Read Khoekhoegowab 2 Kroniks 29 Bible Online

2 Kroniks 29 - Khoekhoegowab bible

2 Kroniks 29

¹Hiskiab ge ǀgamdisikoroǀa kurixab a hîa ge gao-ao kai, tsîb ge ǀgamdisikhoeseǀa kuriga ge gaosîsen Jerusalems tawa. Tsî ǁîb îs di ǀons ge Abia ge i, Saxariab ôasa.

²Tsîb ge ǁîba ǃKhūb mûǁae a ǂhanuna gere dī, ǁîb di îb Davib ge dīn hoan ǃoa.

³ǁÎb ge ǂguro kurib ǁîb di gaosis dib ǃnâ, ǂguro ǁkhâb ǃnâ ǃKhūb tempeli di ǁāga ǁkhowa-am tsî ǁîga ge dī-unu.

⁴Tsîb ge pristergu tsî Leviǁîgu tsîga ūǂgâxa tsî ǁîga aiǂoasǀî hâ ǃkhais tawa ge ǀhaoǀhao.

⁵Tsîb ge ǁîgu ǃoa ge mî: ǃGâ te, Leviǁîgo, î go ǃanuǃanusen, î go ommi ǃKhūb, sago îgu di Elob diba ǃanuǃanu, î go ǀurisasiba sîsenbē ǃanusiba xu.

⁶Sada di îgu ge ge ǃûǂam xuige, tsî gu ge ǃKhūb, sada Elob mûǁae a ǂkhabana dī tsî ge ǁnāxū bi, tsî gu ge aidi âga ǃKhūb di tabernakela xu ǁkhaebē tsî ge ǃkhomǃnoro.

⁷Tsî gu ge ǁkhāti ǁāgu ai-ommi diga ge ǂganam tsî ǃamamǀaede ge ǀari tsî ǀanǀanxūna ǀanǀan tama ge i, tsî khauǁguibasan ge ǃanusib ǃnâ Elob Israeli diba ǁguiba tama ge i.

⁸ǁNā-amaga i ge kai ǁai-e ǃKhūba xu Judab tsî Jerusalems ǂama ge hā, tsî ǁîb ge ǁîna ge māǁnâ ǀâxarexūse tsî ǂnuniǀîxūse, sadu di mûdi ǀkha du ra mû xase.

⁹Tsî mû, sada îgu ge gôab ǃnâ ge ǁnā, tsî sada ôagu tsî sada ôadi tsî sada d taradi tsîn ge ǁî ǃkhais ǃaroma ǃkhō-oms ǃnâ ge hâ i.

¹⁰O ta ge tita ti ǂgaob ǃnâ ǂâibasen hâ, ǃKhūb, Israeli di Elob ǀkha ta nî ǃgaeǀhao-e dī ǃkhaisa, îb ǀgamsib ǁîb di ǁaib diba sada xu unubē, ti.

¹¹Ti ôago, ǁnâi tā ǁgarasa, ǃKhūb ge sago ǁhûiǂuibasen hâ, ais âb aiǃâ mâ tsî go nî ǁîba ǃoabase, tsî ǁîba go nî ǃoaba-ao tsî ǀanǀanaose ībase.

¹²ǃNubai gu ge Leviǁîgu xa Mahati, Amasaib ôab, tsî Joeli, Asariab ôab tsî Kehati ôagu tsîga ge khâi; tsî Merarib ôagu xa Kisi Abdib ôab, tsî Asariab, Jehaleleli ôab tsîkha; tsî Gersonǁîgu xa Joab, Simeab ôab, tsî Edenni, Joab ôab tsîkha;

¹³tsî Elisafanni ôagu xa, Simrib tsî Jeueli tsîkha; tsî Asafi ôagu xa, Saxariab tsî Matanjab tsîkha;

¹⁴tsî Hemanni ôagu xa, Jehueli tsî Simeib tsîkha; tsî Jedutunni ôagu xa, Semajab tsî Usieli tsîkha.

¹⁵Tsî gu ge ǃgâsagu âga ǀhaoǀhao tsî ge ǃanuǃanusen, tsî gu ge gao-aob mîs ai ge ǂgâ ǃKhūb di mîsa xu, ǃKhūb di omma gu nî ǃanuǃanuga.

¹⁶O gu ge pristerga ǃKhūb di ommi ǃnâ ge ǂgâ, ǁîba gu nî ǃanuǃanuse, tsî gu ge ǃKhūb ommi di ai-ommi ǃoa ǀurisasib, ǃKhūb di tempeli ǃnâ gu ge hōb hoaba ge ūǂoa. Tsî Leviǁîgu ge ǁîba ge ūkhâi, ǃauga gu nî ūǂoa bise, ǃārob Kidronni ǃnâ.

¹⁷Tsî gu ge ǂguro tsēs ǂguro ǁkhâb dis ai ge ǃanuǃanutsoatsoa, tsî ǁkhaisaǁî tsēs ǁkhâb dis ai gu ge ǃKhūb ommi di ai-ommi ǃnâ ge sī tsî ǁkhaisa tsēdi ǃnâ ǃKhūb di omma ge ǃanuǃanu. Tsî disiǃnaniǀaǁî tsēs ǂguro ǁkhâb dis ai gu ge ge dītoa.

¹⁸ǁNās khaoǃgâ gu ge gao-aob Hiskiab tawa sī ǂgâ tsî ge mî: Sige ge ǃKhūb di ommi hoaragaba go ǃanuǃanu tsî khauǁguibas di altarsa sîsenūxūn âs hoan ǀkha tsî ǁāǁās di tāba sîsenūxūn âb hoan ǀkha.

¹⁹ǁKhāti ǁnā sîsenūdan, gao-aob Axasi ge ǁîb ra gaosîsen hîa ǃûǂams âb ǃnâ aoxūna ge ge ǁāǁā tsî ge ǃanuǃanu. Tsî mû, ǁîn ge ǃKhūb di altars aiǃâ hâ.

²⁰ǁGoasib ge gao-aob Hiskiaba ǃnauǁgoaga khâi tsî ǃās di ǂamsaga ge ǀhaoǀhao, tsîb ge ǃKhūb di ommi ǃoa ge ǃgû.

²¹Tsî gu ge hû ǁgōgu tsî hû bairagu tsî hû ǁkhaogu tsî pirigu tsîna gaosis tsî ǃanusib tsî Judab ona ǁoreǁguibase ge ūhāba. Tsîb ge Aronni ôagu, pristerga ge mîba, ǁîna gu nî ǃKhūb di altars ai ǁguiba ǃkhaisa.

²²O gu ge gomana ge ǂā, tsî pristergu ge ǀaoba ū tsî altars ai ge ǀgapi; tsî gu ge bairagu ona ǂā tsî ǀaoba altars ai ge ǀgapi; ǁnās ǁkhās xase gu ge ǁkhaoga ǂā tsî ǀaoba altars ai ge ǀgapi.

²³ǁNās khaoǃgâ gu ge piriga ǁoreǁguibase ge ūhā gao-aob tsî ǀhaohâb tsîkha di ais aiǃâ, tsî gu ge ǃomgu âga ǁîgu ai ge ǁgui.

²⁴Tsî pristergu ge ǁîga ǂā tsî ǁîgu di ǀaoba altars ai ge dī, ǁoreo kaihes ǃoa, ǂkhîbagusa gu nî Israeli hoaba dībaga; gao-aob ge mîmā xui-ao, khauǁguibas tsî ǁoreǁguibas tsîra nî Israeli hoaba ǁguibahega.

²⁵Tsîb ge Leviǁîga ǃKhūb di ommi ǃnâ ge mâi simbaln ǀkha tsî luitn tsî harpdi tsîn ǀkha, mîmās Davib dis ǃoa tsî Gadi, gao-aob di mû-aob dis ǃoa tsî Natanni, kēbo-aob, dis ǃoa; nē mîmās ge ǃKhūb di ǃommi ǀkha ge hā kēbo-aogu âb di ǃomma xu.

²⁶Tsî Leviǁîgu ge ǀkhōxūn Davib din ǀkha ge mâ i tsî pristerga ǀgapadadi ǀkha.

²⁷Tsî Hiskiab ge ge mîmā, khauǁguibas altars ai nî ǁguibahe ǃkhaisa. Tsî khauǁguibas ge tsoatsoa ǃnubais ge ǃKhūb di ǁnaetsanasa ge tsoatsoa ǀgapadadi ǀkha tsî Davib, Israeli gao-aob di ǀkhōxūn ǀkha.

²⁸Ob ge ǀhaohâb hoaba ge ǃhonǁgoa, ǁnaetsanas ra ǁnaehe tsî ǀgapadadi ra xâihe hîa. Tsî nēn hoan ge ge ī, khauǁguibas ge dītoahes kōse.

²⁹Tsî ǁguibatoan ge ǃnubain ge gao-aob tsî ǁîb ǀkha ra hōhen hoana ǃgamǃgâ tsî ge ǃhonǁgoa.

³⁰ǁNās khaoǃgâb ge gao-aob Hiskiab tsî ǂamsagu tsîna Leviǁîga ge mîba, ǃKhūba gu nî ǃkhōǀkhā ǃkhaisa, Davib tsî Asafi, mû-aob, tsîkha di mîdi ǀkha. O gu ge dâb ǀkha ǃkhōǀkhā tsî ǃgamǃgâ tsî ge ǃhonǁgoa.

³¹Ob ge Hiskiaba ǃeream tsî ge mî: Nēsi go ge sago di ǃomga ǃKhūba go ǀoaǀoaba, xuige dāhā î go ǂāǁguibadi tsî koaǁguibadi tsîna ǃKhūb di omma ūhāba. Ob ge ǀhaohâba ǂāǁguibadi tsî koaǁguibadi tsîde ge ūhāba tsî māsenxa ǂgaob â-ib hoaba khauǁguibade.

³²Tsî ǃgôab khauǁguibadi, ǀhaohâb ge ūhādi dib ge hûdisi gomagu, ǀguikaidisi bairagu tsî ǀgamkaidisi ǁkhaogu kō ge i; nēn hoan ge ǃKhūba khauǁguibase ge ība.

³³Tsî ǀnî khaihesa xūn ge ǃnanikaidisi goman tsî ǃnonaǀoadisi gūn kō ge i.

³⁴Xawe pristergu ge ǀoro ge i, tsî gu ge khauǁguibadi hoade ge ǂāǁnâǀkhā ǁoa i; ǁnā-amaga gu ge ǁîgu ǃgâsagu, Leviǁîga ge hui gu, sîsenni ge toa tsî nau pristergu ge khaisens kōse. Leviǁîgu ge pristergu ǃgâ-ai ǂhauǃnâ ge i xui-ao, ǃanuǃanusen gu nîse.

³⁵Tsî khauǁguibadi on ge ǂgui ge i, ganganǁguibadi di kaub ǀkha tsî ǂnâǁguibadi, khauǁguibade anuba hâde. Nētis ge ǃoabas ǃKhūb di ommi disa ge dī-unuhe.

³⁶Tsî Hiskiab tsî ǁaes hoas tsîn ge ge ǃgâiaǂgao, ǁnān Elob ge ǁaesa ǁāǁāban ǂama, nē ǃkhais ge ǃnoesase ī xui-ao.