Read Khoekhoegowab 2 Kroniks 36 Bible Online

2 Kroniks 36 - Khoekhoegowab bible

2 Kroniks 36

¹ǃNubais ge ǃhūb di ǁaesa Joahab, Josiab ôaba ū tsî ǁîba ge gao-aodī, ǁîb îb ǃās ǃnâ Jerusalems tawa.

²ǀGamdisiǃnonaǀa kurixab ge Joahaba ge i, gao-ao kaib ge ǃnubai, tsîb ge ǃnona ǁkhâgu kōse Jerusalems tawa ge gaosîsen.

³Gao-aob Egipteb dib ge ǁîba Jerusalems tawa ge ǂnûiǁnâ tsîb ge ǁîba ǃhūba ǁkharaǁguiba-e ge ǁguiǂam, ǀguikaidisi talende ǀhaiǀurib xa tsî ǀgui talensa ǃhuniǀurib xa.

⁴Tsî gao-aob Egipteb dib ge ǁîb ǃgâsab Eljakimma ge gao-ao kai Judab ǂama tsî Jerusalems ǂama, tsîb ge ǀons âba Jojakim ti ge ǀkharaǀkhara. Xawe Nekob ge ǁîb ǃgâsab Jehoaha ū tsî Egipteb ǃnâ ge ūsī.

⁵ǀGamdisikoroǀa kurixab ge Jojakimma ge i, gao-ao kaib ge ǃnubai tsî disiǀguiǀa kuriga ge gaosîsen Jerusalems tawa. Tsîb ge ǃKhūb, ǁîb Elob mûǁae a ǂkhabana gere dī.

⁶Nebukadnesari, Babilons gao-aob ge ǁîb ǃoagu ǂoaxa tsî ǀgam ǂaiǁkhamkha ǀkha ge ǃgae bi, Babilons ǃoab nî ūsī biga.

⁷Nebukadnesari ge ǁkhāti soadi ǃKhūb ommi dide Babilons ǃoa ūsī tsî ǁîde ǁîb tempeli ǃnâ ge mâi Babilons tawa.

⁸Tsî nau xūn Jojakimmi di ǃnaeǃkhaidi din tsî ǁîb di ǁgaidīgu hîab ge dīgu din tsî ǁîb ǀkha ge hōhen din, mû, ǁîn ge xoahe hâ ǂkhanis Israeli tsî Judab tsîkha di gao-aogu dis ǃnâ. Tsî Jojaxinni, ǁîb ôab ge ǁîb di ǃās ǃnâ ge gao-ao kai.

⁹ǁKhaisa kurixab ge Jojaxinna ge i, gao-ao kaib ge ǃnubai, tsîb ge ǃnona ǁkhâgu tsî disi tsēdi kōse Jerusalems tawa ge gaosîsen, tsî ǃKhūb mûǁae a ǂkhabana gere dī.

¹⁰Tsî kurib di ǁkhawahās ǀkhab ge gao-aob Nebukadnesara sî tsî Babilons ǃoa ge ūhā kai bi, hoan xa ǃgomǀgausa xapan ǃKhūb ommi din ǀkha. Tsîb ge ǃgâsab âb Sedekiaba ge gao-aodī Judab tsî Jerusalems tsîra ǂama.

¹¹ǀGamdisiǀguiǀa kurixab ge Sedekiaba ge i, gao-ao kaib ge ǃnubai, tsîb ge disiǀguiǀa kuriga Jerusalems tawa ge gaosîsen.

¹²Tsîb ge ǁîba ǃKhūb, ǁîb di Elob mûǁae a ǂkhabana gere dī, ǁîb ge ǃgamǃgamsen tama ge i kēbo-aob Jeremiab di ais aiǃâ, ǃKhūb di amsa xu ra ǃhoaba.

¹³Tsî ǁnās tawab ge ǁkhāti gao-aob Nebukadnesari Elob tawa ǁîba ge nū kaiba xu ge ǁnāǁgôa. Tsîb ge ǃaob âba ge ǀkhamaǀkhama tsî ǂgaob âba ge karokaro, ǃKhūb, Israeli di Elob ǃoab ǃhobasen tidega.

¹⁴ǁKhāti gu ge pristergu di ǂamsagu hoagu tsî ǁaes tsîna kaise ge ǃûǂam ǀūben di ǁgaidīgu hoagu ǃoa. Tsîn ge ǃKhūb di ommi, ǁîb ge Jerusalems tawa khaiba ge ǀuriǀuri.

¹⁵Tsî ǃKhūb ǁîn îgu di Elob ge ǁîna ǃoa sîsabegu âba ge sî ǃnauǁgoaga ra khâise, sîb nîga, ǁaes âb tsî ǁanǃkhais âbab ge sâu amaga.

¹⁶Xawe ǁîn ge Elob sîsabega ge ǃhō tsî ǁîb di mîde ge ǃharaxū; tsîn ge ǁî-aitsama ge ǂgaeǂhapusen kēbo-aogu âb ǃoa-ai, ǁgôasib ǃKhūb dib ge ǁaes âbǀî kais kōse, ǂuruǂuruǃkhai-i ge ǀkhai is kōse.

¹⁷Ob ge ǁîba Xaldeaǁîn di gao-aoba ǁîn ǂama ge hā kai, ǂkhamkhoegu âna gôab ǀkha ǁîn ǃanusib di ommi ǃnâ ge ǃgamma tsî ǂkham khoegu kas, ǂkham khoedi kas, kain kas, kaira, ǀkhama hân kas hoasa sâu tamaba. ǁÎb ge ǁîn hoana ǁîb ǃomǁae ge mā.

¹⁸Tsî soan Elob ommi din hoan, kain kas, ǂkharin kas hoas, tsî ǁuigu ǃKhūb ommi digu tsî ǁuigu gao-aob tsî ǁîb di gaosagu digu; ǁîn hoanab ge Babilons ǃoa ge ūbē.

¹⁹Tsîn ge Elob omma ge khauǃkhū, tsîn ge ǂnubiǂgoab Jerusalems diba ge khôaǁnâ, tsî ǁîs di î-omgu hoagan ge ǀaes ǀkha ge khauǃkhū, ǃgomǀgausa soan âba ra hîǀhuruse.

²⁰Tsî gôaba xu ge ǃgaunab ge Babilons ǃoa ge ǃgû-ū, tsîn ge ǁîb tsî ǁîb ôaga ge ǃgā kaiba, Persiab di gaosis ge gaos kōse,

²¹ǁnā mîs ǃKhūb dis, Jeremiab amsa xu ge ǀkhīs nî ǀoaga: ǃHūb sâtsēdi âb xa nî ǃgâibahes kōse. ǁÎb ge ge sâ, hîǀhurus di tsēdi hoadi kōse, hûdisi kurigu nî ǀoas kōse.

²²ǂGuro kurib Koreb, Persiab gao-aob dib ǃnâb ge ǃKhūba ǁîb di mîs, Jeremiab di amsa xu ge ǀkhīs nî dīǀoaǀoahega gagas Koreb, Persiab gao-aob disa ge ǂkhaiǂkhaikhâi, mîmā-eb gaosis âb hoab ǃnâ ge ǂoa kai, ti, xoas on ǃnâ, mî rase:

²³Nētib ra Koreb, Persiab di gao-aoba mî: ǃKhūb, ǀhommi di Elob ge tita gaosidi ǃhūbaib didi hoade ge mā. Tsî ǁîb ge tita ge mîmā, omma ta nî Jerusalems Judab ǃnâ hâs ǃnâ ǂnubiba bisa. Sadu ǁaegu a ǁîb di ǁaes di-i hoa-e, ab ǃKhūb, ǁî-i di Eloba ǁî-i ǀkha hâ, î-i ǃgûǃapa.