Read Khoekhoegowab 2 Kroniks 5 Bible Online

2 Kroniks 5 - Khoekhoegowab bible

2 Kroniks 5

¹Nētib ge sîsenni, ǃKhūb ommi tawab ge Salomoba dīb hoaba ge dītoahe. ǁNās khaoǃgâb ge Salomoba ǁîb îb Davib di khaihesa xūn hoana ge ūhā; ǀhaiǀurib tsî ǃhuniǀurib tsî xapan tsînab ge Elob ommi di ǁuigu tawa ge ǁgui.

²ǃNubaib ge Salomoba Israeli di kaigu tsî ǃhaodi di danagu hoagu, Israeli ôan ǃnâ hâ ǁgûgu di ǂamsagu tsîna ge ǀhaoǀhao Jerusalems tawa, ǃKhūb di ǃgaeǀhaos di ǂgaesa gu nî Davib di ǃās, ǁnās ge Sionsa, xu ūhāse.

³Tsî Israeli di aogu hoagu ge gao-aob tawa ge ǀhao, kaitsēs ai; hûǁî ǁkhâb ǃnâ.

⁴Tsî kaigu Israeli digu hoagu ge ǀhao, o gu ge Leviǁîga ǂgaesa ge ūkhâi.

⁵Tsî gu ge ǂgaes tsî tentoms ǀhûs dis tsîra, ǁnā ǃanu xapan, tentoms ǃnâ hân hoan ǀkha ge ūhā; pristergu tsî Leviǁîgu tsîn ge ǁîna ge ūhā.

⁶Tsî gao-aob Salomob tsî Israeli di ǀhaohâb hoab, ǁîb tawa ǀhû hâb tsîn ge ǁîb ǀkha ǂgaes aiǃâ ge hâ i tsî gūn tsî goman, ǂguib ǃaroma ǃgôahe tsî ǀnōhe ǁoana, gere ǁguiba.

⁷Nēti gu ge pristerga ǃgaeǀhaos ǂgaes ǃKhūb disa ge ūǃapa, ǁîs di ǃkhais ǁga, ǃhoaǀîǃkhais ommi dis ǁga ǃanun di ǃanub ǃoa xerukha di ǁgabogu ǃnagas kōse.

⁸Xerukha ge ǁgabogu hoaga ǂgaes di ǃkhais ai ge khoraǂui xui-ao; tsî xerukha ge ǂgaes tsî tani-ūǃkhaira âsa ǀgapiseba xu ge ǃgū-ai.

⁹ǁNās khaoǃgâ gu ge ǃkhōhaira ǃaruǀî ge ǀhōǂui, ǃkhōhaira di danara ǃanusiba xu ǃhoaǀîǃkhais aiǃâba xu gere mûhese, xawe ǃaugaba xu ge mûhe ǁoa i; tsî ra ge ǁnāpa hâ nētsēs kōse.

¹⁰ǀNî xū-i xare-i ge ǂgaes ǃnâ ge hâ tama hâ i, ǀgam ǀuixoa-aixūra, Moseb ge Horeb tawa ǁîs ǃnâ ǂgāra ǀguira, ǃKhūb ge Israeli ôan ǀkha ǃgaeǀhao-e dī ǃnubai, Egipteba xun ge doeǂoao.

¹¹Tsî i ge ge ī, pristergu ge ǃanuba xu ǂoao: Pristergu hîa ge hōhegu hoagu ge ge khaisen, ǀgorade ǃkhōǀgaipe tama i tsî;

¹²tsî Leviǁîgu ǁîn hoan di ǁnae-ao ge igu, Asafi digu, Hemanni digu, Jedutunni digu tsî ǁîgu di ôagu tsî ǁîgu di ǃgâsagu tsîgu ge ǀuilineǃkhaiba ana hâǃâ simbaln tsî ǀganaǀkhōxūn tsî harpdi tsîn ǀkha altars di aiǂoasǀî ge mâ xui-ao, tsî ǁîgu ǀkha ǀguikaidisi tsî ǀgamdisi pristergu on, xâiǁnâde ra xâiǃâ;

¹³tsî i ge ge ī, ǀgaugu hâse gu ge xâi tsî ǁnaeo, ǀgaugu hâ dommi ǀguiba gu nî ǁnâu kaiga, ǃKhūba ra ǃkhōǀkhā tsî koaǃâ; tsî domma gu ge ǀgapadadi tsî simbaln tsî ǀganaǀkhōxūn tsî harpdi tsî ǀnî ǀkhōxūn tsîn ǀkha ūkhâio tsî ǃKhūba gu ge ǃkhōǀkhāo: ǁÎb a ǃgâi tsî ǀkhomxaǂgaosib âb ǀamos kōse hâ ǃkhaisa; ob ge ommi, ǃKhūb diba ǃâu-i xa ge ǀoa.

¹⁴Tsî pristergu ge ǁnā ǃâus ǃaroma mâ tsî ge ǃoaba ǁoa i, ǂkhaisib ǃKhūb dib ge Elob omma ǀoaǀoa amaga.