Read Khoekhoegowab 2 Kroniks 3 Bible Online

2 Kroniks 3 - Khoekhoegowab bible

2 Kroniks 3

¹Tsî Salomob ge ǃKhūb di omma ge ǂnubitsoatsoa Jerusalems tawa ǃhommi Moriab, ǁîb di îb Davib ge ǁgauheb ai, ǁnā ǃkhais, Davib ge aiǂhomis tawa, dāǃnâǃkhais Araunab Jebusǁîb dis ai.

²Tsîb ge ge ǂnubitsoatsoa, ǀgamǁî ǁkhâb ǃnâ, ǀgamǁî tsēs ai hakaǁî kurib ǁîb di gaosis dib ǃnâ.

³Tsî nēdi ge ǃgaoǃgaodi Salomob dide, Elob di ommab nî ǂnubise: Gaxub ǂhâgu ǃnâ ǂguro ǀguiros ǃoa, ǁîb ge ǃnanidisi ǂhâgu kō ge i, tsî ǂhababa ǀgamdisi ǂhâgu kō.

⁴Tsî ai-ommi ǁnā ommi tempeli dib aiǃâ hâb ge ǀgamdisi ǂhâgu kōse gaxu ge i, ǂhabasib ommi dib ǃoa, tsî ǀgapiba ǀguikaidisi tsî ǀgamdisis kōse, tsîb ge ǁîba ǃnāb ǃnâ ǃūmû ǃhuniǀurib ǀkha ge ǃkhû.

⁵Tsî ommi kaibab ge denehain ǀkha ge ǃgū-ai, ǁnās khaoǃgâb ge ǁîba ǃgâi ǃhuniǀurib ǀkha ge ǃkhû, tsîb ge ǁîb ai palmhain tsî kheden tsîna ge dī.

⁶Tsîb ge ǁkhāti omma ǃgomǀgausa ǀuidi ǀkha ge ǃkhû anans xase, tsî ǃhuniǀurib ge Parvajims di ge i.

⁷ǁNās tawab ge ommi di ǃnaogu, dā-aihaidi tsî ǂnubiǂgoagu tsî ǁāgu âba ǃhuniǀurib ǀkha ge ǃkhû, tsîb ge xeruga ge xoaǂgā ǂnubiǂgoagu tawa.

⁸ǃAruǀîb ge oms ǃanun di ǃanub dis di gaxuba ommi di ǂhabasib ǀkha ǀguitikōse ge dī ǀgamdisi ǂhâgu kōse tsî ǂhabasib âba ǀgamdisi ǂhâgu kōse, tsîb ge ǁîsa ǃgâi ǃhuniǀurib ǀkha ge ǃkhû, ǃnanikaidisi talendi kōse.

⁹Tsî ǃgommi ǀurigu dib ge korodisi sekeln kō ge i ǃhuniǀurib xa, tsîb ge ǂamomde ǃhuniǀurib ǀkha ge ǃkhû.

¹⁰Tsîb ge ǁkhāti oms ǃanun di ǃanub dis ǃnâ ǀgam xerukha ge dī, gaxub âkha ǀgamdisi ǂhâgu kō ge ikha, ǁhāǂuis di sîsenkha, tsîb ge ǁîkha ǃhuniǀurib ǀkha ge ǃkhûǀkhā.

¹¹ǁGabokha xerukha dikha xasa: ǁÎkha di gaxub ge ǀgamdisi ǂhâgu kō ge i: ǀGuib di ǁgabob ge koro ǂhâgu kō ge i, ommi di ǂnubiǂgoab kōse ra sīǃâ, tsî nau ǁgabob ge koro ǂhâgu kō ge i, nau xerub di ǁgabob kōse ra sīǃâ.

¹²ǁNās ǁkhās xaseb ge nau xerub di ǁgaboba koro ǂhâgu kō ge i, ommi di ǂnubiǂgoab kōse ra sīǃâ; tsî nau ǁgabob ge koro ǂhâgu kō ge i, nau xerub di ǁgabob tawa ra tsâǀkhāǃâ.

¹³ǁGabogu nē xerukha digu ge ǀgamdisi ǂhâgu kōse ge ǃāǂuisen, tsî kha ge ǁîkha di ǂaira ai ge mâ i, tsî aira âkha ge omma ge ǃoa hâ i.

¹⁴Tsîb ge ǁkhāti ǂgamâisaba ge dī ǀhommiǂhoab ǀkha, tsî purpuri ǀkha tsî karmeseinǀapab ǀkha tsî ǀuilineǃkhaib ǀkha, tsîb ge xeruga ǁîb ai ge dī.

¹⁵Tsîb ge ommi aiǃâ gorose ǀgam ǂkhâǃnâkha ge dī, ǃnonadisikoroǀa ǂhâgu kō ge ikha; tsî ǂkhâǀuidanab, danas âkha ai hâb ge koro ǂhâgu kō ge i.

¹⁶Tsîb ge ǁkhāti khedega ge dī ǃhoaǀîǃkhais ǃnâs khami, tsîb ge ǁîde ǂkhâǃnâkha di danara ai ge ǂnûi, ǁnās tawab ge ǀguikaidisi granatǂûna dī tsî ǁîna khedegu ai ge ǂnûi.

¹⁷Tsîb ge ǂkhâǃnâkha ai-ommi tempeli dib ǃnâ ge ǂnûikhâi, ǀguiba amǀkhāb ai tsî nauba ǁareǀkhāb ai tsîb ge ǀons amǀkhāb dib disa Jaxin, ti tsî ǀons ǁareǀkhāb dib disa Boas, ti ge ǂgai.