Read Khoekhoegowab 2 Kroniks 8 Bible Online

2 Kroniks 8 - Khoekhoegowab bible

2 Kroniks 8

¹Tsî i ge ǁnā ǀgamdisi kurigu di ǀunis ai ge i, ǁîgu ǃnâb Salomoba ǃKhūb di ommi tsî ǁîb di ommi tsîkha ge ǂnubib ǃnâ,

²Salomob ge ǁnā ǃādi, Hirammi ge ǁîba māde ǂnubi tsî Israeli ôana ǁnāpa ǁan kai ǃkhaisa.

³ǁNās khaoǃgâb ge Salomoba Hamat-Sobas ǃoa ge doeǂoa tsî ǁîsa ge dā.

⁴Tsîb ge ǁkhāti Tadmorsa ge ǂnubi ǃgaroǃhūb ǃnâ tsî ǁuib ǃādi hoadeb ge Hamats tawa ge ǂnubi.

⁵Tsîb ge ǁkhāti ǀgapise hâ Bet-Horons tsî ǃnaga hâ Bet-Horons tsîra ge ǂnubi, ǁaposa ǃāra, ǂnubiǂgoagu tsî ǁāgu tsî ǁkhaeǀurigu tsîna ūhâ ra,

⁶tsî Baalats tsî ǁuib di ǃādi, Salomob ge ūhâ idi hoade tsî kuniǃādi hoade tsî ǃgapi-aogu di ǃāde tsî Salomob ǂnubi ǂgao hâ ide Jerusalems ǃnâ tsî Libanonni tsî ǃhūb ǁîb di gaosis dib hoab ǃnâ.

⁷ǁNā ǁaes, Hetiǁîn, Amorǁîn, Perisiǁîn, Hiviǁîn tsî Jebusǁîn, hîa Israeli di tama ge hâ in xa ge ǃgaun xasa,

⁸ǁîn di ôan, ǁîn khaoǃgâ ǃhūb ǃnâ ge ǃgaun, Israeli ôan xa ge hîkākāhe tama hâ in, ǁînab ge Salomoba ǁguibasa ge mā kai nētsēs kōse.

⁹Xawe Israeli ôan, Salomob ge sîsenni âb ǃnâ khobo dī tama hâ in, toro-ao tsî danakhoen âb di ǂamsa tsî kunidi âb tsî ǃgapi-aogu âb di ǂamsan ge i xui-ao,

¹⁰ǁîn ge Salomob xa mâihe hân di ǂamsa ge i, ǀgamkaidisi tsî korodisin ǁaesa ra gaoǂamna.

¹¹Tsî Salomob ge Faraob ôasa ge ǂoaxa kai Davib di ǃāsa xu ǁnā oms, ǁîsab ge ǂnubibas ǃoa: Ti taras ge Davib, Israeli gao-aob, di ǃās ǃnâ ǁan tide, ǃkhaidi, ǃKhūb di ǂgaes ge ǁîdi tawa hādi a ǃanu xui-ao, tib ge mî amaga.

¹²ǃNubaib ge Salomoba ǃKhūba khauǁguibade ǃKhūb di altars ommi aiǃâb ge ǂnubis ai ge ǁguiba,

¹³mâ tsēs hoas dina ra ǁguibaǃâ Moseb di mîmās ǃoa, sâtsēdi din tsî ǂkham ǁkhâgu din tsî mîmâihesa ǁâutsēdi din hoana, ǃnona ǃnādi kōse kurib ǃnâ: ǀKhuruoǃnâ peregu di kaitsēs ai tsî wekhegu di kaitsēs ai tsî ǁhaogu di kaitsēs ai.

¹⁴Tsîb ge ǁkhāti ǁîb îb Davib di dommi ai ǀgoradi pristergu dide ǁîgu di ǃoabas ǂama ge mâi tsî Leviǁîgu di ǃûis ǂama, Eloba gu nî ǃkhōǀkhāse tsî pristerga gu nî ǃoabase, mâ tsēs hoas ai ǂhâbasa i xase; tsî ǁāb ǃûi-aogu ǁîgu di ǀgoradi ǃnâ mâ dao-ams hoas tawa, nētis ge mîmās Davib, Elob aob disa ge ī i xui-ao.

¹⁵Tsîn ge gao-aob di mîmāsa xu ǂgō tama ge i pristergu tsî Leviǁîgu di ǃkhaidi hoadi xa tsî ǁuigu xa.

¹⁶Nētib ge sîsenni Salomob dib hoaba ge ǁāǁāhe ǃgaoǃgaos ǃKhūb ommi dis di tsēs ǁga tsî dītoas ǁîb dis ǁga, ǃKhūb di ommi nî dītoahega.

¹⁷ǃNubaib ge Salomoba Esion-Gebers ǃoa ge ǃgû tsî Elats ǃoa, hurib amǃgâ ǁgoesa, Edommi di ǃhūb ǃnâ.

¹⁸Tsî Hirammi ge ǁîba ǃgāgu âb di ǃommi ǀkha doe-omga ge sîba tsî ǃgāgu, huriba a ǂan khoega. Tsî gu ge Salomob di ǃgāgu ǀkha Ofiri ǃoa ge ǃgû, tsî gu ge ǁnāpa xu hakakaidisi tsî korodisi talende ǃhuniǀurib xa ge sī-ū tsî ǁîde gao-aob Salomob tawa ge ūhā.