Read Khoekhoegowab 2 Kroniks 33 Bible Online

2 Kroniks 33 - Khoekhoegowab bible

2 Kroniks 33

¹Manaseb ge disiǀgamǀa kurixa ge i, gao-ao kaib ge ǃnubai, tsîb ge korodisikoroǀa kuriga Jerusalems tawa ge gaosîsen.

²Tsîb ge ǃKhūb mûǁae a ǂkhabana gere dī, ǁgaidīn ǁnā ǀūben ǃKhūb ge Israeli ôan di ais aiǃâ, ūn hâna xu doeǁgaxūn din ǃoa.

³ǁNā ǀgapigu ǁîb îb Hiskiab ge khôaǁnâgab ge ǁkhawa ǂnubikhâi, tsî Baalgab ge altarde ǂnûikhâiba tsî ǀhomade ge dība tsî ǀhommi di ǂnubis hoas aiǃâ ǃhonǁgoa tsî ǁîsa gere ǃoaba xui-ao.

⁴Tsîb ge ǃKhūb di ommi, ǁîb xab ge ǃKhūba: Jerusalems tawas ge ti ǀonsa ǀamosib kōse nî ǁan, ti mîb ǃnâ altarde ge ǂnubi.

⁵ǁNās tawab ge ǀhommi di ǂnubis hoasa altarde ge ǂnubiba, ǃKhūb ommi di ai-omkha hoakha ǃnâ.

⁶Tsîb ge ǀgôagu âba ǀaesa ge ǃgûǃganu kai Hinommi ôab di ǃgoaǃnāb, ǃnâ, tsîb ge ǀgaiǀgarusa ge dī, tsîb ge ani-ās ai ge ǃgaoǃgâ, tsîb ge ge ǃgaidī, tsîb ge aimûǀgaru-aon tsî ǁgâuaǁkhāǁkhāsaben tsîna ge mâi. ǁÎb ge ǂguin, ǃKhūb mûǁae a ǂkhabana gere dī, ǁîbab nî ǁaibǀî ǂoeǂoese.

⁷ǁÎb ge ǁkhāti īb ǃgaohe hâ ǁgôa-elob dib hîab ge kuruba Elob ommi ǃnâ ge mâi, ǁîb xab ge Eloba Davib ǃoa tsî ǁîb ôab Salomob ǃoa: Nē ommi ǃnâ tsî Jerusalems, Israeli ǃhaodi hoadi xa ta ge ǃkhōǂuibasens ǃnâ ta ge tita ti ǀonsa nîra ǂnûi ǀamosib kōse, ti mîba,

⁸tsî tita ge ǂais Israeli disa ǃaruǀî ǁnā ǃhūb sadu îga ta ge mîmâibaba xu ǂgō kai tide; nēs ǀguisa ǂan tsîn ga dī, tita ge ǁîga mîmān hoana, ǂhanub hoab tsî ǂnûiǂgādi tsî ǂhanu-aisigu tsîna, Moseb ǃomma xu ge māhena.

⁹Nētib ge Manaseba Judab tsî Jerusalems di ǁansabena ge ǁhapu kai, ǁnā ǃhaodi ǃKhūb ge Israeli ôan di aisa xu hîkākāna ǃnā hâsen ge tsūse dīs kōse.

¹⁰ǃKhūb ge Manaseb tsî ǁîb di ǁaes ǃoa ge ǃhoa, xawen ge ǃgaoǃgâ tama ge i.

¹¹ǁNā-amagab ge ǃKhūba ǁnā toroǂamsagu, Asiriab di gao-aob ūhâga ǁîn ǂama ge hā kai, ǁîgu, Manaseba ǁkhūdi ǃgao ge ǃkhōga, tsî gu ge ǁîba ǀgam ǂaiǁkhamkha ǀkha ǃgae tsî Babilons ǃoa ge ūǃgû.

¹²Tsî ǂōǂōsib ǃnâb hâ hîab ge ais ǃKhūb, ǁîb di Elob disa ǁkhōsase ǀgoreǀî tsî ge ǃgamǃgamsen, ais ǁîb îgu di Elob dis aiǃâ.

¹³Tsîb ge ǁîb ǃoa ge ǀgore. Ob ge ǁîba ǀgores tsî ǀkhomabasens âba ǁnâu tsî Jerusalems ǃoa ǁkhawa ge ūsī bi gaosis âb ǃnâ. ǃNubaib ge Manaseba ge mûǂan, ǃKhūb a Elo ǃkhaisa.

¹⁴Tsî ǁnās khaoǃgâb ge ǃaugab ǂnubiǂgoab Davib ǃās diba ge ǂnubi, Gihons di huriǂoasǀî ǁAuǁāb tawats ra ǂgâs kōse, tsîb ge Ofelsa xāǂgā tsî kaise ge ǀgapiǀgapi si; tsîb ge ǁkhāti toroǂamsaga ǁaposa ǃādi Judab didi ǃnâ ge ǁgui.

¹⁵Tsîb ge ǁnā ǃhao elogu tsî ǁnā īga ǃKhūb di omma xu ge dībē tsî altardi hîab ge ǂnubidi hoade ǃKhūb ommi di ǃhommi ai tsî Jerusalems tawa, tsîb ge ǁîde ǃās ǃauga ge aoǂui.

¹⁶Tsîb ge altars ǃKhūb disa ge ǁāǁā, tsîb ge ǁîs ai ganganǁguibadi tsî ǃkhōǀkhāǁguibadi tsîna gere ǁguiba tsîb ge Judaba ge mîba, ǃKhūb Israeli Eloban nî ǃoaba, ti.

¹⁷Xawe ǁaes ge gorose ǀgapigu ai gere ǁguiba ǃKhūb ǁîn Elob dis a xawe.

¹⁸Tsî nau xūn Manaseb di ǃnaeǃkhaidi din tsî ǀgores âb, ǁîb di Elob ǃoab ge ǀgores, tsî ǁnā mîdi, mû-aogu ǁîb ǃoa ǃKhūb Israeli Elob di ǀons ǃnâ ge ǃhoagu didi tsîn, mû, ǁîn ge ǃNaeǃkhaidi di ǂkhanis Israeli gao-aogu dis ǃnâ xoahe hâ.

¹⁹Tsî ǁîb di ǀgores matib ge Elob ǃoa ǀgore tsî ǁnâu-amhes tsî ǁkhāti ǁîb di ǁoreb hoab tsî ǁîb di ǃûǂams tsî ǁnā ǃkhaidi, ǁîdi aib ge ǀgapiga ǂnubidi tsî ǀhomadi tsî ǃgaohesa īga ge ǂnûidi tsî ǃgamǃgamheb ges aiǃâ, mû, ǁîn ge mû-aogu di ǂkhanis ǃnâ xoahe hâ.

²⁰Tsî Manaseb ge ge ǁō, tsîn ge ǁîba oms âb ǃnâ ge ǁkhō. Tsî ǁîb ôab Amonni ge ǁîb di ǃās ǃnâ ge gao-ao kai.

²¹Amonni ge ǀgamdisiǀgamǀa kurixa ge i, gao-ao kaib ge ǃnubai, tsîb ge ǀgam kurikha Jerusalems tawa ge gaosîsen.

²²Tsîb ge ǃKhūb mûǁae a ǂkhabana gere dī ǁîb îb Manaseb ge dīs ǁkhās xase. Amonni ge ǃgaohesa īgu ǁîb îb Manaseb ge dīgu hoaga ge ǁguiba tsî ǁîga gere ǃoaba.

²³Xaweb ge ǃKhūb di ais aiǃâ ǃgamǃgamsen tama ge i, Manaseb ǁîb îb ge ǃgamǃgamsen khami, tsîb ge nē Amonna ǀhapisa kaise ge ǃgomǃgom.

²⁴Tsî ǁîb ǃgāgu ge ǃgaeǁare-e ǁîb ǃoagu dī tsî ǁîba ge ǃgam ǁîb di oms ǃnâ.

²⁵Xawes ge ǁaes ǃhūb disa ǁnāgu, gao-aob Amonni ǃoagu ge ǃgaeǁare-e dīgu hoaga ge ǃgam; tsîs ge ǁaes ǃhūb disa ǁîb ôab Josiaba ge gao-aodī ǁîb di ǃās ǃnâ.