Read Khoekhoegowab 2 Kroniks 6 Bible Online

2 Kroniks 6 - Khoekhoegowab bible

2 Kroniks 6

¹ǃNubaib ge Salomoba ge mî: ǃKhūb ge ǃkhaenab ǃnâb nî ǁan ti ge mî, ti;

²tsî tita ge satsa omma ǁanǃkhaise ge ǂnubiba, ǁaposa ǃkhaiba sa ǀamo hâǃkhaise.

³ǁNās khaoǃgâb ge gao-aoba ais âba unu tsî Israeli di ǀhaohâb hoaba ge ǀkhae; tsî Israeli di ǀhaohâb hoab ge ge mâ i.

⁴Tsîb ge ge mî: Ab karehe ǃKhūb, Israeli di Elob, ams âb ǀkha ti îb Davib ǁga ǃhoa tsî ǃommi âb ǀkha ǁîsa ge dīǀoaǀoaba, mî raǃâ:

⁵Ti ǁaes Israelsa ta ge Egipteǃhūba xu ǂgaeǂguiǂui tsēsa xu ta ge Israels di ǃhaodi hoade xu ǃāsa ǁhûiǂuibasen tama hâ, omma ta nî ǂnubise, ti ǀons nî ǁnāpa hâga; tsî ta ge khoeb xareba ǃkhōǂuibasen tama hâ, ti ǁaes Israels ǂamab nî aiǃgû-ao kaise.

⁶Tsî ta ge Jerusalemsa ge ǁhûiǂuibasen ti ǀons nî ǁnāpa hâga, tsî ta ge Daviba ǃkhōǂuibasen hâ, ti ǁaes Israels ǂamab nî aiǃgû-ao kaise.

⁷Tsî ti îb Davib on ge ǂgaob ǃnâ ge ǂâibasen hâ i, ommab nî ǀons ǃKhūb, Israeli di Elob disa ǂnubiba ti.

⁸Xawe ǃKhūb ge ti îb Davib ǁga ge mî: Sa ǂgaob ǃnâts ge ǂâibasen hâ i, ti ǀonsats nî omma ǂnubiba ǃkhais ǀkhats ge ǃgâise ge dī, sa ǂgaob ǃnâ i ge hâ is ǀkha.

⁹Xawe sats ge ǁnā omma ǂnubi tide, tsî sa ôab, sats nî ǁorabaheb, ge ti ǀonsa omma nî ǂnubiba.

¹⁰Nētib ge ǃKhūba mîs âba ge ǀgaiǀgai, ǃhoab gesa; tita ge ti îb Davib di amǃnâs ai ge khâi, tsî ta ge Israeli di trons ai ǂnôa, ǃKhūb ge mîs ǁkhās xase; tsî ta ge ǃKhūb Israeli Elob di ǀonsa omma ge ǂnubiba.

¹¹Tsî ta ge ǂgaesa ǁnāpa ge mâi, ǃgaeǀhaos ǃKhūb dis, Israeli ǀkhab ge dīs ǁîs ǃnâ hâsa.

¹²Tsîb ge ǃKhūb di altars aiǃâ ge mâ i Israeli di ǀhaohâb hoab ǃoa-ai, tsîb ge ǃomkha âba ge khoraǂui.

¹³Salomob ge ǂaiǂnû-aixū-e dībasen xui-ao, tsîb ǁî-e ai-ommi di ǁaegub ǃnâ ge mâi, koro ǂhâgu kōse a gaxub tsî koro ǂhâgu kōse a ǂhabasib tsî ǃnona ǂhâgu kōse a ǀgapiba; tsîb ge ǁî-i ai ge mâ i, tsîb ge ge ǃhonǁgoa Israeli di ǀhaohâb hoab aiǃâ tsîb ge ǃomkha âba ǀhommiǀî ǀhōǂui,

¹⁴tsî ge mî: ǃKhūtse, Israeli di Elotse, sats khami ī Elo-i ge a ǀkhai, ǀhommi ǃnâs karao tsî ǃhūbaib ais karao, sats, ǃgaeǀhaos tsî ǀkhomxaǂgaosib tsîra sa ǃgāda, ais âts aiǃâ ǂgaob hoab ǀkha ra tanisen da ǃkhōǀgaipeba hâtse.

¹⁵Sa ǃgāb, ti îb Daviba ǁîbats ge ǃhoa-ūna ǃkhōǀgaipeba hâtsa; ams âts ǀkhats ge ge ǃhoa tsî ǃommi âts ǀkhats ge ge dīǀoaǀoa, nētsē i ī xase.

¹⁶Tsî nēsi, ǃKhūts, Israeli di Elotse, sa ǃgāb, ti îb Daviba ǃkhōǀgaipeba re, ǁîbats ge ǃhoaǀîna, mî raǃâ: Aob xarebats ge ti ais aiǃâba xu ǃgaoǁnâ-aihe tide, Israeli di trons ai nî ǂnûba, nēs ǀguisa dī tsî gu ga sa ôaga ǁîgu di daoba sâu, ti ǂhanub ǃnâ gu ga ǃgû, sats ti ais aiǃâ gere ǃgû khami.

¹⁷Tsî nēsi, ǃKhūb Israeli di Elotse, as ǁnâi sa mîsa ama kai re sa ǃgāb, ti îb Davib ǃoats ge ǃhoasa.

¹⁸Xawe amaseb kha ǁnâi Eloba khoen tawa ǃhūbaib ai nî ǁan? Mû, ǀhommi tsî hoan xa ǀgapi ǀhommi ge satsa a ǃkhōǂgā ǁoa, matikōseb ǁnās ǃgâ-ai nē ommi, satsa ta ge ǂnubibaba ǁîsa dī ǁoa!

¹⁹ǃGaoǃgâ ǁnâi re ǀgores sa ǃgāta dis ai, tsî ǁî ta di ǀkhomas ǃoa, ǃKhū, ti Elotse, îts ǁnâu ǂgais tsî ǀgores sa ǃgā ta ais âts aiǃâ ra ǀgoresa.

²⁰Sa mûra a ra tsēa tsî tsuxuba khowasase hâ re nē ommi ǂama, nē ǃkhais ǂama, ǁîs xats ge: Ti ǀons ge ǁnāpa nî ǁan, ti mîsa; îts ǁnâu ǁnā ǀgores, sa ǃgāta nē ǃkhais tawa ra ǀgoresa.

²¹ǁNâu ǁnâi re ǀkhomas sa ǃgāta dis tsî sa ǁaes Israels tsîda, nē ǃkhais ǃnâ nî ǀgoreda disa; ǁnâu sa ǁanǃkhaiba xu, ǀhomma xu, ā ǁnâu îts ǀûba re.

²²Khoe-i ga ǁî-i di ǀgūkhoe-i ǃoagu ǁoreo, tsî i ga nū-i ǀâxareb di-e ǁguiǂamheo, ǁî-aitsama i nî ǀâxarexūsen ti, tsî nūs ǁnā ǀâxareb dis ga sa altars aiǃâ nē ommi ǃnâ hāo,

²³ǁnâu ǁnâi re satsa ǀhomma xu, îts dī tsî sa ǃgā da ǂhanuǂhanuba, ǂhanuoǃnâ-e ra ǀgoraǃgâǃâ, daob â-e ǁî-i danas ai ra hā kaiǃâ tsî ǂhanu-ai-e ra ǂhanu-ai kaiǃâ, ǁî-e ǂhanu-aisib â-i ǃoa ra mādawase.

²⁴Sa ǁaes Israels ga khākhoeb di ais aiǃâ danheo, sa ǃoagun ge ǁore amaga, tsîn ga ǃhobasen tsî sa ǀonsa ǁguiǁnâo tsî sa ais aiǃâ nē ommi ǃnâ ǀgore tsî ǀkhomao,

²⁵ǁnâu ǁnâi re satsa ǀhomma xu îts ǁoren sa ǁaes Israels dina ǀûba, îts ǁîna ǁkhawa ūhā ǁnā ǃhūb ǁîn tsî ǁîn di îgats ge māb ǃnâ.

²⁶ǀHommi ga ǂganamseno, ǀapi-i a ǀkhais kōse, sa ǃoagun ge ǁore amaga, tsîn ga nē ǃkhais ǃnâ ǀgore tsî sa ǀonsa ǁguiǁnâ tsî ǁoren âna xu ǃhobaseno, sats nî ǁîna ǁnoras khaoǃgâ,

²⁷ǁnâu ǁnâi re satsa ǀhommi ǃnâ îts ǀûba ǁoren sa ǃgāda din tsî sa ǁaes Israels dina, ǁînats ga ǁnā ǃgâi daob, ǁîb ǃnân nî ǃgûba a ǁkhāǁkhās khaoǃgâ; îts ǀapiba mā re sa ǃhūb, sa ǁaesats ge ǀumise māb ǃnâ.

²⁸ǃÂtsūǀkhāb ga ǃhūb ǃnâ hâo, ǂhīǁōb ga hâo, ǃhoro ǁōb kas, ǀaub kas, ǂhoms kas, ǃnoms kas hoas ga hâo, khākhoen ân ga ǁîna ǁîn ǃhūb di ǃādi ǃnâ xāǂgāo, ǀnî ǁō-ai-i kas, ǀnî ǀaesen-i kas hoas ga hâo,

²⁹mâ ǀgores hoas, mâ ǀkhomas hoas, mâ khoe-i hoa-i xas kas, sa ǁaes Israels hoas xas ga dīhe ǂanǃān kao, mâ-i hoa-e ǁî-i di ǁnora-ai-e tsî ǁî-i di tsû-ai-e, tsî i ga ǁî-i di ǃomma nē ommi ǃnâ khoraǂuio,

³⁰ǁnâu ǁnâi re satsa ǀhommi, sa ǁaposa ǁanǃkhaiba xu, îts ǀûba îts mâ-i hoa-e ǁî-i di daogu hoagu ǃoa, ǂgaob â-ets a ǂan khami mā, sats ǀguits ge khoen ôan di ǂgaoga a ǂan xuige;

³¹în ǃaoǃgâ tsi, în ǃgû sa daogu ǃnâ ǁnā ǃhūb sida di îgats ge māb ǃnân nî ûi tsēdi hoadi kōse.

³²Tsî ǁkhāti ǃhaokhoe-i xasa, sa ǁaes Israels di tamab tsî ǃnū ǃhūba xu sa kai ǀons ǃaroma tsî sa ǀgaisa ǃommi ǃaroma tsî sa ǀhōǂuihesa ǁôab ǃaroma nî hā-e, ǁîn ga hā tsîn ga nē ommi ǃnâ ǀgoreo,

³³ǁnâu ǁnâi re satsa ǀhommi, sa ǁaposa ǁanǃkhaiba xu îts dī ǁnā ǃhaokhoe-i nî satsa ǂgaiǀîn hoan ǃoa, î di ǁaedi ǃhūbaib didi hoade ǂan sa ǀonsa, în satsa ǃaoǃgâ, sa ǁaes Israels ra dī khami, în ǂan, sa ǀons ra nē ommi, hîa ta ge ǂnubib ǂama ǂgaihe ǃkhaisa.

³⁴Sa ǁaes ga khākhoen ân ǃoagu torob ǃnâ ǃgûǂoao, ǁnā daob, sats nî ǁîna sîba-ū, tsîn ga sats ǃoa ǀgoreo, nē ǃās sats ge ǃkhōǂuibasens tsî nē ommi, sa ǀonsa ta ge ǂnubibab ǀkhāb ai,

³⁵ǁnâu ǁnâi re ǀhomma xu ǁîn di ǀgores tsî ǁîn di ǀkhomasa, îts ǁîna ǂhanuǂhanuba re.

³⁶Sa ǃoagun ga ǁoreo, (khoe-i, hîa ǁore tama-i kom a ǀkhaio), tsî sats ga ǁîn ǂama ǁaixa tsî ǁîna māǁnâo khākhoeb di ais aiǃâ, on ge ǁnān, ǁîna ga ǃkhōna, ǁîna ǃkhōsan ase nî ūǃgû ǃhūb, hîa ǃnūb kas, ǀgūb kas hoas ǁga;

³⁷tsîn ga ǃgûsī-ūhen ge ǃhūb ǃnâ ǂgaob ân ǃnâ ǂâiǂâisen, ǃhobasen tsîn ga ǃkhōsis ân di ǃhūb ǃnâ sa ǃoa ǀkhomabaseno, mî raǃâ: Sida ge ge ǁore, sida ge ǂkhabase ge dī, tsî eloxoresase ge sîsen,

³⁸tsîn ga ǁîn di ǂgaob hoab ǀkha, tsî ǁîn di ǀoms hoas ǀkha sa ǃoa ǃhobaseno ǃkhōsis ân di ǃhūb, ǁîb ǃoan ge ǃkhōsase ūǃgûheb ǃnâ, tsîn ga ǁîn di ǃhūb di daobǀî ǀgoreo, ǁîn di îgats ge mābǀî, tsî nē ǃās sats ge ǁhûiǂuibasensǀî, tsî nē ommi, sa ǀonsa ta ge ǂnubibabǀî;

³⁹ǁnâu ǁnâi re satsa ǀhommi, sa ǁaposa ǁanǃkhaiba xu ǁîn di ǀgores tsî ǁîn di ǀkhomabasendi tsîna, îts ǁîna ǂhanudība re sîsenǂui îts sa ǁaesa sa ǃoagus ge ǁore ǁorena ǀûba.

⁴⁰Tsî nēsi, ti Elotse, a ra sa mûra khowasa tsî sa ǂgaera ǃgaoǃgâ rase ī nē ǃkhais di ǀgoresǀî.

⁴¹Tsî nēsi, o ǃKhū Elotse, khâi sa sâb ǁga, sats tsî ǀgaib âts di ǂgaes tsîro. ǃKhū Elotse, sa pristerga a gu ǃgâiǃōba ana, în sa ǀkhomsabena ǃgâib ǂama ǃgâiaǂgao.

⁴²Ti ǃKhū Elotse, tā ǂkhā re ais sa ǀnausabeb disa. ǂÂi ǀkhomxasigu Davib sa ǃgābats ge dība gu xa.