Read Khoekhoegowab Esrab 3 Bible Online

Esrab 3 - Khoekhoegowab bible

Esrab 3

¹Tsî hûǁî ǁkhâb ge hā tsî Israeli ôan ge ǃādi ǃnâ hâ ǃnubais ge ǁaesa ǀguiǂâixase Jerusalems tawa ge ǀhû.

²Tsî Jesuab, Josadaki ôab ge ge khâi tsî ǁîb di ǃgâsagu, pristergu, tsî Serubabeli, Sealtieli ôab, tsî ǁîb ǃgâsagu tsîn ge altars Israeli Elob disa ge ǂnubi, ǁîs ain khauǁguibade nî ǁguibase, Moseb, eloǃaoǃgâxa aob, di ǂhanub ǃnâ xoahe hâse.

³Tsîn ge altarsa ǃkhais âs ai ge ǁapoǁapo, xawen ge ǃhurib, ǃhūgu di ǁaedi ǂama ǁîn ai hâb ǀkha gere dī, tsîn ge ǁîs ai khauǁguibade ǃKhūba gere ǁguiba, ǁgoaga tsî ǃuia.

⁴Tsîn ge ǁhaogu di kaitsēsa gere tsēdī, xoahe hâse, tsîn ge khauǁguibade tsēkorobe gere ǁguiba ǃgôab ǃnâ ǂhanub ǃoa, mâ tsēs hoas ai ra ǁguibase.

⁵ǁNās khaoǃgâ ǁkhāti tsēkorobe ra dīhe khauǁguibasa tsî ǂkham ǁkhâgu tsî ǂnûihesa ǀgapiǁaegu ǃKhūb digu, khaihe hâgu hoaga anuba hâsa; tsî mâ-i hoa-i māsenxase ǃKhūba māsenxa ǁguibade ra ǁguiba-i hoa-e anuba hâsa.

⁶ǂGuro tsēs hûǁî ǁkhâb dis ain ge khauǁguibade ǃKhūba ge ǁguibatsoatsoa, xawe ǃgaoǃgaob ǃKhūb tempeli dib ge ǁguihe tama ge hâ i.

⁷On ge ǀuiǁhā-aogu tsî sîsenaogu tsîna mariba ge mā tsî ǂûn tsî āxūn tsî olib tsîna, Sidonǁîga tsî Tireǁîga sederhain xa gu nî Libanonna xu huriba ū Jopas ǃoa ūhāse, Koreb, Persiab gao-aob, ge ǁîna mā-amse.

⁸Tsî disiǀgamǁî kurib ǃnâ Elob ommi, Jerusalems tawa hâb ǁgan ge hās khaoǃgâ, ǀgamǁî ǁkhâb ǃnâb ge Serubabeli, Sealtieli ôab, tsî Jesuab, Josadaki ôab, tsî nau ǃgâsagu ân, pristergu tsî Leviǁîgu, tsî ǃkhōsisa xu ge Jerusalems tawa hān hoana ge tsoatsoa, tsîn ge Leviǁîga ge mâi ǀgamdisi kurigu â-iba xu ǁnāsa ǃnā hâb kōse, ǃKhūb ommi di sîsenna gu nî kōǂamse.

⁹ǃNubaib ge Jesuab tsî ǁîb di ôagu tsî ǁîb di ǃgâsagu tsî Kadmieli ǁîb di ôagu ǀkha, Judab di ôana ǀguiǂâixase ge mâ i, kōǂam gu nîse ǁnāgu Elob ommi tawa sîsenna ra dīga, Henadadi di ôagu ǀkha ǁîgu di ôagu tsî ǁîgu di ǃgâsagu, Leviǁîgu ǀkha.

¹⁰Tsî ǂnubi-aogu ge ǃgaoǃgaob ǃKhūb tempeli diba ǁguio, o gu ge pristerga anasen hâse ǀgapadadi ǀkha ge mâ i tsî Leviǁîgu, Asafi ôagu, simbaln ǀkha, ǃKhūba gu nî ǃkhōǀkhāse Davib, Israeli gao-aob di ǂnûiǂgās ǃoa.

¹¹O gu ge ǃnādi ai ge ǁnae, ǃKhūba ra koa tsî ganganǃâ: ǁÎb ge a ǃgâi; tsî ǀkhomxaǂgaosib âb ge ǀamosib kōse Israeli ǂama hâ. Tsî ǁaes hoas ge kaise ge dâ, ǃKhūban ge ǃKhūb ommi di ǃgaoǃgaob ǂama gere ǃkhōǀkhā hîa.

¹²Xawe ǂguigu pristergu digu tsî Leviǁîn digu, ǁgûgu di danagu kairagu, ǂguro omma ge mûgu, ǁîgu ge nē ommi ǁîgu di mûdi aiǃâ ra ǃgaoǃgaohe hîa ǃgari dommi ǀkha ge ā, xawe ǂguin ge domma dâb tsî ǃgâiaǂgaob ǀkha ge ūkhâi.

¹³ǁAes ge ǃgâiaǂgaosa dâb di domma ās ǁaes dis di domma xu ǁnâuǃā ǁoa is kōse, ǁaes ge kaise gere dâ xui-ao, dommi ân ge ǃnūse gere ǁnâuhes kōse.