Read Khoekhoegowab Esrab 1 Bible Online

Esrab 1 - Khoekhoegowab bible

Esrab 1

¹ǂGuro kurib Koreb, Persiab gao-aob dib ǃnâb ge ǃKhūba, ǁîb di mîs, Jeremiab di amsa xu ge ǀkhīs nî dīǀoaǀoahega, gagas Koreb, Persiab di gao-aob disa ge ǂkhaiǂkhaikhâi, îb ǂanǂan-e gaosis âb hoab ǃnâ ǂoa kai, ti, xoas on ǃnâ, mî rase:

²Nētib ra Koreb, Persiab di gao-aoba mî: ǃKhūb ǀhommi di Elob ge tita gaosidi ǃhūbaib didi hoade ge mā, tsî ǁîb ge tita ge mîmā, omma ta nî Jerusalems Judab ǃnâ hâs ǃnâ ǂnubiba bisa.

³Sadu ǁaegu ga ǁÎb ǁaes di-i hoa-e, ab ǁî-i di Eloba ǁî-i ǀkha hâ, î-i doeǂoa, Jerusalems Judab ǃnâ hâs ǃoa, î-i ǃKhūb, Israeli Elob di omma ǂnubi, ǁîb ge ǁnā Elob, Jerusalems ǃnâ ǁan hâba.

⁴Tsî ǃonkhao ga hâ-i hoa-i, ǃā-i ǃhaokhoese-i ga hâ-i hoa-i tawa, ǁî-en ge ǁnā ǃās â-i di khoena nî ǂkhâǃnâ, ǀhaiǀurib tsî ǃhuniǀurib ǀkha tsî xūn ǀkha tsî ǀgoan ǀkha, ǁkhāti māsenxa ǁguibas ǀkha Elob, Jerusalems tawa ǁan hâb di ommi ǃaroma.

⁵ǃNubai gu ge Judab tsî Benjaminni tsîkha di danagu tsî pristergu tsî Leviǁîgu tsîga ge khâi, tsî mâ-i hoa-i, Elob xa ǂkhaiǂkhaihe hâ gagas â-i-i ǃgûǃapa, tsîn ǃKhūb, Jerusalems tawa ǁan hâb di omma nî ǂnubise.

⁶Tsî ǁîn ǂnamipe hân hoan ge ǃomgu âna ge ǀgaiǀgai ǀhaiǀurisoan ǀkha tsî ǃhuniǀurib ǀkha tsî xūn ǀkha tsî ǀgoan ǀkha tsî ǃgomǀgausa xūn ǀkha, ǁnān, māsenxase ra māhen tsîn ose.

⁷ǁKhātib ge gao-aob Koreba ǁnā xapan ǃKhūb ommi din, Nebukadnesari Jerusalemsa xu ge ūbēn tsî ǁîb elob di ommi ǃnâb ge mâina ge ūhā.

⁸Tsî Koreb, Persiab di gao-aob ge ǁîna Mitredati, ǁuiǃkhōmâi-aob, di ǃommi ǀkha ūǀkhī tsî Sesbasari, Judab di gaosaba ǁîna ge ǃgôaba.

⁹Tsî nēb ge ǁîn di ǃgôaba: ǃNonadisi ǃhuniǀuriǃoredi, ǀguiǀoadisi ǀhaiǀuriǃoredi, ǀgamdisikhoeseǀa gôadi,

¹⁰ǃnonadisi ǃhuniǀuriǀgabidi, hakakaidisi tsî disi ǀhaiǀuriǀgabidi ǀnîdi, tsî nau soan xa ǀguiǀoadisina.

¹¹Xapan, ǃhuniǀurin tsîn ǀhaiǀurin tsîn hoan din ge koroǀoadisi tsî hakakaidisin kō ge i. Nēn hoanab ge Sesbasara ge ūǃgû ǁnān, ǃkhōsisa xu Babiloniaba xu Jerusalems ǃoa ge ūǂoahen ǀkha.