Read Khoekhoegowab Esrab 4 Bible Online

Esrab 4 - Khoekhoegowab bible

Esrab 4

¹Tsî mâǃoasaben Judab tsî Benjaminni tsîkha din ge ǁnâu, ǃkhōsis di ôan ǃKhūb, Israeli di Eloba tempela ge ǂnubiba ǃkhaisa,

²on ge Serubabeli tawa tsî ǁgûgu di danagu ǃoa hā tsî ǁîgu ǃoa ge mî: A da sida sadu ǀkha ǂnubi, sida ge sadu di Eloba sadu ǂûdu khami nî ôa xuige, sida ge ǁkhāti ǁîba ge ǁguiba Esar-Hadonni, Asiriab di gao-aob, nēpa ge doehā kai dab di tsēde xu.

³Xawe Serubabeli tsî Jesuab tsî nau danagu, Israeli îgu digu ge ǁîna ǃoa ge mî: Anu tama hâ, sida nî sadu ǀkha sida Eloba omma ǂnubiba ǃkhaisa; a da sida ǀguri ǃKhūb, Israeli di Eloba omma ǂnubiba, gao-aob Koreb, Persiab di gao-aob ge sida mîmāse.

⁴Os ge ǃhūb di ǁaesa Judab ǁaes di ǃomga ǃopo kai tsî ǁîna omma ǂnubis ǃnâ ge ǃhuriǃhuri.

⁵Tsîn ge ǁîn ǃoagu ǀapemā-aoga ge ǃgae, ǁîn di ǀapesan nî hîkākāse, Koreb, Persiab di gao-aob di tsēde xu Dariub, Persiab gao-aob di gaosis kōse.

⁶Tsî Ahasverob di gaosis ǃnâ, ǁîb di gaosis di tsoatsoas ǃnân ge ǀanaǃgâxoa-e ge xoa, Judab tsî Jerusalems tsîra di ǁansaben ǃoagu.

⁷Tsî Artasastab di tsēdi ǃnâ gu ge Bislammi tsî Mitredati tsî Tabeeli tsî nau horesagu âgu tsîna Artasastab, Persiab gao-aob ǃoa ge xoa. Tsî xoas ǂkhanis dis ge Siriagowab ǃnâ ge xoahe hâ i, tsî Siriagowab ǃnâ ge ǁguiǃāhe hâ i.

⁸Rehummi, ǂkhanisâu-aob, tsî Simsaib, xoa-aob tsîkha ge ǂkhani-e ge xoa Artasastab ǁga Jerusalems ǃoagu nē dommi ai:

⁹Rehummi ǂkhanisâu-aob, tsî Simsaib, xoa-aob tsîkha tsî nau horesan âkha, Dinaiǁîn, Afarsatǁîn, Tarpeliǁîn, Afarǁîn, Erekǁîn, Babilonǁîn, Susaǁîn, Elamǁîn,

¹⁰tsî nau ǁaedi tsîn, ǁnā kai tsî gomxa Asnapari ge ǂgaeǂguibē tsî ǃās Samarias ǃnâ ge ǁan kai nî tsî ǁkhāti ǃāb nēxa ǃnanib ai ǁnā ǁaeb ǁkhāb ai.

¹¹Nēs ge xoaǁnâs ǁnā ǂkhanis, gao-aob Artasastab ǃoan ge sîs disa. Gao-aob Artasastab ǃoa, sa ǃgāge, ǃāb nēxa ǃnanib di aoge ge ra tawede tsi:

¹²Îts gao-aotsa ǂan, ǁnā Jodeǁîn, satsa xu ge doeǀkhīn ge sida ǁga Jerusalems tawa hā ǃkhaisa, ǁnā mâǃoaxa tsî ǁnā ǂkhaba ǃāsa ra ǂnubise tsî ǂnubiǂgoagu âsa ra dītoase tsî ǃgaoǃgaode ra dī-unuse.

¹³Îts ǁnâi gao-aotsa ǂan, nē ǃās ga ǂnubihe, tsî ǂnubiǂgoagu ga dītoaheo, on ge ǁîna ǁguibas tsî ǁguiǂamsa marib tsî gaosib marisa mā tide ǃkhaisa. Ots ge ǁgui-aimarin gao-aogu dina nî ǂkhôahe.

¹⁴Tsî nēsi ǂō-e ge ge matares ase gao-aots di omma xu ra hō tsî gao-aots ra sorahe ǃkhaisa ge ge mû ǁoa, amaga ge ge go sî tsî ǁîsa gao-aotsa go ǂanǂan.

¹⁵An ǁaeb ǃnaeǃkhaidi sa îgu didi ǃnâ ôa, ots ge ǂkhanis ǁaeb ǃnaeǃkhaidi dis ǃnâ nîra hō tsî ǂan, nē ǃās ge mâǃoaxa ǃā i ǃkhaisa tsî gao-aogu tsî ǃhūǃâdes ǂkhôa tsî ge ǁnāǁgôa kai ǃkhaisa hugasa xu; ǁnā-amagas ge nē ǃāsa ge hîǀhuruhe.

¹⁶O ge ge gao-aotsa ra ǂanǂan, nē ǃās ga ǁkhawa ǂnubihe tsî ǂnubiǂgoagu âs ga dītoaheo, ots ge satsa ǁî ǃkhaisa xu ǃāb nau ǃnanib ai amǃnâ-i xare-e ūhâ tide.

¹⁷ǁGoasib ge gao-aoba nē ǃereamsa ge sî: Rehummi, ǂkhanisâu-aob, tsî Simsaib, xoa-aob tsîkha tsî nau horesan âkha hîa Samarias tawa ǁan hân tsî naun ǃāb nēxa ǃnanib ai ǁan hâna: ǂKhîb tawedes tsî aiǃâ.

¹⁸ǁNā ǂkhanis, sida du ge sîbas ge ǃgāsase ti aiǃâ ge khomaihe.

¹⁹Tsî mîmā ta geo, on ge ôa tsî ge hō, ǁnā ǃās hugasa xu gao-aogu ǃoagu ra khâima tsî mâǃoaxa tsî ra ǁnāǁgôa ǃkhaisa.

²⁰ǁKhāti gu ge ǀgaisa gao-aoga ge hâ i Jerusalems ǂama, ǃāb nau ǃnanib ai mâ ǃkhai-i hoa-i tawa gere gaosîsenga, tsî gu ge ǁguiǂams tsî ǁgui-aimarib tsî gaosis marib tsîna ge māhe.

²¹ǁNâi nēsi mîmā ǁnā aoga, î gu ǀû ǁnā ǃāsa ǂnubisa, tita xus mîmāsa nî ǂoas kōse,

²²ǂanbasen î go nē ǃkhais ǃnâ tā dīsā. Tarexab kha ǁgaoǁgaosiba nî kai gao-aogu di ǂkhôase?

²³ǃNubai gu ge, Artasastab di ǂkhanis di xoaǁnâs ge khomaihe Rehummi tsî Simsaib xoa-aob tsîkha tsî horesan âkha aiǃâo, ǃhaese Jerusalems ǃoa Jodeǁîn ǁga ǃgû tsî ǁîna ǁgaris tsî ǀgaib tsîra ǀkha ge ǃkhâi.

²⁴ǃNubaib ge sîsenni Elob ommi, Jerusalems tawa hâb diba ge mâ, ā, ǀgamǁî kurib Dariub, Persiab gao-aob di gaosis dib ǃnâb ge ǁîba ge mâ.