsîb ge ǁîga ǃnonakaidisiǀoadisi ǃkhōǂuihesagu ase ge hō, ǂnubis ǃoa ra ǂoaǃâ, tsî ǁhâigôab tsî ǃgupu khōsikhōba ra sîsenūga.

⁶ǁNās tawab ge Israela xu kaidisiǀoadisi ǃgari ǁē-aoga ge ǃgae ǀguikaidisi talendi ǀhaiǀurib ama.

⁷Xawe aob Elob dib ge ǁîb tawa hā tsî ge mî: Ti gao-aotse, as Israeli di ǂnubisa tā ǃgûsao tsi; ǃKhūb Israeli ǀkha hâ tama xuige, Efraimmi ôan hoan ǀkha.

⁸Xawe satsa ǃgû îts dī, îts ǀgai ǃkhammi ǃnâ, Elob ge nîra ǁnā kai tsi, khākhoeb aiǃâ; Elob ǃnâb ge ǀgaiba hâ, sats khoetsa hui tsî ǁnā kais diba xui-ao.

⁹Ob ge Amasiaba Elob aob ǃoa ge mî: Tsî tare-e nî dīhe ǁnā ǀguikaidisi talendi Israeli di ǂnubide ta ge mādi ǀkha? Ob ge Elob aoba: ǃKhūb ge nēn ǃgâ-ai ǂgui xūna a mā tsi ǁkhā, ti ge mî.

¹⁰ǃNubaib ge Amasiaba ǁîde ge khai ǁnā ǂnubidi, Efraimma xu ge ǁîb tawa hāde, ǁîn di ǃkhais ǃoan nî ǃgûga. ǁNā-amagab ge ǁaib âna kaise ge ǂhubi Judabǀî, tsîn ge ǁîn di ǃkhais ǃoa ǁkhawa ge oa, kai ǁgôasib ǀkha.

¹¹Tsî Amasiab ge ǀgaiǀgaisen tsî ǁaes âba ǂgaeǂguiǂoa tsî ge ǃgû ǂŌb di ǃgoaǃnāb ǁga, tsîb ge Seiri ôan xa disiǀoadisina ge ǂnau.

¹²ǁNās tawan ge Judab ôana disiǀoadisina ûitsamase ǃkhō tsî ǁîna ǃhaob di ǀgapib ai ūǃapa tsî ǁîna ǃhaob di ǂaoba xu ge ǂhāǁnâ, hoan ge ǂariǃās kōse.

¹³Xawe ǁnā aogu ǂnubidi digu, Amasiab ge oa kaigu, ǁîb ǀkha gu ǃkhammi ǁga ǃgû tidese, ǁîgu ge Judab di ǃādi ǃnâ ge ǁgūǂgâ, Samariasa xu Bet-Horons kōse. Tsî gu ge ǁîn xa ǃnonaǀoadisina ǂnau tsî kaise ǂgui ǁkhâuǁnâxūna ge ūǀhana.

¹⁴Tsî i ge ge ī Amasiab ge Edomǁîna ǂnausa xu hā tsî elogu Seiri ôan digab ge ūǀhao, ǃnubaib ge ǁîga elose ge ǂnûibasen tsî ǁîgu aiǃâ ǃhonǁgoa tsî ǁîga ge ǀanǀanba.

¹⁵ǃNubaib ge ǃKhūb di ǁaiba ge ǂhubi Amasiabǀî. Ob ge ǁîba kēbo-aoba ge sî, ǁîb ǃoa ge nēti mîba: Tare xū-i ǃaromats kha ǁnâi elogu ǁnā ǁaes diga ge ôabasen, ǁîgu di ǁaesa ge ǃomǁaeb âtsa xu ore ǁoa iga?

¹⁶Tsî i ge ge ī, ǁîb ǀkhab ra ǃhoa hîab ge ǁîb ǃoa ge mî: Satsa kha gao-aota di ǀapemā-aose ǂnûihe hâ? ǀÛ satsa! Tare xū-i ǃaromats kha ǁîn xa nî ǂnauhe? ǃNubaib ge kēbo-aoba ǀû tsî ge mî: Tita ge ra hōǃâ, Elob satsab nî hîǀhurusa ǂâibasen hâ ǃkhaisa, nēsa dī tsîts ti ǀapemāsa ǁnâuǀnam tama go i amaga.

¹⁷Tsî Amasiab, Judab gao-aob ge ǀapemāsen tsî ge sî Joab, Joahab ôab, Jehub ôab, Israeli gao-aob ǃoa tsî: Hā î khom aisa xu ais ǃoa ǀhao, ti ge mî.

¹⁸Ob ge Joab, Israeli gao-aoba Amasiab, Judab di gao-aob ǃoa sî tsî ge mî: ǀGames Libanonni ai hâs ge sederhais, Libanonni ai hâs ǃoa sî tsî: Sa ôasa ti ôaba tarase mā re! ti ge mî; xawe ǀgurun ǃaub din, Libanonni ai hân ge ǃgû-īkha tsî ǀgamesa ge dāǂkhū.

¹⁹Sats ra mî: Mû Edomǁîna ta go ǂnau, ǁnā-amagab ge ǂgaob âtsa go ǀgapiǀgapi, koasents nîga. Îts ǁnâi nēsi sa ommi ǃnâ hâ! Tarexats kha ǁnâi nē ǂkhabab ǃnâ nî habasen, ǁnāts nîga, sats tsî Judab din tsîdo?

²⁰Xawe Amasiab ge ǁnâu tama ge i, Eloba xu i ge hâ i xui-ao, ǁînab nî ǁîn ǃomǁae māse, Edomǁîn di elogan ge ôa xui-ao.

²¹Nētib ge Joab, Israeli gao-aoba ge ǃgû tsî ǁîb tsî Amasiab, di gao-aob tsîkha ge aisa xu ais ǃoa ge ǀhao Bet-Semes, Judab ǃnâ hâs tawa.

²²Tsî Judab ge Israeli di ais aiǃâ ge ǂnauhe, on ge ge ǃhū, mâ-i hoa-e ǁî-i di tentoms ǃoa.

²³Tsî Joab, Joahab ôab, Israeli gao-aob ge Amasiab, Judab gao-aob, Joab ôab, Ahasiab ôaba ge ǃkhō Bet-Semes tawa. Tsîb ge ǁîba Jerusalems tawa ūsī tsîb ge Jerusalems di ǂnubiǂgoab xa ge khôaǁnâ Efraimmi di ǁāba xu ǁhôas di ǁāb kōse, hakakaidisi ǂhâgu kōse.

²⁴ǁNās tawab ge ǃhuniǀurib tsî ǀhaiǀurib hoab tsî soadi, Elob ommi ǃnâ ge hōhedi hoade Obed-Edommi tawa tsî ǁuigu, gao-aob di ommi digu tsî ǃkhōsaben tsîna ū tsîb ge ǁkhawa Samariab ǃoa ge oa.

²⁵Tsî Amasiab, Joab ôab, Judab gao-aob ge Joab, Joahab ôab, Israeli gao-aob di ǁōb khaoǃgâ disikoroǀa kuriga ge ûi.

²⁶Tsî nau xūn, Amasiab di ǃnaeǃkhaidi din, ǂguron tsî ǀunigan ge ǂKhanis Judab tsî Israeli tsîkha gao-aogu dis ǃnâ xoahe hâ.

²⁷Tsî ǁnā ǁaeb, Amasiab ge ǁîb ai ǃKhūba xu ǁnāǁgôaba xun ge Jerusalems ǃnâ ǃgaeǀhao-e ǁîb ǃoagu ge dī; xawe ǁîb ge Laxis ǃoa ge ǁhâ. ǁGoasin ge ǁîba Laxis kōse sîǃgon tsî ǁîba ǁnāpa ge ǃgam.

²⁸Tsîn ge ǁîb ǁō hâ sorosa hān ai ūhā tsî ǁîb îgu tawa, Judab di ǃās ǃnâ ge ǁkhō bi.