Read Khoekhoegowab 2 Kroniks 28 Bible Online

2 Kroniks 28 - Khoekhoegowab bible

2 Kroniks 28

¹ǀGamdisi kurixab ge Axasa ge i, gao-ao kaib ge ǃnubai, tsîb ge disiǃnaniǀa kuriga ge gaosîsen Jerusalems tawa; tsîb ge ǃKhūb mûǁae a ǂhanuna dī tama ge hâ i, ǁîb îb Davib khami.

²Tsîb ge daogu Israeli gao-aogu digu ǃnâ ge ǃgû; ǁnās tawab ge ǁkhāti ǂnâhesa īgu Baali diga gere kuru.

³Tsîb ge ǁkhāti Hinommi di ǃgoaǃnāb ǃnâ gere ǀanǀan, tsîb ge ǁîb ôaga ǀaes ǃnâ ge khau, ǀūben ǃKhūb ge Israeli ôan di ais aiǃâba xu, ūn hâna xu doeǁgaǂuin di ǁgaidīgu ǃoa.

⁴ǁÎb ge ǁkhāti ǀgapigu ai ǁguiba tsî gere ǀanǀan ǃnomdi ai tsî ǁkhāti ǃam haidi hoadi ǃgao.

⁵ǁNā-amagab ge ǃKhūb, ǁîn di Eloba ǁîba Siriab gao-aob ǃomǁae ge mā, ǁîban nî ǂnau, tsî ǃkhōsasen nî ǁîba xu kaise ǂgui ǃkhōsana ǂgaeǂguibēga, Damaskus tawan nî ūsīna. Tsî ǁîb ge ǁkhāti Israeli gao-aob ǃomǁae ge māhe kai ǂnaus ǀkha ǁîba ge ǂnauba.

⁶Pekab Remaliab ôab ge Judab ǃnâ ǀguikaidisiǀgamdisiǀoadisiga ǀgui tsēs ǀguis ai ge ǃgam, hoatsama ǃkham ǁkhā aogu ǀguiga, ǃKhūb ǁîgu îgu di Eloba gu ge ǁnāxū amaga.

⁷Tsî Sixrib ǃgari-aob Efraimmi dib ge Maasejab, gao-aob ôaba ge ǃgam, tsî Asrikammi, ommi ǂamsab, tsî Elkanab, gao-aob khaoǃgâ ǀgamǁî ge ib tsîkha.

⁸Tsî Israeli ôan ge ǃgâsan ân xa ǃkhōsase ge ūǃgûhe ǀgamkaidisiǀoadisi taradi, ǀgôagu tsî ǀgôadi tsîna, tsîn ge ǁkhāti ǂgui ǁkhâuǁnâxūna ǁîna ge ūǀhana. Tsîn ge ǁkhâuǁnâsa Samarias digu tawa ge ūsī.

⁹Tsî ǁnāpab ge kēbo-aob ǃKhūb diba ge hâ i, Oded ti ǀon hâba; ǁîb ge ge ǂoa ǂnubis, Samarias tawa ge hās ǃoa tsî ǁîn ǃoa ge mî: Mû, ǁgôasib ǃKhūb, sadu îgu Elob dib, Judab ǂama hâb diba xus ge, sadu ǃomǁaeb ge ǁîna māsa tsî sadu ge ǁîna ǁaib, ǀhommi kōse ra sīb ǀkha ǃgamsa.

¹⁰Tsî nēsi du ge Judab tsî Jerusalems tsîra ôana sadu di aore khobose tsî tarare khobose ǃgamǃgambasen ǂgao hâ. Sadu ǀguido kha ǁî tama hâ, ǃKhūb, sadu Elob tawa a ǀhapixado?

¹¹ǁNâi tita ǃgâ î du ǁnā ǃkhōsan, sadu ǃgâsana xu du ge ǃkhōsase ǂgaeǂguibēna ǁkhawa ūhā, ǀgamsib ǃKhūb di ǁaib dib sadu ai hâ xuige.

¹²ǃNubai gu ge aogu Efraimmi ôan danagu diga ge khâi, Asariab, Johananni ôab, Berexjab, Mesilemoti ôab tsî Jehiskiab, Salummi ôab tsî Amasab, Hadlaib ôab tsîga tsî ǁnāgu ǂnubisa xu ra hāga ge ǃoa.

¹³Tsî gu ge ǁîgu ǃoa ge mî: Tā nē ǃkhōsana nēpa ūǂgâxa, ǀnai da ǃKhūb aiǃâ a ǀhapixa hîa; dīǀāro ǂgao du hâ sada di ǁoren tsî sada di ǀhapidi tawa, kaise da a ǀhapixa tsî ǀgamsib ǁaib dib, Israeli ǂama hâ hîa?

¹⁴ǃNubais ge ǁāǁāsen hâ ǂnubisa ǃkhōsan tsî ǁkhâuǁnâxūn tsîna ǂamsagu ǀhaohâb hoab digu di ais aiǃâ ge ǁnāxū.

¹⁵Tsî ǁnā aogu ǀondi ǀkha ge ǂgaihegu ge khâi tsî ǃkhōsana ū tsî ǀōǀkhā hân ân hoana ǁkhâuǁnâxūn ǀkha ge ana tsî gu ge ǁîna ǁharona ǂgaeǂgā, ǂûmā, āsi, ǂkhauǀkhā, ǂkhabusan hoana eselgu ai ǂnûi tsî ǁîna Jerixos palmhaiǃās ǃoa ǁîn ǃgâsan tawa ge ūsī. ǁNās khaoǃgâ gu ge ǁkhawa Samarias ǃoa ge oa.

¹⁶ǁNā ǁaeb ǁkhāb aib ge gao-aob Axasa Asiriab gao-aogu ǃoa ge sî, î gu hui biga.

¹⁷ǁNās tawan ge Edomǁîn ona hā tsî Judaba ǂnau tsî ǃkhōsana ge ǂgaeǂguibē.

¹⁸ǁNās xōǀkhān ge Filisteǁîna ǂgās di ǃādi ǃnâ ge ǁgūǂgâ, tsî Judab di ǃkhawagasǀî, tsîn ge Bet-Semes, Ajalons, Gederots tsî Soxos tsîde ge ū tsî ǁîdi ǃnaga hâ ǃādi tsî Timnas tsî ǁîs ǃnaga hâ ǃādi tsî Gimsos tsî ǁîs ǃnaga hâ ǃāde, tsîn ge ǁnāpa ge ǁan.

¹⁹ǃKhūb ge Judaba ge ǃgamǃgam xui-ao, Axasi, Judab di gao-aob ǃaroma, ǁîb ge Judaba ǂgaeǁnâ xui-ao, kaisen ge ǃKhūb ǃoagu ǃûǂams kōse.

²⁰Ob ge Tiglat-Pileseri, Asiriab gao-aoba ǁîb ǃoa ge hā, tsîb ge ǁîba ge ǂōǂō tsî ǀgaiǀgai bi tama ge i.

²¹Axasi ge ǃâs ǃKhūb ommi din dis tsî gao-aob tsî gaosagu din disa ū tsî ǁîsa Asiriab di gao-aoba ge mā, xaweb ge hui bi tama ge i.

²²Ā, ǂōǂōheb ge ǃnubaib ge ǃaruǀîǀgui ǃKhūb ǃoagu ge ǃûǂam, ǁîb, ǁnā gao-aob Axasa.

²³Damaskus di elogu ǁîba ge ǂnaugab ge ǁguiba tsî: Siriab gao-aogu di elogu ge ǁîga ra hui amaga ta ge ǁîga nî ǁguiba, î gu tita ona hui, ti mî xui-ao. Xawe gu ge ǁîb tsî Israeli hoaba ǁnās ase ge ība.

²⁴Tsî Axasi ge xapan Elob ommi dina ge ǀhaoǀhao, tsîb ge xapan Elob ommi dina ǁhāǂkhūǂkhū tsî dao-amdi ǃKhūb ommi dide ge ǂganam. Tsîb ge altarde ge kurubasen ǁhôadi hoadi ǃnâ Jerusalems tawa.

²⁵Tsîb ge ǁkhāti mâ ǃās Judab dis hoas ǃnâ ǀgapiga ge kuru, ǀkhara elogab nî ǀanǀanbaga, nētib ge ǃKhūb, ǁîb îgu di Eloba ǁaib kōse ge ǂoeǂoe.

²⁶Tsî nau xūn ǁîb di ǃnaeǃkhaidi din tsî ǁîb di daogu hoagu din, ǂguron tsî ǀunigan tsîn, mû, ǁîn ge xoahe hâ ǂkhanis Judab tsî Israeli tsîkha di gao-aogu dis ǃnâ.

²⁷Tsî Axasi ge ǁîb îgu khami ge ǁō, tsîn ge ǁîba ǃās Jerusalems tawa ge ǁkhō. Xawen ge ǁîba ǀhobadi Israeli gao-aogu didi ǃnâ ūsī tama ge i. Tsî ǁîb ôab Hiskiab ge ǁîb di ǃās ǃnâ ge gao-ao kai.