Read Khoekhoegowab Esrab 5 Bible Online

Esrab 5 - Khoekhoegowab bible

Esrab 5

¹Tsî Hagaib, kēbo-aob, tsî Saxariab, Idob ôab tsîkha, kēbo-aokha ge Jodeǁîn, Judab tsî Jerusalems tsîra tawa hâna ge kēboba, ǀons Israeli Elob dis ǃnâ kha ge ǁîkha ǁîna ge kēboba.

²ǃNubai kha ge Serubabeli, Sealtieli ôab, tsî Jesuab, Josadaki ôab tsîkha khâi tsî Elob ommi, Jerusalems tawa hâba ge ǂnubitsoatsoa, ǁnā kēbo-aogu Elob digu ǁîkha ra mâǃgâgu ǀkha.

³ǁNā ǁaeb ǁkhāb ai kha ge Tatenaib, ǃhūǃkhōmâi-aob ǃāb nēxa ǃnanib dib tsî Setar-Bosnaib tsî ǁîkha di horesana hā tsî ǁîn ǃoa nēti ge mî: Tari-e mîmā du hâ, nē omma ǂnubi tsî du nē ǂnubiǂgoaba nî dītoa ǃkhaisa?

⁴O da ge sida ǁnās ǃoa ǀonde ge mā, nē omma ra ǂnubi aogu dide.

⁵Xawe mûs ǁîra di Elob dis ge kaigu Jodeǁîn digu ai ge hâ i, on ge ǁîna ǃkhâi tama ge i, ǃkhais ge Dariub tawa sī tsî ǂkhani-en ge ǁî ǃkhais xa ǁkhawa ūhās kōse.

⁶Xoaǁnâs ǁnā ǂkhanis, Tatenaib, ǃhūǃkhōmâi-aob ǃāb nēxa ǃnanib ai tsî Setar-Bosnaib tsî horesan âkha Afarsexaǁîn, ǃāb nēxa ǃnanib ai hân, ge gao-aob Dariub ǃoa sîs dis ge nēsa.

⁷ǃNuri-en ge ǁîb ǃoa ge sî. ǁÎ-i ǃnâ i ge nēti ge xoahe hâ i: Ab Dariuba ǂkhîb hoaba ūhâ!

⁸Îts gao-aotsa ǂan, Judab di ǃhūǃâs ǃoa da ge ǃgû ǃkhaisa, ǁnā kai Elob di ommi, hîa kai ǀuidi ǀkha ra ǂnubiheb tsî haib hîa ǂgoagu âb ǃnâ ra ǁguiheb ǃoa, tsî ǁnā sîsenni ge ǃhaese ra dīhe tsî ǁîn di ǃomǁae ra ǃgâiǃgâ.

⁹ǃNubai da ge sida ǁnā kaiga dî tsî nēti ǁîgu ǃoa ge mî: Tari-e mîmā du hâ nē omma du nî ǂnubi tsî ǂnubiǂgoaba du nî dītoa ǃkhaisa?

¹⁰ǃAruǀî da ge ǁkhāti ǁîgu di ǀonde ge dî, satsa da nî ǁkhāti ǁîde ǂanǂanse, ǀondi ǁnā aogu, ǁîn ǃnâ a danagu dide da nî xoa ǁkhāse.

¹¹On ge nēti ǃeream tsî ge mî: Sida ge ǃgāda ǀhommi tsî ǃhūbaib tsîkha Elob dida, tsî da ge ǁnā ommi, ǂgui kuriga nēs aiǃâ ge ǂnubihe hâ iba ra ǂnubi, gao-aob kaib Israeli dib ge ǁîba ǂnubi tsî ge dītoa xui-ao.

¹²Xawe sida di îgu ge Elob ǀhommi diba ǁaiǁai, ǃnubaib ge ǁîba ǁîna Nebukadnesari, Babiloniab di gao-aob,

¹³Xaldeaǁîb ǃomǁae ge mā, nē omma hîǀhuru tsî ge ǁaesa Babilons ǃoa ūǃgûba. Xawe ǂguro kurib Koreb, Babiloniab di gao-aob dib ǃnâb ge gao-aob Koreba ge mîmā nē ommi Elob dib nî ǂnubihe ǃkhaisa.

¹⁴Ā, ǁnâ soadi Elob ommi didi, ǃhuniǀuri tsî ǀhaiǀuridi, Nebukadnesari ge tempeli Jerusalems tawa ge hâ iba xu ū tsî ǁîde Babilons di tempeli ǃoa ūsīdi, ǁîdeb ge gao-aob Koreba Babilons di tempela xu ūǂui tsî ǁîde aob Sesbasar ti ǀon hâb, ǃhūǃkhōmâi-aoseb ge mâib ǃomǁae ge mā.

¹⁵Tsîb ge ǁîb ǃoa ge mî: Nē soade ū îts ǁîde ǁnā tempeli, Jerusalems tawa hâb ǃoa ūǁgôa, îb Elob di omma ǁîb di ǃkhais ai ǂnubihe.

¹⁶ǃNubaib ge Sesbasara ge sī; tsîb ge ǁnā Elob ommi, Jerusalems tawa hâb di ǃgaoǃgaode ge ǁgui, tsî ǁnā ǁaeba xu nēsis kōseb ge ra ǂnubihe, xawe gorose dītoahe tama hâ.

¹⁷Tsî nēsi, sats gao-aots ga ǃgâibaheo, an ǁnāna ôa ǁuib sâu-ommi gao-aots dib, Babilons tawa hâb ǃnâ, ise i ge mîmā-e gao-aob Koreba xu ǂoasa, nē ommi Elob dib nî Jerusalems ǃnâ ǂnubihe ǃkhaisa. Î da ǁî ǃkhais xa gao-aots di ǃgâiǂâisa xu sîbahe.