Read Khoekhoegowab 2 Kroniks 34 Bible Online

2 Kroniks 34 - Khoekhoegowab bible

2 Kroniks 34

¹Josiab ge ǁkhaisa kurixa ge i, gao-ao kaib ge ǃnubai, tsîb ge ǃnonadisiǀguiǀa kuriga Jerusalems tawa ge gaosîsen.

²Tsîb ge ǃKhūb mûǁae a ǂhanuna gere dī, tsîb ge ǁîb îb Davib di daogu ǃnâ ǃgû tsî ǂgō tama ge i, amǀkhābǀîs tamas ka io ǁareǀkhābǀîs kas hoasa.

³Tsî ǁkhaisaǁî kurib ǁîb gaosis dib ǃnâ, ganupeb a ǀgôa hîab ge ǁîb îb Davib di Eloba ge ôatsoatsoa, tsî disiǀgamǀaǁî kurib ǃnâb ge Judab tsî Jerusalems tsîra ge ǃanuǃanutsoatsoa ǀgapiga xu tsî ǀhomade xu tsî ǃgaohesa tsî ǂnâhesa īga xu.

⁴Tsîn ge ǁîb di ais aiǃâ Baalgu di altarde ge khôaǁnâ; tsî sore-īgu, ǁnāgu ǂamǃnâ hâgab ge ge ǁhāǁnâ. ǁKhātib ge ǀhomadi tsî ǃgaohesa tsî ǂnâhesa īgu tsîna khôaǂkhū tsî xontsautsau tsî ǁîna ge tsoro, ǁnān ǁîna ge ǁguiban di ǀhobadi ai.

⁵Tsî ǂkhōgu pristergu digab ge altardi ai ge khauǃkhū, tsîb ge Judab tsî Jerusalems tsîra ge ǃanuǃanu.

⁶ǁNās xōǀkhā, Manaseb, Efraimmi tsî Simeonni di ǃādi ǃnâ, ā, Naftalib di ǃādi kōse, ǁîdi ǂnamipe hâ ǀkhaiǃnâ ǃkhaidi ǃnâb ge

⁷ǁkhāti altardi tsî ǀhomadi tsîna ge khôaǁnâ, tsî ǃgaohesa īgab ge ge khôaǂkhūǂkhū, ǁîga ra xontsautsauǃâ, tsî sore-īgu hoagab ge Israeli ǃhūb hoab ǃnâ ge ǁhāǁnâ. ǁNās khaoǃgâb ge ǁkhawa Jerusalems ǃoa ge oa.

⁸Tsî disiǁkhaisaǀaǁî kurib ǁîb gaosis dib ǃnâ, ǃhūb tsî ommi tsîkhab ge ǃanuǃanu ǃnubaib ge Safanni, Asaliab ôab, tsî Maasejab, ǃās di ǂamsab, tsî Joaxi, Joahab ôab, ǂkhanisâu-aob tsîga ge sî, ommi ǃKhūb, ǁîb Elob diba gu nî dī-unuse.

⁹Tsî gu ge Hilkiab, ǀgapipristeri tawa sī tsî ǁnā marib Elob ommi tawa ge ūhāheb, Leviǁîgu, ǁāb ǃûi-aogu, ge Manaseb tsî Efraimmi tsîkha di ǃomǁaeba xu tsî Israela xu ge ǃgaun hoan tsî Judab tsî Benjaminni hoaba xu ge ǀhaoǀhaoba ge mā, tsî Jerusalems tawa gu ge oahāo,

¹⁰o gu ge ǁîba ǁnāgu sîsenna ra kōǂamgu, ǃKhūb di omma mâibahe hâgu ǃomǁae ge mā, tsî ǁîgu ge ǁnāgu sîsenna ra dīgu, ǃKhūb di omma ra kuruga ge mā, omma gu nî dī-unu tsî ǃgâiǃgâiga.

¹¹ǁÎgu ge ǁîba kōǂam-aogu tsî ǂnubi-aogu tsîna ge mā, ǁhāhesa ǀuidi tsî ǃgaeǁaeǃnaogu nî ǁamahese, tsî omgu Judab gao-aogu ge hîǀhurugu nî ǃgūǂamhese.

¹²Tsî ǁnā aogu ge sîsenna îǂhôase ge sîsen. Tsî ǁîga mâibahe hâgu ge Jahati tsî Obadjab tsîkha, Merarib ôan di Leviǁîkha, tsî Saxariab tsî Mesulammi tsîkha, Kehati ôan dikha tsîga ge i, sîsenna gu nî ǃhaeǃhaega. Tsî nē Leviǁîgu ge hoatsama ǀkhō-ūdana ǀkhōsa ǁkhāba ge i.

¹³Tsî gu ge ǁkhāti ǃgom xūn di tani-aogu ǂama ge hâ i, mâ sîsenai-i hoa-e ra sîsengu hoaga gu nî ǃhaeǃhaese. Naugu, Leviǁîn digu, ge xoa-ao tsî ǂamkhoe tsî ǁāb ǃûi-ao ge i.

¹⁴Tsî ǁnā marib ǃKhūb di ommi ǃnâ ge ūhāheba gu ra ūǂui hîab ge pristeri, Hilkiaba ǂkhanis ǃKhūb ǂhanub dis, Moseb di ǃomma xu ge māhesa ge hō.

¹⁵Ob ge Hilkiaba Safanni, xoa-aob ǃoa ge mî: Tita ge ǂhanub ǂkhanisa go hō ǃKhūb di ommi ǃnâ. Tsî Hilkiab ge ǁnā ǂkhanisa Safanna ge mā.

¹⁶Ob ge Safanna ǂkhanisa gao-aoba ge ūsība, ǁnās tawab ge ǁkhāti gao-aoba ganupe oe-amsa ūhāba tsî ge mî: Sa ǃgāgu ǃomǁae ge māhen hoana gu ge ra dī.

¹⁷Tsî gu ge ǁnā marib ǃKhūb di ommi ǃnâ go hōheba tsoroǀhao tsî ǁîba mûǂamaogu ǃomǁae tsî sîsenaogu ǃomǁae go mā.

¹⁸ǃAruǀîb ge Safanni, xoa-aoba, gao-aoba ǂanǂan tsî ge mî: Hilkiab, pristeri ge tita ǂkhani-e go mā. Ob ge Safanna ǁî-i ǃnâ gao-aob di ais aiǃâ ge khomai.

¹⁹O i ge ge ī, gao-aob ge ǂhanub di mîde ǁnâu ǃnubaib ge saran âba ǀkhau ǃkhaisa.

²⁰Ob ge gao-aoba Hilkiab tsî Ahikammi, Safanni ôab, tsî Abdonni, Mixab ôab, tsî Safanni, xoa-aob, tsî Asajab, gao-aob ǃgāb tsîga ge mîmā:

²¹ǃGû î go tita tsî Israeli tsî Judab tsîkha ǃnâ ǃgau hân tsîda ǃaroma ǃKhūb tawa sī ǀape-ôa, mîdi nē ǂkhanis hîa go hōhes didi ǂama. ǁAib ǃKhūb dib sada ǂama go ǁhōǂuiheb a kai xuige, sada îgu ge ǃKhūb di mîsa ǃkhōǀgaipe tama hâ i amaga, nē ǂkhanis ǃnâ xoahe hân hoan ǃoa gu nî dīse.

²²ǃNubai gu ge Hilkiab tsî gao-aob ge sîgu tsîga kēbo-aos Huldas, Salummi, Tokati ôab, Hasrab ôab, sarasâu-aob di taras ǃoa ge ǃgû. Tsîs ge ǁîsa Jerusalems ǃnâ ǀgamǁî ǃâs ǃās dis ǃnâ ge ǁan hâ i. Tsî gu ge nēna ǁîs ǀkha ge ǃhoa.

²³Os ge ǁîgu ǃoa ge mî: Nētib ra ǃKhūb, Israeli di Eloba mî: Mîba ǁnā aob, sago tita ǁga go sîba:

²⁴Nētib ra ǃKhūba mî: Mû, tita ge ǂkhababa nē ǃās ǂama nîra ūhā tsî ǁîs di ǁansaben ǂama, ǁnā ǀâxaren nē ǂkhanis Judab gao-aob di ais aiǃâ goro khomaihes ǃnâ xoahe hân hoana.

²⁵Tita ǁnāxū tsîn ǀkhara eloga gere ǀanǀanba amaga, titan nî ǃomgu ân di sîsengu hoagu ǀkha ǁaixa kaise; ǁnā-amagab ge ti ǁgôasiba nē ǃāsǀî go ǁhōǂuisen tsî ǀarihe tide.

²⁶Xawe Judab gao-aob, sago go ǃKhūba go nî dîse sîb, ǁîb ǃoa go ge nēti nî mî: Nētib ra ǃKhūb Israeli di Eloba mî: ǁNā mîdi hîats go ǁnâudi xasa:

²⁷Sa ǂgaob go tsau tsî Elob di ais aiǃâts go ǃgamǃgamsen amaga, ǁîb di mîdi nē ǃās tsî ǁîs di ǁanǂgāsaben ǃoagub ge ǃhoadets go ǁnâu ǃnubai, tsîts go ais âb aiǃâ ǃgamǃgamsen tsî sa sarana ǀkhau tsî ti ais aiǃâ ā amaga ta ge tita go ǁnâu-am tsi, tib ra ǃKhūba mî.

²⁸Mû, tita ge satsa sa îgu ǀkha nîra ǀhaoǀhao, ots ge ǂkhîb ǀkha sa ǀhobas ǃnâ nîra sâ, tsî sa mûra ge ǁnā ǂkhabab tita nē ǃās tsî ǁîs di ǁansaben ǂama nîra hā kaiba mû tide. Tsî gu ge nē ǃereamsa gao-aoba ǁkhawa ge ūhāba.

²⁹ǃNubaib ge gao-aoba sî tsî Judab tsî Jerusalems tsîra di kaigu hoaga ge ǀhaoǀhao kai.

³⁰Ob ge gao-aoba ǃKhūb di ommi ǃoa ge ǃgû tsî Judab di aogu hoagu tsî Jerusalems di ǁansaben tsî pristergu tsî Leviǁîgu tsî ǁaes hoas tsîn, kai-e xu ǂkhari-i kōse; tsîn ge ǁîn di ǂgaedi ǃnâ ǁnā ǂkhanis ǃgaeǀhaos dis, ǃKhūb di ommi ǃnâ ge hōhes di mîdi hoade ge khomaibahe.

³¹Tsî gao-aob ge ǁîb di mâǃkhais ai mâ tsî ǃgaeǀhao-e ge dī ǃKhūb di ais aiǃâ, ǃKhūbab nî saoǃgon tsî ǁîb di mîmādi tsî ǁîb di ǃkhō-amdi tsî ǁîb di ǂnûiǂgādi tsînab ǂgaob hoab ǀkha tsî ǀoms hoas ǀkha nî ǃkhōǀgaipe ti, mîdi ǃgaeǀhaos didi, ǁnā ǂkhanis ǂûs ǃnâ xoahe hâde ra dīǃâ.

³²Tsîb ge ǁnān Jerusalems tsî Benjaminni tsîra ǃnâ ra hōhen hoana ge mâ kai; tsî ǁanǂgāsaben Jerusalems din ge ǃgaeǀhaos Elob dis, ǁîn îgu di Elob dis ǃoa ge dī.

³³Tsî Josiab ge ǁnā ǃhūgu Israeli ôan digu hoaga xu ǁgaidīn hoana ge dībē tsîb ge Israeli ǃnâ ra hōhen hoana ǃKhūb, ǁîn di Eloba ge ǃoaba kai. On ge ǁîb ûib di tsēdi hoadi kōse ǃKhūb, ǁîn îgu di Eloba saoǃgonsa ǀû tama ge hâ i.