Read Khoekhoegowab 2 Kroniks 32 Bible Online

2 Kroniks 32 - Khoekhoegowab bible

2 Kroniks 32

¹Nē ǃnaeǃkhaidi tsî ǁîdi di ǁapoǁapos khaoǃgâb ge Sanherib, Asiriab di gao-aoba hā tsî Judab ǃnâ ǃgûǂgâ tsî ǁaposa ǃāde xāǂgā tsî ǁîde ge ūbasen ǂgao.

²Tsî Hiskiab ge mûo, Sanherib ra hā tsî Jerusalemsa hā ǃkhamū ǂgao ǃkhaisa,

³ob ge ǁîb di gaosagu tsî ǁîb di ǁē-aogu ǀkha ge ǀape, ǁgam-i ǀaudi, ǃās ǃauga hâdi di-e gu nî ǂganam ǃkhaisa, o gu ge ge hui bi.

⁴Os ge kai ǁaesa ǀhao tsî ǀaudi hoade ge ǂganam tsî ǃārob, ǃhūba ra dâuǃnâǃganub tsîna. Tarexa gu kha Asiriab di gao-aoga hā tsî ǀoasa ǁgam-e nî hō? ti ra mîse.

⁵ǁNā-amagab ge ǀgaiǀgaisen tsî ǁnā ǂnubiǂgoab hîa ge khôa hâ ib hoaba ge ǂnubi, tsîb ge ǁîba ǂgō-omgu kōse ǀnî ǂnubiǂgoab ǃauga mâb kōse ge ǂnubikhâi, tsîb ge Milob Davib di ǃās diba ge ǁapoǁapo, tsîb ge kaise ǂgui ǀāxūn tsî khōsikhōgu tsîna ge kuru.

⁶Tsîb ge toroǂamsaga ge mâi ǁaes ǂama, tsîb ge ǁîga ǁîb tawa ge ǀhaoǀhao ǃās di ǁāb tawa, tsîb ge ǁîgu di ǂgaob ǃoa ǃhoa tsî ge mî:

⁷ǀGai î go ǃgâiǂâi re, tā ǃao î go tā ǃhuri Asiriab gao-aob di ais aiǃâ tsî ais ǁnā ǂguib ǁîb ǀkha hâb hoab dis ǂama; sada ǀkha hân ge ǁîb ǀkha hân xa a ǂgui xuige.

⁸ǁÎb ǀkha i ge ǁgansi ǁôa-e hâ, xawe sada ǀkhab ge ǃKhūb, sada Eloba hâ, hui da tsîb nî torogu âda ǃkhamba dase. Tsî ǁaes ge mîdi Hiskiab, Judab gao-aob didi ai ge ǂgomaiǂnûi.

⁹ǁNās khaoǃgâb ge Sanherib, Asiriab di gao-aoba ǃgāgu âba Jerusalems ǁga ge sî, ǁîb ǂûb ganupe Laxis aiǃâ ǁgoe hîa tsî gaosis âb di toroǂguib, ǁîb ǀkha hâb hoaba, Hiskiab, Judab gao-aob ǃoa tsî Judab, Jerusalems tawa hâb hoab ǃoa, mî raǃâ:

¹⁰Nētib ra mî Sanherib, Asiriab gao-aoba: Mâ xū-i ai du kha ǂgomaiǂnûi hâ, o du Jerusalems tawa ǁaposa ǃkhais ǃnâ hâ?

¹¹Hiskia tamaba, ǁnāb sado ra ǂgaeǂhapuba, māǁnâ dub nîga, ǃâtsūǀkhāb tsî ǁgâs tsîra xa du nî ǁōga, mî rase: ǃKhūb sada Elob ge Asiriab gao-aob di ǃomǁaeba xu nî ore da?

¹²ǁNā Hiskia tamaba ǀgapigu âb tsî altardi âba ūbē tsî Judab tsî Jerusalems tsîra ǃoa ǃhoa tsî: ǀGui altars ǀguis aiǃâ du nî ǃhonǁgoa tsî ǁîs ai ǀanǀan, ti ge mîba?

¹³ǂAn tama du kha ǁnâi hâ, tare-e ge sige, tita tsî ti îgu tsîge ǃhūgu di ǁaedi hoade ge dī-ū ǃkhaisa? ǁNā ǃhūgu di ǁaedi eloga ti ǃomǁaeba xu ǁîde ore ǁkhā gu ge i?

¹⁴Elogu ǁnā ǁaedi ti îgu xa ǀâxarehe hâdi digu ǃnâ, tariba ǁnāb ǁîb di ǁaesa ti ǃomǁaeba xu ge ore ǁkhā iba, ob Elob sadu diba ti ǃomǁaeba xu nî ore du ǁkhā?

¹⁵Tāb Hiskiaba ǁnâi nēsi gā du, îb tā nē dommi ai ǂgaeǂhapu du î du tā ǂgom bi, elo-i mâ ǁae-i tsî mâ gaosi-i hoa-i di-i xare-i kas ge ǁî-i di ǁaesa ti ǃomǁaeb tsî ti îgu di ǃomǁaeba xu ge ore ǁoa i xuige. Matikōse ǁnās ǃgâ-aib kha sadu di Eloba ti ǃomǁaeba xu nî ore du ǁoa!

¹⁶ǁNās tawa gu ge ǁîb ǃgāga ǃaruǀî ǃKhūb Elob ǃoagu tsî ǃgāb âb Hiskiab ǃoagu ge ǃhoa.

¹⁷ǂKhanidi onab ge ge xoa, ǃKhūb Israeli di Elobab nî ǃhō tsî ǁîbab nî ǃhoaǃoase, mî raǃâ: Elogu ǁnā ǃhūgu di ǁaedi digu, ǁaedi âga ti ǃomǁaeba xu ge ore ǁoa igu khamib ge Hiskiab Eloba ǁaes âba ti ǃomǁaeba xu ore tide, ti.

¹⁸Tsî gu ge ǃgari dommi ǀkha Jodeǁîgowab ǃnâ ǁaes Jerusalems dis, ǂnubiǂgoab ai hâsǀî ge ǃhoa, î gu ǁîna ǃaoǃao tsî ǃhuriǃhuri ǃāsa gu nî ū ǁkhāse.

¹⁹Tsî gu ge Jerusalems di Elob xa ge ǃhoa, ǃhūbaib ǁaedi di elogu khoen ǃomgu di sîsenni xas ase.

²⁰Xawe gao-aob Hiskiab tsî Jesajab, kēbo-aob, Amob ôab tsîkha ge ǁî ǃkhais ǂama ǀgore tsî ǀhommi ǃoa ge ǂgai.

²¹Ob ge ǃKhūba ǀhomǃgāb, mâ ǃkham ǁkhā ǁē-aob hoab tsî gaosagu tsî ǂamsagu Asiriab gao-aob di toroǂnubis diga ge hîkākāba ge sî. Nētib ge taob ǁîb di ais dib ǀkha ǃhūb âb ǃoa ge oa, tsî ǁîb elob di ommi ǃnâb ge ǂgâ ǃnubai gu ge ǁnāgu soros âba xu ge ǀkhīga gôab âb ǀkha ge ǃgam bi.

²²Nētib ge ǃKhūba Hiskiab tsî Jerusalems di ǁansaben tsîna Sanherib, Asiriab gao-aob di ǃomǁaeba xu ge ore tsî hoan di ǃomǁaeba xu, tsî ǁîb ge ǁîna ge ǂgaeǂguiǂnamipe.

²³Tsî ǂguin ge ǃKhūba Jerusalems tawa ǀkhaexūna gere ūhāba tsî ǀgapiǃgôasa xūna Hiskiab, Judab gao-aoba, ǁnās khaoǃgâb ge ǀūben hoan mûǁae ǀgapiǀgapihes kōse.

²⁴ǁNā tsēdi ǁkhādi aib ge Hiskiaba ǁōb kōse ge ǀaesen, ob ge ǃKhūb ǃoa ge ǀgore. Ob ge ǁîba ǃeream tsî buruburuxa sao-e ge mā bi.

²⁵Xawe Hiskiab ge dīdawa-ams xaresa hî tama ge i ǁnā ǃgâidīs ǁîba ge hābas ǃoa, ǂgaob âb ge ǃguri amaga; ǁî ǃkhais xab ge kai ǁaiba ǁîb ǂama ge hā tsî Judab tsî Jerusalems tsîra ǂama.

²⁶Ob ge Hiskiaba ǁîb ǂgaob di ǀgapiǀgapisens ǃaroma ge ǃgamǃgamsen, ǁîb tsî Jerusalems di ǁansaben tsîna, ob ge ǁnā kai ǁaiba ǁîn ǂama Hiskiab di tsēdi ai hā tama ge i.

²⁷Tsî Hiskiab ge kaise ǃkhū tsî ǃgôasa ge i, tsîb ge ǀhaiǀurib tsî ǃhuniǀurib tsî ǃgomǀgausa ǀuidi tsî ǃgâihamxūn tsî khōsikhōn tsî sats khoets ra tura sîsenūxūn hoan ǃaroma ǁuisâu-omga ge kurubasen.

²⁸ǁKhātib ge ǁuisâu-omga ge kurubasen, ǃhorob tsî ǂkhonxûib tsî olib tsîn di ūǀkhīn ǃaroma; tsîb ge sâuǃkhaide ge kurubasen ǃkharagagu ǀgoan hoan ǃaroma tsî ǃharade gūn ǃaroma.

²⁹ǁNās tawab ge ǃāde ge kurubasen, goman tsî gūn tsîna ūhâse kaise ge ǂgui ina. Elob ge ǁîba kaise ǂgui xūna ge mā xui-ao.

³⁰ǁNā Hiskiab ǁkhāb ge ǁkhāti ǀgapise hâ dâuǂoas Gihons di ǁgamgu disa ǂganam tsî ǁîsa ge ǂgaeǁnâ kai Davib ǃās di huriǂoasǀî. Hiskiab ge sîsenni âb hoab ǃnâ ǃgâiǃgâ xui-ao.

³¹Tsî i ge nēti ge ī, gaosagu Babilons digu ge ǁîb ǃoa sîgu di sîsabegu ǁnā buruburuxa ǃkhais, ǃhūb ǃnâ ge īs xa gu nî dîga ganupe ǁnāpa hâ hîab ge Eloba ǁîba ge ǁnāxū tsî ge ǃâitsâ bi, ǂgaob âb ǃnâ hân hoanab nî ǂanse.

³²Tsî nau xūn Hiskiab di ǃnaeǃkhaidi din tsî ǁîb di ǃgâidīn tsîn, mû, ǁîn ge xoahe hâ ais kēbo-aob Jesajab, Amob ôab dis ǃnâ tsî ǂkhanis Judab tsî Israeli tsîkha gao-aogu dis ǃnâ.

³³Tsî Hiskiab ge ge ǁō, tsîn ge ǁîba ge ǁkhō Davib ôagu di ǀhobadi hoadi xa ǀgapis ǃnâ. ǁNās tawan ge Judab din hoan tsî Jerusalems ǁansaben tsîna ǃgôaba ge mā bi ǁōb âb ǃnâ. Tsî ǁîb ôab Manaseb ge ǁîb di ǃās ǃnâ ge gao-ao kai.