Read Khoekhoegowab 2 Kroniks 7 Bible Online

2 Kroniks 7 - Khoekhoegowab bible

2 Kroniks 7

¹Tsî Salomob ge ǀgoretoao, os ge ǀaesa ǀhomma xu ǁgôaxa tsî khauǁguibasa ge ǂhubi tsî nau ǂāǁguibade, ob ge ǂkhaisib ǃKhūb diba omma ge ǀoaǀoa.

²Tsî pristergu ge ǃKhūb di ommi ǃnâ ǂgâ ǁoa ge i, ǂkhaisib ǃKhūb dib ge ǃKhūb di omma ǀoaǀoa xui-ao.

³Tsî Israeli ôan ge, ǀaes ra ǁgôaxasa mûo, tsî ǂkhaisib ǃKhūb diba ommi ǂama, on ge aidi ân ǀkha ǃhūb ai ge ǃgamǃgâ ǃhūb kōse, tsîn ge ǀgoreǀî tsî ǃKhūba ge ǃkhōǀkhā, ǁîb a ǃgâi tsî ǀkhomxaǂgaosib âb ǀamosib kōse hâ ǃkhaisa.

⁴Tsî gao-aob tsî ǁaes hoas ge ǁguibade ge ǁguiba ǃKhūb di ais aiǃâ.

⁵Tsî gao-aob Salomob ge ǂāǁguibade ge ǁguiba, ǀgamdisiǀgamǀaǀoadisi goman tsî ǀguikaidisi tsî ǀgamdisiǀoadisi gūna. Nētin ge gao-aob tsî ǁaes hoas tsîna Elob di omma ge khai.

⁶Tsî pristergu on ge ǃûis âgu ǃnâ ge mâ i tsî Leviǁîga ǀkhōxūn ǃKhūb din ǀkha, gao-aob Davib ge dīna, ǃKhūb nî koa-ūhese, ǀkhomxaǂgaosib âb ǀamosib kōse hâsa, Davib ge ǁîgu di ǃoabas ǀkha ǃkhōǀkhā bi ǃnubai, tsî pristergu ge ǁîn ǃoa-ai ge xâi, tsî Israeli hoab ge ge mâ i.

⁷Tsî Salomob ge ai-ommi di ǁaegub, ǃKhūb di ommi aiǃâ hâba ge khai, ǁnāpab ge khauǁguibadi tsî ganganǁguibadi di kaub ǀkha ǁāǁā xui-ao: ǂAi-altars, Salomob ge kurus, ge khauǁguibas tsî ǂûǁguibas tsî kaub tsîna ǃkhōǂgā ǁoa ge i xui-ao.

⁸Salomob ge ǁnā ǁaeb ǁkhāb ai ǁkhāti kaitsēsa hû tsēdi kōse ge tsēdī tsî Israeli hoaba ǁîb ǀkha, ama kai ǀhaohâ-e, Hamats di ǂgâǃkhaisa xu Egipteb di ǃāb kōse.

⁹Tsî ǁkhaisaǁî tsēs ain ge ǃgâitsē-e ge tsēdī, khais altars disan ge hû tsēdi kōse ge tsēdī tsî kaitsēsa hû tsēdi kōse.

¹⁰Xawe ǀgamdisiǃnonaǀaǁî tsēs hûǁî ǁkhâb dis aib ge ǁaesa ǁîn di omdi ǃoa ge ǁaru kai, ǃgâiaǂgao tsî ǃgâiǂâixase ǁnā ǃgâib, ǃKhūb Davib tsî Salomob tsî Israeli di ǁaes hoas tawa ge dīb hoab ǂama.

¹¹Nētib ge Salomoba ǃKhūb di ommi tsî gao-aob di ommi tsîkha ge dītoa, tsî Salomob di ǂgaob ǃnâ ge hān hoan, ǃKhūb di ommi ǃnâ tsî ǁîb di ommi ǃnâb nî dīna, ǁînab ge ǃgâiǃgâxase ge dī.

¹²Tsî ǃKhūb ge Salomob tawa tsuxuba ge ǂhaiǂhaisen, tsîb ge ǁîba ge mîǀî: Tita ge sa ǀgoresa go ǁnâu tsî ta ge nē ǃkhaisa ǁguiba-omse ge ǁhûiǂuibasen.

¹³ǀHomma ta ga tita ǂganamo, ǀapi-i xare-i hâ tidega, ǂhomna ta ga tita mîmāo, ǃhūban nî hapu, ti, ǂhīǁōba ta ga tita ǁaes ǃnâ sîǂgāo,

¹⁴tsî ti ǁaes, ti ǀons ge ǁîs ǂama ǂgaihes, ga ǃgamǃgamsen tsî ǀgore tsî ti aisa ôa tsî ǁîs di ǂkhaba daoga xu ǃhobaseno, o ta ge tita ǀhomma xu ǁnâu tsî nî ǁîna ǀûba tsî nî ǃhūb âna ǂgauǂgau.

¹⁵Nēsi ra ge ti mûra khowasa tsî ti ǂgaera ǃgaoǃgâse ǀgores nē ǃkhais disa nî ība.

¹⁶Tita ge nēsi nē omma ǁhûiǂuibasen tsî go khai, ti ǀons nî ǁnāpa hâga ǀamosib kōse. Tsî ti mûra tsî ti ǂgaob tsîn ge ǁnāpa nîra hâ mâ tsēs hoasa.

¹⁷Tsî sats ga ti ais aiǃâ taniseno, sa îb Davib ge tanisen khami, hoaragasets ga tita ge mîmā tsin hoan ǃoa dī, tsî ti ǂnûiǂgādi tsî ti ǂhanugats ga ǃkhōǀgaipeo,

¹⁸o ta ge tita sa gaosis di tronsa nî ǁapoǁapo, ǃgaeǀhao-e ta ge sa îb Davib ǀkha dīs ǁkhās xase, mî raǃâ: Aob xarebats ge ǃgaoǁnâ-aihe tide, Israeli di gaosisa xu.

¹⁹Xawe tita xu du ga ǁnāǁgôao, tsî du ga ti mîmādi tsî ti ǂnûiǂgādi, sado ta ge mâi-aiǃâde ǃkhōǀgaipe tama i tsî ǃgû tsî du ga ǀkhara eloga ǃoaba tsî ǁîgu aiǃâ ǃhonǁgoao,

²⁰o ta ge tita ǁîna ǃhūǃnoma ǁnā ǃhūb, tita ge ǁîna māba xu, tsî nē ommi, ti ǀonsa ta ge khaibaba ta ge tita ti aisa xu nîra aoxū tsî ǁîba ǂkhoamîse tsî ǃhōmîse nîra dī ǁaedi ǃnâ.

²¹Tsî nē ommi, ǀgapi ge ib, ǁîb ǂama i ge ǃgû-īǀkhā ka-i hoa-e burugâ tsî: Tare xū-i ǃaromab kha ǃKhūba nē ǃhūb tsî nē ommi tsîkha ǁnāti ge dī-ū? ti nîra mî.

²²On ge nîra mî: ǃKhūb ǁîn îgu di Elob, Egipteǃhūba xu ǁîna ge ǂgaeǂguiǂuiban ge ǁnāxū tsî ge ǀkhara eloga saoǃgon tsîn ge ǁîgu aiǃâ ǃhonǁgoa tsî ǁîga ge ǃoaba amaga, ǁnā-amagab ge ǁîba nē ǂkhaban hoana ǁîn ǂama ge hā kai.