Read Khoekhoegowab 2 Kroniks 31 Bible Online

2 Kroniks 31 - Khoekhoegowab bible

2 Kroniks 31

¹Tsî nēn hoanan ge dītoa ǃnubain ge Israelǁîn hîa ge hōhen hoana ge ǂoa Judab di ǃādi ǃnâ, tsîn ge ǂnûikhâihesa īga ge khôaǁnâ tsî ǀhomade ge ǁhāǁnâ tsî ǀgapigu tsî altardi tsîna Judab tsî Benjaminna xu tsî ǁkhāti Efraimmi tsî Manaseb tsîna xu ge aoǁgui, hoanan ge hîkākātoas kōse. ǁNās khaoǃgân ge Israeli ôan hoana ge oa, mâ-i hoa-e ǁî-i ūhân ǃoa ǁîn di ǃādi ǃnâ.

²Tsî Hiskiab ge pristergu tsî Leviǁîgu di ǀgorade ge ǂnûi ǁîgu di ǀgoradi ǃoa, mâb hoaba ǁîb di ǃoabas ǃoa, pristergu tsî Leviǁîgu tsîna khauǁguibadi tsî ganganǁguibadi tsîdi ǁga, ǃoaba nîse tsî ǃkhōǀkhā nîse tsî kare nîse ǃKhūb di ǂnubis di ǁāgu ǃnâ.

³ǁKhātib ge gao-aoba xūn âb xa ǁîb di amǃnâsa ge mā khauǁguibadi ǁga ǁgoaga tsî ǃuia, tsî sâtsēdi di khauǁguibade, tsî ǂkhamǁkhâgu didi tsî ǂnûihesa ǀgapi ǁaegu didi ǁga, ǂhanub ǃKhūb dib ǃnâ xoahe hâse.

⁴Tsîb ge ǁaes Jerusalems ǃnâ ǁan hâs ǁga ge mî, pristergu tsî Leviǁîgu tsîgan nî amǃnâ-e māsa, ǂhanub ǃKhūb dib ǃnân nî ǀgaiǀgaihese.

⁵Tsî ǁnā mîs ge ǀkhīo, on ge Israeli ôana ǂgui ǂgurosan ǃhorob din, ǂkhon ǂauxûib din, olib din tsî danib din tsî ǃhanaǂûn hoan dina ge ūhā, tsîn ge ǁkhāti hoan xa disiǁî ǃâsa ǀoasase gere ūhā.

⁶Tsî ǀgôan Israeli tsî Judab tsîkha din, Judab di ǃādi ǃnâ ǁan hân, ge ǁkhāti disiǁî ǃâdi goman tsî gūn dide ge ūhā, tsî disiǁî ǃâde ǁnā xūn ǃKhūb ǁîn di Eloba ge khaibahe hâ in xa, tsîn ge ǀoasa ǂguiga ge dī.

⁷ǃNonaǁî ǁkhâb ǃnân ge ǁnā ǂguiga ge dītsoatsoa, tsî hûǁî ǁkhâb ǃnân ge ge dītoa.

⁸Tsî Hiskiab tsî gaosagu tsîgu ge hā tsî ǁnā ǂguiga mûo, o gu ge ǃKhūb tsî ǁîb di ǁaes Israelsa ge ǀkhae.

⁹Tsî Hiskiab ge pristergu tsî Leviǁîgu tsîna ǁnā ǂguigu xa ge dîǃnâ.

¹⁰Ob ge Asariab, ǂampristeri, Sadoki ommi diba ǁîb ǃoa ge mî: Nē ǁguibas ge ǃKhūb di ommi ǃoa ūhātsoatsoahe ǁaeba xu ge ge ǂû tsî ge ǁâ tsî ǃnāǂamsase ge ǃgau, ǃKhūb ge ǁaes âba ǀkhae xui-aob ge nē ǂguiba ge ǃgau.

¹¹ǃNubaib ge Hiskiaba ge mî, ǃKhūb ommi di ǃnā-omdi nî ǂhomihe ǃkhaisa, on ge ǁîde ge ǂhomi.

¹²ǁÎdi ǃnân ge ǁnā ǁguibasa ge ūǂgā tsî disiǁî ǃâdi tsî khaihesa xūn tsîna îǂhôasib ǀkha. Tsî ǁîn ǂamab ge Konanjab, Leviǁîba, ǂamsa tsî Simib, ǁîb ǃgâsaba ǀgamǁî ge i.

¹³Tsî Jehieli, Asasiab, Nahati, Asaeli, Jerimoti, Josabadi, Elieli, Jismaxjab, Mahati tsî Benajab tsîgu ge mûǂam-ao ge i, Konanjab tsî Simib, ǃgâsab âb di ǃommi ǃnaga, gao-aob Hiskiab tsî Asariab, Elob ommi di ǂamkhoeb tsîkha di mîmās ai.

¹⁴Tsî Koreb, Jimnab ôab, Leviǁîb, aiǂoas ǀkhāb di ǁāb ǃûi-aob ge māsenxa hōdi Elob didi ǂama ge ǂnûihe hâ i, ǃKhūb di ǁguibas tsî hoan xa ǃanunab nî māǂuise.

¹⁵Tsî ǁîb xōǀkhā gu ge Edenni, Minjaminni, Jesuab, Semajab, Amariab tsî Sexanjab tsîga pristergu di ǃādi ǃnâ ge ǂnûihe hâ i, îǂhôasib ǀkha gu nî ǃgâsan âga ǁîn di ǀgoradi ǃnâ, ǂkharin kas kain kas hoasa māǂuise.

¹⁶ǁNāgu ǃhaos di ǃgôakhâiǂkhanis aorekhoegu dis ǃnâ ǃnona kurigu â-i tsî nēsa ǃnā hâga xu xoahe hâgu ǀguigu ose, ǁîgu ǃKhūb di ommi ǃnâ ge ǂgâgu hoaga, mâ tsēs hoas ai tsēkorobe sîsenna ra dīǃâ, ǃoabas âgu ǂama ǁîgu di ǃûidi ǃnâ ǁîgu di ǀgorade ǃoa.

¹⁷Tsî ǁnāgu pristergu, ǃhaos di ǃgôakhâiǂkhanis ǃnâ xoamâihe hâgu tsîn, ǁîgu îgu di omgu ǃoa tsî Leviǁîgu on ǀgamdisi kurigu â-iba tsî ǁnāsa ǃnā hâgu, ǁîgu di ǃûidi ǃnâ ǁîgu di ǀgorade ǃoa.

¹⁸Tsî ǃhaos ǃgôakhâis ǃnâ ǃgôahe hâgu on, ǁîgu ôaron hoan, ǁîgu taradi, ǁîgu ôagu tsî ǁîgu ôadi tsîn ǀkha ǀhaohâb hoab ǃnâ, ǁîgu di sîsenǃâs ǃnâ gu ge khaisen ǃanusib ǃnâ xui-ao.

¹⁹ǁKhāti gu ge Aronni ôagu ǃnâ ǁnā pristergu, hîa aiǃādi ǁîgu ǃādi didi di ǃaugu ai hâga ge hâ i mâ ǃās hoas ǃnâ, aogu, ǀondi ǀkha ge ǂgaihega, mâ aore khoeb hoab pristergu dib tsî ǁnāgu ǃhaos di ǃgôakhâiǂkhanis ǃnâ Leviǁîgu ǁaegu ǂnûihe hâgu hoaga gu amǃnâde nî māga.

²⁰Tsî nētib ge Hiskiaba Judab hoab ǃnâ ge dī, tsîb ge ǃKhūb, ǁîb Elob di ais aiǃâ a ǃgâi tsî ǂhanu tsî amana ge dī.

²¹Tsî mâ sîsenai-i Elob ommi di ǃoabas ǃnâ tsî ǂhanub ǃnâ tsî mîmās ǃnâb ge ǁîb di Elobab nî ôase dī-i hoa-eb ge ǁîb ǂgaob hoab ǀkha ge dī, ob ge ge ǃgâiǃgâ.