Read Khoekhoegowab 2 Kroniks 35 Bible Online

2 Kroniks 35 - Khoekhoegowab bible

2 Kroniks 35

¹ǁNās khaoǃgâb ge Josiaba ǃKhūba Pasxaba ge tsēdība Jerusalems tawa, tsîn ge Pasxaǁkhaoba ge ǂā, disihakaǀaǁî tsēs ǂguro ǁkhâb dis ai.

²Tsîb ge pristerga ǁîgu di ǃûiǃkhaidi ai ge mâi; tsîb ge ǁîga ǃKhūb ommi di ǃoabasa ge ǀgaiǀgaiba.

³Tsîb ge ǁnā Leviǁîgu Israeli hoaba ra ǁgaugu, ǃKhūba ǃanuse ībagu, ǃoa ge mî: ǃAnu ǂgaesa mâiǂgā ǁnā ommi Salomob, Davib ôab, Israeli di gao-aob ge kurub ǃnâ. Sago ge nēsi ǃgom-i xare-e sago di ǃhōgu ai ūhâ tama hâ xuige ǁnâi ǃoaba ǃKhūb, sago di Eloba tsî ǁîb di ǁaes, Israelsa.

⁴Î go ǂhomisen sago îgu di omgu ǃoa, sago di ǀgorade ǃoa, Davib, Israeli gao-aob di xoas ǃoa, tsî ǁîb ôab Salomob di xoas ǃoa.

⁵Î go ǃanusib ǃnâ mâ ǁgûsi omgu sago ǃgâsagu digu di ǀgorasa ǃoa, ǁaes dis ǃoa, tsî Leviǁîn ǁgûsi omgu di ǀgorasa ǃoa.

⁶Î go Pasxaǁkhaoba ǂā, î go ǃanuǃanusen, î go ǁîba sago di ǃgâsana ǁāǁāba, ǃKhūb di mîs Moseb ǃommi ǀkha ge māhes ǃoa ra dīse.

⁷Tsî Josiab ge ǁaesa ǀgoan xa ge mā, ǁkhaogu tsî pirigu tsîna hoatsama Pasxaǁguibadi ǂama, ǁîgu ge hōhe ǁkhā is kōse, ǃnonadisiǀoadisigu kōse, tsî goman xa ǃnonaǀoadisigu kōse; nēn ge gao-aob di xū ge i.

⁸ǁKhāti gu ge gaosagu âba ǁaesa māsenxa ǁguiba-e ge mā pristergu ǃaroma tsî Leviǁîgu ǂama. Hilkiab, Saxariab tsî Jehieli tsîgu, Elob ommi di ǂamsagu ge pristerga ǀgamǀoadisi tsî ǃnanikaidisi ǀgoan tsî ǃnonakaidisi goman tsîna Pasxaǁguibase ge mā.

⁹ǁNās tawa gu ge Konanjab, Semajab tsî Netaneli, ǁîb ǃgâsakha, tsî Hasabjab, Jeieli tsî Josabadi, Leviǁîgu di ǂamsagu tsîga, Leviǁîga koroǀoadisi ǀgoan tsî korokaidisi goman tsîna Pasxaǁguibase ge mā.

¹⁰Nētis ge ǃoabasa ge ǁāǁāhe; tsî pristergu ge ǁîgu di mâǃkhais ǃnâ ge mâ i, tsî Leviǁîga ǁîgu di ǀgoradi ǃnâ gao-aob di mîmās ǃoa.

¹¹ǁNās khaoǃgâb ge Pasxaǁkhaoba ge ǂāhe, tsî pristergu ge Leviǁîgu di ǃomǃnāba xu ǀaoba ū tsî ge ǀgapi, tsî Leviǁîgu ge ǃaruǀî khōga ge ǂāǁnâǀkhā.

¹²Tsî gu ge khauǁguibade ge ūǁnâ, ǁîde gu nî ǁgûsi omgu di ǀgorade ǃoa ǁaesa māse, ǃKhūban nî ǁguibaga, Moseb di ǂkhanis ǃnâ xoahe hâ khami; tsî ǁnās ǁkhās khami goman tsîna.

¹³Tsîn ge Pasxaǁkhaoba ǀaes ai ge am ǂhanub ǃoa, xawe nau ǃanu xūnan ge sūdi ǃnâ tsî keteldi ǃnâ tsî amaiǃoredi ǃnâ ge sâi, tsîn ge ǁîna ǃhaese ǁaes ǃnâ ge ǀgora.

¹⁴ǁNās khaoǃgân ge ǁkhāti ǁî-aitsama ge ǂhomibasen tsî pristerga ge ǂhomiba; pristergu, Aronni ôagu, ge tsuxub kōse ǁguibas khauǁguibadi tsî kaub tsîn dis ǀkha sîsenxa i xui-ao. ǁNā-amaga gu ge Leviǁîga ge ǂhomibasen tsî pristergu, Aronni ôaga ge ǂhomiba.

¹⁵Tsî ǁnae-aogu, Asafi ôagu ge ǁîgu di mâǃkhais ǃnâ ge mâ i, mîmās Davib, Asafi, Hemanni tsî Jedutunni, gao-aob di mû-aob tsîgu dis ǃoa. Tsî ǁāb ǃûi-aogu ge mâb hoab âga dao-ams âb tawa ge hâhâ; ǁîgu ge ǃoabasa xu ǂgōsa ǂhâba tama ge hâ i, ǁîgu di ǃgâsagu, Leviǁîgu, ge ǁîga ǂhomiba xui-ao.

¹⁶Nētis ge ǃKhūb di ǃoabas hoasa ǁnātsē ge dī-unuhe, Pasxab nî tsēdīhe tsî khauǁguibadi ǃKhūb di altars ai nî ǁguibahega, gao-aob Josiab di mîmās ǃoa.

¹⁷Tsî Israeli ôan hîa ge hōhen ge ǁnā ǁaeb ǁkhāb ai Pasxab tsî ǀkhuruoǃnâ peregu di kaitsēsa gere tsēdī hû tsēdi kōse.

¹⁸Tsî i ge ǁkhāti ǁîb khami ī Pasxa-e hâ tama ge hâ i Samueli, kēbo-aob, di tsēde xu; tsî gao-aogu Israeli digu di ǀguib xareb ge Josiab ge pristergu tsî Leviǁîgu tsî Judab tsî Israeli hoab hîa ge hōheb, tsî Jerusalems di ǁanǂgāsaben tsîn ǀkha gere dīb khami tsēdī tama ge hâ i.

¹⁹Disiǁkhaisaǀaǁî kurib Josiab gaosis dib ǃnâb ge nē Pasxaba gere tsēdīhe.

²⁰Nēn hoan khaoǃgâ, Josiab ge omma ǂhomi ǃnubaib ge Nexob, Egipteb gao-aoba ge ǂoaxa, Karkemisab nî ǃkhamūse, ǃārob Eufrati tawa; ob ge Josiaba ǁîba ge ǃgûǃoa.

²¹ǃNubaib ge sîsabega ǁîb ǃoa sî tsî ge mî: Tare-e ta sats ǀkha ǁae hâ, Judab gao-aotse? Sa ǃoagu tamas ge nētsē ta go hāsa, tsî tita ǀkha ra torodī ommi ǃoagu; tsî Elob ge: Î ta ǃhae, ti ge mî; Elob tita ǀkha hâba xu ǀû, îb ǁîba tā hîkākā tsi.

²²Xawe Josiab ge ais âba ǁîba xu unu tama i tsî ge ǀkharaǀkharasen, ǁîbab nî ǃkhamūse, tsîb ge mîdi Nexob didi, Elob amsa xu ra ǀkhīde ǁnâu tama ge i, ob ge ge hā, Megidos ǃgoaǃnāb ǃnâb nî ǃkhamga.

²³Tsî ǁkhâu-aogu ge gao-aob Josiaba ge ǁkhâu, ob ge gao-aoba ǃgāgu âb ǃoa ge mî: Oa-ū te re, kaise ta tsuihe hâ xuige.

²⁴O gu ge ǃgāgu âba ǁîba kunisa xu ūǁnâ tsî ǀgamǁî kunis ǁîb dis ai ǃnao tsî Jerusalems tawa ge ūsī, tsîb ge ge ǁō. Tsî Judab hoab tsî Jerusalems hoas ge Josiab ǂama ge ǃoa.

²⁵Tsî Jeremiab ge ǃgae-amsa Josiab ǂama ge dī, ǁnās ǁkhās xasen ge ǁnae-aogu hoagu tsî ǁnae-aodi hoadi tsîna ǁîn ǃgae-amdi ǃnâ Josiab xa gere ǃhoa nētsēs kōse. Tsîn ge ǁîde ǂnûiǂgāǃkhaise ge dī Israeli ǃnâ; tsî mû, ǁîdi ge ǃGae-amdi ǃnâ xoahe hâ.

²⁶Tsî nau xūn Josiab di ǃnaeǃkhaidi din tsî ǁîb di ǃgâidīgu, ǃKhūb di ǂhanub ǃnâ xoahe hâse,

²⁷ǁîb di ǃnaeǃkhaidi, ǂgurodi tsî ǀunigadi, mû, ǁîdi ge xoahe hâ ǂkhanis Israeli tsî Judab tsîkha di gao-aogu dis ǃnâ.