Read Khoekhoegowab 2 Kroniks 26 Bible Online

2 Kroniks 26 - Khoekhoegowab bible

2 Kroniks 26

¹ǃNubais ge Judab di ǁaes hoasa Usiab, disiǃnaniǀa kurixa ge iba ū, tsî ǁîba ge gao-aodī, ǁîb îb Amasiab di ǃās ǃnâ.

²ǁÎb ge Elatsa ǂnubi tsî ǁîsa ǁkhawa Judab tawa ge ūhā, gao-aob ge ǁîb di îgu tawa ǁkhōhes khaoǃgâ.

³Disiǃnaniǀa kurixab ge Usiaba ge i, gao-ao kaib ge ǃnubai, tsîb ge korodisiǀgamǀa kuriga ge gaosîsen Jerusalems tawa. Tsî ǁîb îs di ǀons ge Jexolia ge i, Jerusalems disa.

⁴Tsîb ge ǃKhūb mûǁae a ǂhanuna gere dī, ǁîb îb Amasiab gere dīn hoan ǁkhān khami.

⁵ǁÎb ge Eloba ôa xui-ao Saxariab, Elob aiǃâ ǁnâuǃāxa ge ib di tsēdi ǃnâ. ǁNā tsēdi, ǁîdi aib ge ǃKhūba ôadi ǃnâb ge Eloba ǁîba ge ǃgâiǃgâ kai.

⁶ǃGûǂoa tsîb ge Filisteǁîna ǃkhamū tsî Gats ǂnubiǂgoaba ge khôaǁnâ tsî Jabnes ǂnubiǂgoaba tsî Asdods ǂnubiǂgoaba, ǁnās tawab ge ǃāde ge ǂnubi Asdods di ǃhūb ǃnâ tsî Filisteǁîn ǁaegu.

⁷Tsî Elob ge ǁîba ge hui Filisteǁîn ǃoagu tsî Arabiaǁîn ǃoagu, Gur-Baals tawa ge ǁan hâ in tsî Meunǁîn ǃoagu.

⁸Tsî Amonǁîn ge Usiaba ǀkhaexūna gere mā, tsî ǀons âb ge Egipteb ǃnâts ra ǂgâs kōse ge sī, kaiseb ge ǀgai xui-ao.

⁹ǁNās tawab ge Usiaba ǂgō-omga ge ǂnubi Jerusalems ǃnâ ǁHôaǁāb tawa tsî ǃGoaǃnāǁāb tawa tsî ǁHôaxaǁāb tawa, tsîb ge ǁîga ge ǁapoǁapo.

¹⁰ǁÎb ge ǁkhāti ǂgō-omga ge ǂnubi ǃgaroǃhūb ǃnâ, tsîb ge ǂgui tsauga ge khao, ǂgui ǀgoanab ge ūhâ i xui-ao, ǃgoaǃnāgu ǃnâ tsî ǂgādi ai. ǁKhāti ǃhanasîsenaogu tsî ǂauxûiǂûǃhanasîsenaogu tsîna ǃhomgu ai tsî ǂûǂûsa ǃgarob ai, ǃhanasîsennab ge ǀnam i xui-ao.

¹¹ǃAruǀîb ge Usiaba toroǂguiba ge ūhâ i, toroba a ǁkhā khoegu, ǂnubise toroǂnubis ǁga ge ǂoagu, ǃgôakhâis âgu di ǀgaub ǃoa Jeieli, xoa-aob di omma xu tsî Maasejab, ǂamaoba xu, Hananjab, ǀguib gao-aob gaosagu dib di ǃommi ǃnâ.

¹²ǃGôab ǁgûgu di danagu dib, ǃgari ǁē-aogu dib ge ǀgamǀoadisi tsî ǃnanikaidisi ge i.

¹³Tsî ǁîgu di ǃomǁae i ge toroǂnubi-e ge hâ i ǃnonakaidisiǀoadisi tsî korokaidisigu kōse, toroba ǀgaib ǀkha ǁkhāǁkhāhe hâgu, gao-aoba gu nî khākhoeb ǃoagu huise.

¹⁴Tsî Usiab ge ǂnubis hoasa gere aiǂhomiba, khōsikhōgu tsî ǁhâigôagu tsî toroǀgapadi tsî ǁâsaran tsî khādi tsî jaboxūs di ǀuirodi tsîn kōse.

¹⁵Tsîb ge ǁkhāti Jerusalems tawa ǁāǁāǁkhāsa sîsenaiga gere dī, ǁāǁāǁkhāsa sîsenaogu xa ǂâiǂuihe hâga, ǂgō-omgu tsî ǁhôagu ai gu nî hâga, ǂāgu tsî kai ǀuidi ǀkha nî ǂnoase, nētis ge ǁîb di ǀonsa ǃnūse ge ǂoa, buruburuxaseb ǀgaib ges kōse ge huihe xui-ao.

¹⁶Tsî ǀgaib ge ǃnubaib ge ǂgaob âba ge ǀgapi, kāǁōs kōse, tsîb ge ge ǃûǂam ǃKhūb, ǁîb di Elob ǃoagu. ǃKhūb di tempeli ǃnâ ǂgâ tsîb ge ǀanǀanaltars ai ǀanǀan xui-ao.

¹⁷Xawe Asariab, pristeri, ge ǁîba ge ǃgûsao tsî ǃKhūb di pristerga ǁîb ǀkha, ǁkhaisadisi ǃgari-aogu tsîna.

¹⁸Tsî gu ge gao-aob Usiaba mâǃoa tsî ǁîb ǃoa ge mî: Anuba tsi tama hâ, Usiatse, ǃKhūba ǀanǀanbasa, xawe pristergu, Aronni ôagu, khaisen hâga i ge a anuba, ǀanǀanbasa. ǃGûǂoa ǃanusiba xu, sats ge go ǃûǂam tsîts ge ǁî ǃkhaisa ǃgôasise ūbahe tide, ǃKhūb sa Elob xa.

¹⁹ǃNubaib ge Usiaba ge ǁaixa, ǀanǀanxūn ǃomǁaeb âb ǃnâ hâ hîa, ǀanǀan ib nîse. Tsî pristergu ǂamab ra ǁaixa hîas ge ǃomamasisa ǃūs âb ai ge ǁhai pristergu di ais aiǃâ, ǃKhūb di ommi ǃnâ, ǀanǀanaltars ǂamǃnâba xu.

²⁰Ob ge ǂampristeri Asariaba ǁîba ge kō tsî nau pristergu hoagu tsî mû, ǁîb ge a ǃomamaxa danas âb ai; o gu ge ǁîba ǁnāpa xu ǃnoesase ge ǂhāǂui, ā, ǁîb ǂûb ge ǁkhāti ge ǃhaeǃhaesen, ǂoab nîse, ǃKhūb xab ra ǁnorahe amaga.

²¹Nētib ge gao-aob Usiaba ge ǃomamaxa ǁōb âb di tsēs kōse. Tsî ǃomamaxab a amagab ge ǀguri hâ oms ǃnâ ge ǁan, ǃKhūb di omma xub ge ǃgaoǁnâhe hâ i xui-ao. Tsî Jotammi, ǁîb ôab ge gao-aob di ommi ǂama ge hâ i, ǃhūb di ǁaesa ra ǂhanuǂhanuse.

²²Tsî nau xūn Usiab di ǃnaeǃkhaidi din, ǂguron tsî ǀunigan tsînab ge kēbo-aob Jesajab, Amob ôaba ge xoamâi.

²³Tsî Usiab ge ge ǁō, tsîn ge ǁîba ǁîb îgu tawa ge ǁkhō, ǁkhōs di ǃkhais, gao-aogu di ge is ǃnâ, ǃomamaxab a, tin ge mî xui-ao. Tsî ǁîb ôab Jotammi ge ge gao-ao kai, ǁîb ǃās âb ǃnâ.