Read Khoekhoegowab 2 Kroniks 30 Bible Online

2 Kroniks 30 - Khoekhoegowab bible

2 Kroniks 30

¹ǁNās khaoǃgâb ge Hiskiaba Israeli tsî Judab hoab ǃoa sî tsî ǂkhanide Efraimmi tsî Manaseb tsîkha ǃoa ge xoa, ǃKhūb di ommi ǃoan Jerusalems tawa nî hā, ti, ǃKhūb, Israeli di Eloban nî Pasxaba dībase.

²Gao-aob ge ǂamsagu âb tsî ǀhaohâb hoab ǀkha Jerusalems tawa ge ǀapeǀhao, Pasxaban nî ǀgamǁî ǁkhâb ǃnâ tsēdī ǃkhaisa.

³ǁÎban ge ǁnā ǁaeb ǁkhāb ai tsēdī ǁoa ge i, pristergu ge ǂâu hâse khaisen tama hâ i xui-ao, tsî ǁaes ge Jerusalems tawa ǀhao tama hâ i xui-ao.

⁴Tsî nē ǃkhais ge ǂhanu ge i gao-aob mûǁae tsî ǀhaohâb hoab mûǁae.

⁵On ge nē ǃkhaisa ge ǂnûiǁapo, Israeli hoab ǃnâ nî ǂgaiǂuihesa, Bersebasa xu Dans kōse, hā tsîn nî ǃKhūb, Israeli Eloba Pasxaba tsēdība ǃkhaisa Jerusalems tawa, ǂomxa ǁaeba xun ge ǁîba tsēdī tama ge hâ i, xoahe hâ khami.

⁶O gu ge ǃkhōǂuisa sîsabega ǂkhanidi, gao-aob tsî gaosagu di ǃomma xu ge ǀkhīdi ǀkha Israeli tsî Judab hoab ǃoa ge ǃgû gao-aob di mîs ǃoa, nēti a xoasade: Sadu Israeli ǀgôado, ǃhobasen ǃKhūb, Abrahammi, Isaki tsî Israeli tsîgu di Elob ǃoa, ob ge ǁîba nîra ǂnan ǁnān hîa du ge ǃgaubahen, Asiriab ǃomǁaeba xun ǃoa.

⁷Î du tā sadu îgu tsî sadu ǃgâsagu hîa ge ǁîgu di ǃKhūb, ǁîgu îgu di Elob ǃoagu ǃûǂamgu khami ī, ǁî ǃkhais ǃaromab ge ǁîga ǁkhāti ge hîǀhuru kai, sadu ra mûse.

⁸Tā karokaronǃao, sadu îgu khami; ǃKhūba ǃomma mā, î du ǁîb di ǃanusib, ǀamosib kōseb ge khaib tawa hā, î du ǃKhūb, sadu di Eloba ǃoaba, ob ge ǀgamsib ǁîb di ǁaib diba sado xu nîra oa.

⁹Sadu ga ǃKhūb ǃoa ǃhobaseno, on ge sadu ǃgâsan tsî sadu ôana ǀkhomxaǂgaosiba nîra hō, ǁnān ǁîna ge ǃkhōn aiǃâ, on ge nē ǃhūb ǃoa ǁkhawa nîra oahā, ǃKhūb sadu Elob ge a ǀkhomxa tsî ǀkhomxaǃnâ, tsîb ge ais âba sado xu unu tide, sadu ga ǁîb ǃoa ǃhobaseno.

¹⁰Nēti gu ge ǃkhōǂuisa sîsabega Efraimmi tsî Manaseb tsîkha di ǃāde ge ǃgûǃnâǃganu Sebulonni kōse, xawen ge ǁîga âiǂui tsî gere ǃhō.

¹¹Xawe ǀnîn Aseri, Manaseb tsî Sebulonni tsîgu din ge ǃgamǃgamsen tsî Jerusalems tawa ge hā.

¹²ǁKhātib ge Judaba ǃKhūb di ǃommi xa ge hāhe, ǀguiǂâixa ǂgaoba ǁîna ra māse, on ge gao-aob tsî gaosagu tsîn di mîmāsa ge dī ǃKhūb di mîsa ǃoa.

¹³Tsîs ge kai ǁaesa Jerusalems tawa ge ǀhao, ǀkhuruoǃnâ peregu di kaitsēsan nî ǀgamǁî ǁkhâb ǃnâ tsēdīse, ama kai ǀhaohâba.

¹⁴Tsîn ge khâi tsî altardi, Jerusalems tawa hâde ge ūbē, tsîn ge ǁkhāti ǀanǀanǃkhaidi hoade ūbē tsî ǁîde ǃārob Kidronni ǃnâ ge aoǂgā.

¹⁵ǃNubain ge Pasxaǁkhaoba ge ǂā, disihakaǀaǁî tsēs ǀgamǁî ǁkhâb dis ai. O gu ge pristergu tsî Leviǁîgu tsîga tao tsî khaisen tsî khauǁguibade ge ǁguiba ǃKhūb di ommi ǃnâ.

¹⁶Tsî gu ge ǁîgu di ǃkhais ai ge mâ i, ǁîgu di dommi ai, Moseb, eloǃaoǃgâxa aob di ǂhanub ǃoa. Tsî pristergu ge ǀaoba Leviǁîgu ǃomǁaeba xu ū tsî ge ǀgapi.

¹⁷Kai ǂguib ge ǁnā ǀhaohâb ǃnâ hâ i xui-ao, ǃanuǃanusen tamaba, ǁnā-amaga gu ge Leviǁîga Pasxaǁkhaoga ǁnān hîa ǃanu taman hoana ge ǂāba, ǁîna gu nî ǃKhūba khaibase.

¹⁸Kaise ǂgui khoen ǁaes din, ǂguin Efraimmi, Manaseb, Isaskari tsî Sebulonni tsîgu din ge ǃanuǃanusen tama tsî Pasxaba xoahe hâse ǂû tama ge hâ i. Xawe Hiskiab ge ǁîna ge ǀgoreba: ǃKhūb, hîa ǃgâiba ab ǀûbagusa dība mâ-i hoa-e ti,

¹⁹ǁnā-i ǂgaob â-e ǂnûi hâ-e Elob ǃKhūb, ǁî-i îgu di Eloba i nî ôa ti, ǃanub ǃanusib dib ǃoas ga i tama i xawe.

²⁰Ob ge ǃKhūba Hiskiaba ǁnâu-am tsî ǁaesa ge ǂgauǂgau.

²¹Nētin ge Israeli ôan, Jerusalems tawa ra hōhena ǀkhuruoǃnâ peregu di kaitsēsa hû tsēdi kōse ge tsēdī, kai ǃgâiaǂgaob ǀkha. Tsî Leviǁîgu tsî pristergu tsîn ge ǃKhūba tsēsa xu tsēs ǃoa ge ǃkhōǀkhā, ǃgarise ra ǀō ǀkhōxūn ǃKhūb din ǀkha.

²²Tsî Hiskiab ge Leviǁîgu hoagu, ǃgâi ǂans ǃKhūb dis ǃnâ a ǁnâuǃāxagu di ǂgaob ī khami ge ǃhoa. O gu ge ǂnûihesa kai ǁaeb di ǁguibade ge ǂû hû tsēdi kōse, ganganǁguibade ra ǁguibaǃâ tsî ǃKhūb, ǁîb îgu di Eloba ra koaǃâ.

²³Tsî ǀhaohâb hoab ge ǀapeǀhao-o ǀnî hû tsēden nî tsēdī ǃkhaisa, on ge ǁkhawa ǀnî hû tsēde ge tsēdī kai ǃgâiaǂgaob ǀkha.

²⁴Hiskiab, Judab di gao-aob ge ǀhaohâba ǀguiǀoadisi ǁgōgu tsî hûǀoadisi gūga ge mā, tsî gaosagu ge ǀhaohâba ǀguiǀoadisi ǁgōgu tsî disiǀoadisi gūga ge mā; nēti gu ge ǂgui pristerga ge khaisen.

²⁵Tsî ǀhaohâb Judab dib hoab ge ge ǃgâiaǂgao pristergu tsî Leviǁîgu tsîn ǀkha tsî ǁnā ǀhaohâb, Israela xu ge hāb ǀkha, ǁkhāti ǁnā ǃhaokhoen, Israeli ǃhūba xu hā tsî Judab ǃnâ ǁan hân ǀkha.

²⁶Nētib ge kai ǃgâiaǂgaoba ge hâ i Jerusalems tawa, Salomob, Davib ôab, Israeli gao-aob di tsēde xu i ge nēti ī xū-e Jerusalems tawa ī tama hâ i xui-ao.

²⁷ǃNubai gu ge Leviǁî pristerga khâi tsî ǁaesa ge ǀkhae, tsî dommi ân ge ge ǁnâuhe, ǁîn di ǀgores ge ǃanu ǁanǃkhais âb ǁga ǀhommi ǃnâ sī xui-ao.