Read Khoekhoegowab Esrab 6 Bible Online

Esrab 6 - Khoekhoegowab bible

Esrab 6

¹ǁGoasib ge gao-aob Dariuba mîmā-e ge dī, on ge ge ôa ǂkhanisâu-ommi ǃnâ, ǁuib ǁîb ǃnâ ge sâuhe hâ iba Babiloniab ǃnâ.

²O i ge Ekbatanas tawa ǁaposa ǃkhais, Mediaǃhūǃâs ǃnâ ǁgoes ǃnâ xamisa ǂkhani-e ge hōhe, nēti ǁî-i ǃnâ xoahe hâ-e: ǂÂiǂâisens:

³ǂGuro kurib gao-aob Koreb dib ǃnâb ge gao-aob Koreba nē mîmāsa ge mā, Elob ommi Jerusalems dib xa: Ab omma ǂnubihe ǁnā ǃkhais ǁguibaden ra ǁîs ai ǁguibas tawa, î di ǃgaoǃgaodi âba ǃgom, îb ǀgapib âba ǃnanidisi ǂhâgu kō tsî ǂhabasib âba ǃnanidisi ǂhâgu kō,

⁴ǃnona ǁgaragu kai ǀuidi digu ǀkha tsî ǁgarab ǀasa haigu dib ǀkha, tsî ǂhâhe nî marina an gao-aob di omma xu māhe.

⁵În ǁnās tawa ǁkhāti ǁnā ǃhuniǀuri tsî ǀhaiǀurixapan Elob ommi din, Nebukadnesari ge tempeli Jerusalems tawa hâba xu Babilons ǃoa ūǃgûna an mā-oahe, în ǁnā tempeli, Jerusalems tawa hâb ǃnâ ǁîn di ǃkhais ai ūsīhe Elob ommi ǃoa.

⁶ǁNâi sats Tatenaits, ǃāb nau ǃnanib ai a ǃhūǃkhōmâi-aots, sats Setar-Bosnaits tsî sadu Afarsexaǁîdo, ǁîkha di horesado, ǃāb nau ǃnanib ai hâdo, ǁnāpa xu ǃnūse hâ.

⁷Î du ǁîna sîsen kai ǁnā ommi Elob dib tawa, îb Jodeǁîn di ǃhūǃkhōmâi-aob tsî Jodeǁîn di kaigu tsîga ǁnā ommi Elob diba ǁîb di ǃkhais ai ǂnubi.

⁸Tsî ta ge ǁkhāti mîmāsa ra mā tare-e du kaigu Jodeǁîn diga nî dī-ūsa, ǁnā ommi Elob diba gu nî ǂnubise; gao-aob di xūn ǁguibas, ǃāb nau ǃnanib ai ra ūhes xa an ǃhaese māhe nē aogu ǂhâ hâna, î gu tā ǂhanihe.

⁹Tsî nau xūn, ǂhâ gu ga hân, ǂkham goman xas kas, ǁkhaogu, ǀhommi Elob di ǁguibadi ga ǂhâba gu xas kas, ǃhoro-i xas kas, ǂō-i xas kas, ǂauxûi-i xas kas, oli-i xas kas hoasa, pristergu, Jerusalems tawa hâgu nî mîse, a gu ǁîna tsēsa xu tsēs ǃoa māhe, î gu tā xū-e tôasi,

¹⁰î gu ǁguibadi ǃgâihamxūn dide ǀhommi di Eloba ǁguiba, î gu ûib gao-aota dib tsî ǁî ta di ôagu diba ǀgoreba.

¹¹ǃAruǀî ta ge ra mîmā, î-i ǁnā khoe-i, nē mîsa ga ǀkharaǀkhara-i hoa-i di omsa xu ǃnao-e xuruǂuihe, î-i ǁî-i ai ǂgāmâihe, îb ǁî-i di omsa ǂgoaǁkhopo kaihe.

¹²Tsî ǁnā Elob, ǀons âba ge ǁnāpa ǁan kaiba, ab aoǁgui ǁnā gao-aogu tsî ǁaedi tsîn, ǃommi ǃnâ nē Elob ommi, Jerusalems tawa hâba nî ǀkharaǀkhara tsî hîkākāse ra ǀhōǂuin hoana. Tita Dariuta ge nē mîmāsa go mā, ǃhaeses nî dīhese.

¹³ǃNubain ge Tatenaib, ǃāb nau ǃnanib ai a ǃhūǃkhōmâi-aob, tsî Setar-Bosnaib tsî ǁîkha di horesana ǃhaese Dariub ge sîs ǁkhās xase ge dī.

¹⁴O gu ge Jodeǁîn di kaiga ǂnubi tsî ǃaruǀî ge ǃgâiǃgâ kēbosis kēbo-aob Hagaib tsî Saxariab, Idob ôab tsîkha disa xu. Ā, ǂnubi tsî gu ge ǁîba ge dītoa mîmās Israeli Elob disa ǃoa tsî mîmās Koreb tsî Dariub tsî Artasastab, Persiab gao-aob dis ǃoa.

¹⁵Ob ge omma ǃnonaǁî tsēs ǁkhâb Adari dis ai ge dītoahe, ǃnaniǁî kurib gao-aob Dariub di gaosis dib ge ǁnāba ge is.

¹⁶On ge Israeli ôan tsî pristergu tsî Leviǁîgu tsî nau ǀgôan ǃkhōsis dina nē ommi Elob dib di khaisa ǃgâiaǂgaob ǀkha ge dī.

¹⁷Tsîn ge nē ommi Elob dib di khais ase ge ǁguiba, ǀguikaidisi goman, ǀgamkaidisi bairagu, hakakaidisi ǁkhaogu tsî disiǀgamǀa piriga Israeli hoab di ǁoreǁguibase Israeli ǃhaodi di ǃgôab ǃoa.

¹⁸Tsîn ge pristerga ge mâi ǁîgu di domgu ai tsî Leviǁîga ǁîgu di ǀgoradi ǃnâ ǃoabas Elob, Jerusalems ǃnâ hâb dis ǁga, ǂkhanis Moseb dis di aixoas ǃoa.

¹⁹Tsîn ge ǃkhōsis di ôana ǁkhāti Pasxaba ge tsēdī disihakaǀaǁî tsēs ǂguro ǁkhâb dis ai.

²⁰Pristergu tsî Leviǁîgu tsîgu ge ǀguiǂâixase ge khaisen, hoatsama gu ge ge ǃanu i, tsî gu ge ǃkhōsis di ôan hoan tsî ǁîgu ǃgâsagu, pristergu tsî ǁîgu ǂhaniga Pasxaba ge ǂāba.

²¹Nētin ge Israeli ôan, ǃkhōsisa xu ge ǁkhawa hān, tsî ǁnān, ǃanuoǃnâsib ǃhūb di ǀūben diba xu ge ǁkhaedabasenn hoana ge ǀû, ǃKhūb Israeli Eloban nî ôaga.

²²Tsîn ge kaitsēs, ǀkhuruoǃnâ peregu disa hû tsēdi kōse ge tsēdi ǃgâiaǂgaob ǀkha; ǃKhūb ge ǁîna ge ǃgâiaǂgao kai tsî Asiriab gao-aob di ǂgaoba ǁîna ge ǂōǀî xui-ao, ǁîn di ǃomgu sîsenni Elob dib, Israeli Elob dib ǃnâ nî ǀgaiǀgaihese.