Read Khoekhoegowab Esrab 10 Bible Online

Esrab 10 - Khoekhoegowab bible

Esrab 10

¹Tsî Esrab ge nēti ǀgore tsî nē ǁguiǁnâsa ge dī, ā tsî Elob ommi aiǃâ ǃhūb ai ra aoǁguisense, ob ge ama kai ǀhaohâba Israela xu ǁîb tawa ge ǀhao, aogu xa tsî taradi xa tsî ǀgôan xa, ǁaes ge ama kai āsa ā xui-ao.

²Ob ge Sexanjab, Jehieli ôab, Elammi ôagu di ǀguiba ǃeream tsî Esrab ǃoa ge mî: Sige ge ge ǃûǂam sige di Elob ǃoagu, tsî sige ge ǃhao taradi nē ǃhūb di ǁaedi dide sige tawa ge ǁan kai, tsî ǁnāti i ī xawe i ge ǃâubasen-e Israela hâba nē ǃkhais xa.

³A ge ǁnâi ǃgaeǀhao-e dī sage di Elob ǀkha, î ge ǁnā taradi hoadi tsî ǁîdi xa ǁorahe hân hoana ǂoa kai ǃKhūb di ǀapes ǃoa, tsî ǁnān, mîmās sida Elob dis aiǃâ ra ǀkhūn dis ǃoa, î-i ǁnâi dīhe ǂhanub ǃoa.

⁴Khâi, nēs a sa ǃkhai xuige, o ge ge sige sa ǀkha nî hâ. ǀGai îts dī.

⁵ǃNubaib ge Esraba khâi tsî pristergu di ǂamsagu tsî Leviǁîgu tsî Israeli hoaba ge nū kai, nē mîs ǃoan nî dīsa, on ge ge nū.

⁶Ob ge Esraba Elob ommi aiǃâba xu khâi tsî Johananni, Eljasib ôab di ǃnā-oms ǃoa ge ǃgû, tsî ǁnāpab ge sīo, ob ge pere-i xare-e ǂû tama tsî ǁgam-i xare-e ā tama ge i, ǂgaeǂguibēsan di ǃûǂams ǃaromab ra ǃhausen amaga.

⁷Tsîn ge ǂanǂan-e ge ǂoaǃganu kai Judab tsî Jerusalems tsîra hoara ǃnâ, ǃkhōsis di ôan hoan ǃoa, în Jerusalems tawa ǀhû ti.

⁸Tsî ǃnona tsēdi ǃnâ ga gaosagu tsî kaigu di ǀapes ǃoa hā tama i-i hoa-i, ǁî-i di xūn hoan ge nîra ǀâxarehe, tsî ǁîb ǂûb ge ǂgaeǂguibēhe gen di ǀhaohâba xu nîra ǁkhaebēhe.

⁹ǁGoasi gu ge aogu Judab tsî Benjaminni tsîkha digu hoaga ǃnona tsēdi ǃnâ Jerusalems tawa ge ǀhao; ǁî-i ge khoeseǁî ǁkhâb ǃnâ ge ī ǀgamdisiǁî tsēs ǁkhâb dis ai, tsî ǁaes hoas ge daob Elob ommi ǃoa gaub dib ai ge ǂnôa i nē ǃkhais xa tsî tūǀnanub xa ra ǀkhūse.

¹⁰ǃNubaib ge Esrab, pristera, khâi tsî ǁîgu ǃoa ge mî: Sago ge ge ǃûǂam, ǃhao tarade sago ǀkha ǁan kais ǀkha, Israeli di ǀhapis nî ǃaruǀî kaiga.

¹¹Î go ǁnâi ǃKhūb, sago îgu di Elob aiǃâ ǁguiǁnâ, î go ǃgâiba bi a ǃkhaisa dī, î go ǀgorasen ǁaedi nē ǃhūb dide xu tsî ǃhao tarade xu.

¹²Ob ge ǀhaohâb hoaba ǃeream tsî ǃgari dommi ǀkha ge mî: Sa mîdi ǃoa dīs ge a anuba da.

¹³Xawe ǁaes ge a kai, tsî nēb ge tūǀnanub di ǁaeba khoe-i ǃauga a mâ ǁoas kōse, tsî sîsenni ge ǀgui tsēs di tsî ǀgam tsēra di tamaba, ǂguige âge ge ge ǃûǂam nē ǃkhais ǃnâ xui-ao.

¹⁴A gu sige gaosagu ǀhaohâb diga mâ nē ǃkhais ǂama, î gu ǁnāgu, ǃādi ǃnâ hâgu hoagu ǃhao tarade ǁîgu tawa ge ǁan kaiga mîmâihesa ǁaegu ai hā tsî ǁîgu ǀkha kaigu mâ ǃās hoas digu tsî ǁîs di ǂhanuǂhanu-aogu tsîga, sige xu ge nî ǀgamsib sige Elob ǁaib dib, nē ǃkhaidi ǂama hâba ǁkhaedawas kōse.

¹⁵O kha ge Jonatanni, Asaeli ôab, tsî Jehasiab, Tikvab ôab tsîkha ǀguikha ǁî ǃkhaisa ge mâǃoa, tsî Mesulammi tsî Sabetaib, Leviǁîb tsîkha ge ǁîkha ge hui.

¹⁶Xawe ǀgôagu ǃkhōsis digu ge ǁnāti ge dī, tsî Esrab, pristeri, ge aoga ge ǁhûiǂuibasen danagu ǁgûgu diga ǁîgu îgu omgu ǃoa, tsî ǁîgu hoagu ge ǀondi ǀkha ra ǂgaiheǃâ ge khaihe, tsî gu ge ǂguro tsēs disiǁî ǁkhâb dis ai ge ǂnû, nē ǃkhaisa gu nî ôaǃnâse,

¹⁷tsî gu ge ǁî ǃkhaisa ǁnā aogu, ǃhao tarade ǁîgu tawa ge ǁan kaigu hoagu ǀkha ge dītoa ǂguro tsēs, ǂguro ǁkhâb dis ai.

¹⁸Tsî gu ge pristergu di ôagu xa ge hōhe, ǃhao tarade ǁîgu tawa ge ǁan kaiga: Jesuab, Josadaki ôab, tsî ǁîb di ǃgâsagu Maasejab, Elieseri, Jarib tsî Gedaljab tsîga.

¹⁹Tsî gu ge ǃommi âga ge mā, ǁîgu di tarade gu nî ǂoa kai ǃkhaisa, tsî ǀhapixa hâǃâ gu ge ǀgui bairab gūn diba ǁîgu di ǀhapis ǃaroma ge ǁguiba.

²⁰Tsî ǀgôan Imeri din xa: Hananni tsî Sebadjab tsîkha.

²¹Tsî ǀgôan Harimmi din xa: Maasejab, Eliab, Semajab, Jehieli tsî Usiab tsîga.

²²Tsî ǀgôan Pashuri din xa: Eljoenaib, Maasejab, Ismaeli, Netaneli, Josabadi tsî Eleasab tsîga.

²³Tsî Leviǁîgu xa: Josabadi, Simib, Kelajab (ǁnāb ge Kelitab), Petaxjab, Judab tsî Elieseri tsîga.

²⁴Tsî ǁnae-aogu xa: Eljasib. Tsî ǁāb ǃûi-aogu xa: Salummi, Telemmi tsî Urib tsîga.

²⁵Tsî Israeli xa: ǀGôan Parob din xa: Ramjab, Jisiab, Malkiab, Mijaminni, Eleasari, Malkiab tsî Benajab tsîga.

²⁶Tsî ǀgôan Elammi din xa: Matanjab, Saxariab, Jehieli, Abdib, Jeremoti tsî Eliab tsîga.

²⁷Tsî ǀgôan Satub din xa: Eljoenaib, Eljasib, Matanjab, Jeremoti, Sabadi tsî Asisab tsîga.

²⁸Tsî ǀgôan Bebaib din xa: Johananni, Hananjab, Sabaib tsî Atlaib tsîga.

²⁹Tsî ǀgôan Banib din xa: Mesulammi, Maluxi, Adajab, Jasub, Seali tsî Jeremoti tsîga.

³⁰Tsî ǀgôan Pahat-Moab din xa: Adnab, Kelali, Benajab, Maasejab, Matanjab, Besaleeli, Binuib tsî Manaseb tsîga.

³¹Tsî ǀgôan Harimmi din xa: Elieseri, Jisiab, Malkiab, Semajab, Simeonni,

³²Benjaminni, Maluxi tsî Semarjab tsîga.

³³ǀGôan Hasummi din xa: Matenaib, Matatab, Sabadi, Elifeleti, Jeremaib, Manaseb tsî Simib tsîga.

³⁴ǀGôan Banib din xa: Maadaib, Amrammi tsî Ueli,

³⁵Benajab, Bedjab, Keluhib,

³⁶Vanjab, Meremoti, Eljasib,

³⁷Matanjab, Matenaib, Jaasaib,

³⁸Banib, Binuib, Simib,

³⁹Selemjab, Natanni, Adajab,

⁴⁰Maxnadebaib, Sasib, Saraib,

⁴¹Asareli, Selemjab, Semarjab,

⁴²Salummi, Amariab tsî Joseb tsîga.

⁴³ǀGôan Nebob din xa: Jeieli, Matitjab, Sabadi, Sebinab, Jadaib, Joeli tsî Benajab tsîga.

⁴⁴Nēgu hoagu ge ǃhao tarade ge ūga, tsî ǀnîgu âgu ge tarade ge ūhâ i, ǀgôana ge ǁîga ǁorabade.