Read Khoekhoegowab 2 Kroniks 9 Bible Online

2 Kroniks 9 - Khoekhoegowab bible

2 Kroniks 9

¹Tsî gao-aos Skebas dis ge Salomob di gomma ǁnâuo, os ge ge hā, Salomobas nî ǀhaedi ǀkha ǃâitsâse Jerusalems tawa, ama ǃgom ǂnubi-i ǀkha tsî ǃnain, ǃgâihamxūn tsî kaise kai ǃhuniǀurib tsî ǃgomǀgausa ǀuidi tsîna tani hân ǀkha, tsîs ge Salomob tawa hā, tsî ǁîb ǀkha ǂgaob âs ǃnâ hân hoan xa ge ǃhoa.

²Tsî Salomob ge ǁîsa ǁîs di mîdi hoade ge mîǃāba; tsî ǀgui xū-i xare-i ge Salomoba ǂganǃgâsaba tama ge hâ i, ǁîsab ge mîǃāba tama hâ i-e.

³Tsî gao-aos Skebas dis ge Salomob di gā-aisiba mûo tsî ommi hîab ge ǂnubiba,

⁴tsî tāb âb di ǂûb tsî ǃgāgu âb di ǂnûb tsî ǃoaba-aon di mâb tsî ǁîn di saran tsî ǁîb di ǁhamaogu tsî ǁîgu di saran tsî ǁîb di ǃgûdaob, ǁîba ūb gere ǃKhūb di ommi ǃoa ǃapab tsîna, os ge ge gagaoǃnâ.

⁵Os ge gao-aob ǃoa ge mî: Ama i ge ǁnā mî-e ge i, ti ǃhūb ǃnâ ta ge sa dīxūn tsî sa gā-aisib tsîn xa ǁnâu-e.

⁶Tsî ta ge ǁnā mîde ǂgom tama ge hâ i, hā tsî ta go ti mûra ǀkha mûs kōse. Tsî mû, ǃkhareb sa gā-aisib di kaisib diba ta ge mîbahe tama go hâ i; sats ge ǁnā gommi hîa ta ge ǁnâuba ǃnā hâ.

⁷ǃGâiǃgâxa gu ge a sa aoga tsî ǃgâiǃgâxa gu ge a sa ǃgāgu, hugaǀgui sa ais aiǃâ mâ tsî sa gā-aisiba ra ǁnâuga.

⁸Ab koahe re ǃKhūb, sa Elob, sa ǃnâ ge ǃgâiǂâisa ūhâ iba, trons âb aib ge gao-aose ǂnûi tsise, ǃKhūb sa Elob ǃaroma. Sa Elob ge Israela a ǀnam tsî ǀamosib kōse nî ǁîba mâikhâi, tsîb ge satsa gao-aose ǁîn ǂama ge mâi ǂhanub tsî ǂhanu-aisibats nî dīse.

⁹Tsîs ge gao-aoba ǀguikaidisi tsî ǀgamdisi talende ǃhuniǀurib xa ge mā tsî kaise ǂgui ǃgâihamxūn tsî ǃgomǀgausa ǀuidi tsîn xa. Tsî gao-aos Skebas dis ge gao-aob Salomoba mā ǃgâihamxūn khami īn ge ge ǀkhai i.

¹⁰ǁNās tawa gu ge Hirammi ǃgāgu tsî Salomob ǃgāgu tsîgu ǃhuniǀuriba Ofira xu ge ūhāga ǁkhāti ǃnaruhain tsî ǃgomǀgausa ǀuide gere ūhā.

¹¹Tsî gao-aob ge ǁnā ǃnaruhain ǀkha ǀgapiǃapadaokha ge dī, ǃKhūb di ommi tsî gao-aob di ommi ǃoa gaukha, tsî harpdi tsî ǀganaǀkhōxūn tsînab ge ǁnae-aoga ge dība. ǁNāti ī xūn ge ǀnai Judab ǃhūb ǃnâ mûhe tama ge hâ i.

¹²Tsî gao-aob Salomob ge gao-aos Skebas disa ǂgaos ran hoana ge mā, ǁîs ra ǂgan xūn hoana, ǁîs ge gao-aoba a ūhāban xa ǃnā hân kōse. Nētis ge ǁîsa ǃhūb âs ǃoa ge ǁaru ǁîs di ǃgāgu ǀkha.

¹³Tsî ǃgommi ǁnā ǃhuniǀurib, Salomob ge ǀgui kurib ǃnâ gere ūhābaheb dib ge ǃnanikaidisiǃnanidisiǃnaniǀa talendi kō ge i,

¹⁴ǁNān, ǁama-aon tsî ǁamaǃkhuni-aon xa gere ūǂgâxahen ose. Tsî Arabiab di gao-aogu hoagu tsî ǁnā ǃhūb di gaosagu ge ǁkhāti ǃhuniǀurib tsî ǀhaiǀurib tsîkha Salomoba ge ūhāba.

¹⁵ǁKhātib ge gao-aob Salomoba ǀgamkaidisi khōsikhōga ge dī, ǂnauhe hâ ǃhuniǀurib ǀkha, ǃnanikaidisi sekeldeb ge ǃhuniǀurib xa mâ khōsikhōb hoaba ge ǀnē kaiba.

¹⁶ǁNās ǁkhās xase ǃnonakaidisi khōsikhōga ǂnauhe hâ ǃhuniǀurib xa ǃnonakaidisi sekeldeb ge ǃhuniǀurib xa mâ khōsikhōb hoaba ge ǀnē kaiba; tsî gao-aob ge ǁîga haiǀgoms Libanonni dis di ommi ǃnâ ge ǁgui.

¹⁷Tsî gao-aob ge ǁkhāti kai ǂkhoaǁgû tronsa ge dī, tsîb ge ǁîsa ǃūmû ǃhuniǀurib ǀkha ge ǃkhûǀkhā.

¹⁸Tsî trons ge ǃnani ǃapa-ūdade ge ūhâ i tsî ǂaiǂnûidas ǃhuniǀurixas, trons tawa ǁapo hâsa, tsî ǃgâsenhaikha ǃnamkha hoakha ai ǂnûǃkhais kōse; tsî ǀgam xamkha ge ǃgâsenhaikha ǃgao ge mâ i.

¹⁹Tsî disiǀgamǀa xamgu ge ǁnāpa, ǃnani ǃapa-ūdadi ai hoa ǃnamkha ai ge mâ i. ǁNāti ī xū-i ge ǀnî gaosi-i xare-i ǃnâ dīhe tama ge hâ i.

²⁰Tsî āǃnâxapan gao-aob Salomob din hoan ge ǃhuniǀuri ge i, tsî xapan haiǀgoms Libanonni dis di ommi din ge ǃgomǀgausa ǃhuniǀuri ge i; ǀhaiǀuri-i ge Salomob di tsēdi ǃnâ xūse ǃgôahe tama hâ i xui-ao.

²¹Gao-aob di doe-omgu ge Hirammi di ǃgāgu ǀkha Tarsis ǃoa ǃgâu xui-ao. ǀGui ǃnās ǀguisa gu ge doe-omga ǃnona kurigu ǃnâ gere ǂgâxa, tsî ǃhuniǀurib tsî ǀhaiǀurib tsî ǂkhoaǁgûgu tsî ǁoregēgu tsî ǃhuigu tsîna gere ūhā.

²²Nētib ge gao-aob Salomoba ǃhūbaib di gao-aogu hoagu ǃgâ-ai ge kai, ǃkhūsib ǃnâ tsî gā-aisib ǃnâ.

²³Tsî gao-aogu ǃhūbaib digu hoagu ge Salomob di aisa ge ôa, ǁîb di gā-aisib, Elob ge ǂgaob âb ǃnâ māba gu nî ǁnâuga.

²⁴Tsîn ge mâ-i hoa-i âna ǁî-i di ǀkhaexū-e gere ūhā: ǀHaiǀurixapan, ǃhuniǀurixapan, saran, ǁâtanin, ǃgâihamxūn, hān tsî hā-eseln tsîna, mâ xū-i hoa-e kuriba xu kurib ǃoa.

²⁵Tsîb ge Salomoba ǁkhāti hakaǀoadisi hāǃharagu tsî kunidi tsîna ge ūhâ i tsî disiǀgamǀaǀoadisi ǃgapi-aoga, tsîb ge ǁîga kuniǃādi ǃnâ ge ǁgui tsî gao-aob tawa Jerusalems ǃnâ.

²⁶Tsîb ge gao-aogu hoaga ge gaoǂam ǃāba xu Filisteǁîn di ǃhūb kōse tsî Egipteb di ǀkharib kōse.

²⁷ǁKhātib ge gao-aoba ǀhaiǀuriba Jerusalems ǃnâ ǀui-i ase ge dī tsî sederhaideb ge ǀgowehaidi, ǃgoaǃnāb ǃnâ ǀoasase hâdi ase ge dī.

²⁸Tsî gu ge hāna Salomoba ge ūhāba Egipteba xu tsî ǁnā ǃhūgu hoaga xu.

²⁹Tsî nau xūn Salomob di ǃnaeǃkhaidi din, ǂguron tsî ǀunin, ǁîn ge xoahe hâ Natanni, kēbo-aob di ǂkhanidi ǃnâ tsî kēbosis Ahiab, Silonǁîb dis ǃnâ tsî aidi Idob, mû-aob didi ǃnâ Jerobeammi, Nebati ôab xasa.

³⁰Tsî Salomob ge Jerusalems ǃnâ Israeli hoab ǂama hakadisi kuriga gere gaosîsen.

³¹Tsî Salomob ge ge ǁō, tsîb ge ǁîb îb Davib di ǃās ǃnâ ge ǁkhōhe, tsî ǁîb ôab Rehabeammi ge ǁîb ǃās ǃnâ ge gao-ao kai.