Read Khoekhoegowab Esrab 7 Bible Online

Esrab 7 - Khoekhoegowab bible

Esrab 7

¹Tsî nē ǃnaeǃkhaidi khaoǃgâ Artasastab, Persiab gao-aob di gaosis ǃnâb ge Esrab, Serajab ôab, Asariab ôab, Hilkiab ôab,

²Salummi ôab, Sadoki ôab, Ahitub ôab,

³Amariab ôab, Asariab ôab, Merajoti ôab,

⁴Seraxjab ôab, Usib ôab, Bukib ôab,

⁵Abisuab ôab, Pinehab ôab, Eleasari ôab, Aronni, ǀgapipristeri ôab, nē Esrab ge Babiloniaba xu ge doeǃapa,

⁶tsîb ge Esraba ǁkhā xoaǂansabe ge i ǂhanub Moseb dib, ǃKhūb, Israeli di Elob ge māb ǃnâ tsî gao-aob ge ǁîba ǃKhūb, ǁîb Elob di ǃommi, ǁîb ǂama hâb ǃoa ǁîb ge ǂgaon hoana ge mā.

⁷Tsîn ge ǁkhāti ǀnîn Israeli ôan din, pristergu tsî Leviǁîgu tsî ǁnae-aon tsî ǁāb ǃûi-aon tsî tempelǃgāgu tsîna Jerusalems ǃoa ge doeǃapa hûǁî kurib gao-aob Artasastab dib ǃnâ.

⁸Tsîb ge koroǁî ǁkhâb ǃnâ Jerusalems tawa ge sī; hûǁî kurib nē gao-aob dib ge ǁnāba ge i.

⁹ǂGuro tsēs koroǁî ǁkhâb dis ais ge doeǃapasa ge tsoatsoa Babilonsa xu, tsî ǂguro tsēs koroǁî ǁkhâb dis aib ge ǁîba Jerusalems tawa ge sī ǃgâi ǃommi Elob dib, ǁîb ǂama hâb ǃoa.

¹⁰Esrab ge ǂgaob âba unu xui-ao, ǂhanub ǃKhūb diba ôa tsîb nî dī tsî Israeli ǃnâb nî ǂnûiǂgādi tsî ǂhanugu tsîna ǁkhāǁkhā, ti.

¹¹Tsî nēs ge xoaǁnâs ǁnā sîǂkhanis, gao-aob Artasastab ge Esrab, pristeri, xoaǂansabeba mās disa, xoaǂansabeb mîdi ǃKhūb di mîmādi didi tsî ǂnûiǂgādi Israeli didi ǂama a ǁkhāba:

¹²Artasastata, gao-aogu di gao-aota ge Esrab, pristeri, xoaǂansabeb ǀhommi Elob di ǂhanub diba ǀoasa ǂkhîba ra ǂgaoǀkhā tsî ǃaruǀî.

¹³Tita xas ge nē mîmāsa go māhe: A-i mâ-i hoa-i, ti gaosis ǃnâ a māsenxa-i, Israeli ǁaes di-i xas kas, ǁîn di pristergu tsî Leviǁîgu di-i xas kas hoasa, Jerusalems ǁga i nî ǃgûsa, a-i sats ǀkha ǃgû.

¹⁴Gao-aob di ais aiǃâba xu tsî hû ǀapemā-aogu âb di ais aiǃâba xuts ra sîhe amaga, Judab tsî Jerusalems tsîra tawats nî ôaǃnâga ǁnā ǂhanub Elob dib, sa ǃomǁae hâb xa.

¹⁵Tsî ūsīts nîga ǁnā ǀhaiǀurib tsî ǃhuniǀurib tsîkha, gao-aob tsî ǀapemā-aogu âb ge māsenxase Israeli Elob, ǁanǃkhais âb Jerusalems tawa hâba mākha,

¹⁶ǁnā ǀhaiǀurib tsî ǃhuniǀurib, Babiloniab di ǃhūb hoab ǃnâts nî hōb hoab ǀkha tsî ǁnā māsenxa hōdi, ǁaes tsî pristergu tsîn māsenxase Elob ommi, Jerusalems tawa hâba nî mān didi ǀkha.

¹⁷Îts ǃhaese ǁnā marin ǀkha ǁama goman tsî pirigu tsî ǁkhaogu tsîna ǂûǁguibadi ân tsî ǂnâǁguibadi ân ǀkha, îts ǁîna altars ǃKhūb, sadu Elob, Jerusalems tawa hâb dis ai ǁguiba.

¹⁸Tsî ǁnās tawa sats tsî sadu di ǃgâsagu tsîdo ga ǃgâise īban, nau ǀhaiǀurib tsî ǃhuniǀurib tsîkha ǀkha du tare-e nî dīsa, ǁnāna dī ǃgâiǃgâibasens sadu Elob dis ǃoa.

¹⁹Îts ǁnā soadi, Elob ommi di ǃoabasats ge mābahede Jerusalems di Eloba mādawa.

²⁰Tsî nau xūn, Elob ommats nî ǂhâbaban, ǀnîsits nî māǂuin, ǁîna mā re ǁuib ommi gao-aota diba xu.

²¹Tsî tita gao-ao Artasastata xas ge nē mîmāsa ǁuiǃkhōmâi-aogo, ǃāb nau ǃnanib ai hâgo ra māhe, în ǁnā xūn, Esrab, pristeri, xoaǂansabeb, ǀhommi Elob dib ga ǂgaoǀkhā gon hoana ǃhaese dīhe:

²²ǀGuikaidisi talendi ǀhaiǀurib xa tsî ǀguikaidisi korgu ǃhorob xa tsî ǀguikaidisi batgu olib xa tsî ǀguikaidisi batgu ǂauxûib xa tsî ǂōb xasa ǀgauose.

²³În ǁnā xūn, mîmās ǀhommi Elob dis ǃoa hân hoana ôasase ǀhommi Elob di omma dībahe. Tarexab kha ǁnâi kai ǁaiba nî hâ gao-aota di gaosis tsî ǁîs di ôan ǂama?

²⁴Î go ǁkhāti ǂan pristergu tsî Leviǁîgu tsî ǁnae-aogu tsî tempelǃgāgu tsî nē Elob ommi di ǃoabasabegu tsîgu xasa, î gu ǁguibas tsî ǁguiǂamsa marib tsî gaosib maris tsîna tā ǁguiǂamhe ǁkhā.

²⁵Tsî sats, Esratse, ǁnā gā-aisib sa Elob dib hîa sa ǃomǁae hâb ǃoa ǂnûiǂgā re gaosagu tsî ǂhanuǂhanu-aogu, ǁaes, ǃāb nau ǃnanib ai hâsa nî ǂhanuǂhanugu tsî sa Elob di ǂhanuba a ǂan khoen hoana, tsî ǁîba ga ǀū-e go ge sago ǁîba nî ǂanǂan.

²⁶Tsî sa Elob di ǂhanub tsî gao-aob di ǂhanuba ga dī tama i-i hoa-i, ǁî-e ab ǂhanuba ǃhaese sîsenū, ǁōb ǃoas kas, ǃhaexus ǃoas kas, xūn tawa ǁkharas ǃoas kas, ǃgae-ūdan ǃoas kas hoasa.

²⁷Ab koahe ǃKhūb, sida îgu di Elob, nēti īna gao-aob di ǂgaob ǃnâ ge māba, ǃKhūb di ommi, Jerusalems tawa hâbab nî anise.

²⁸Tsî gao-aob tsî ǁîb di ǀapemā-aogu tsî gao-aob di ǃgari-aogu hoagu di ais aiǃâ tita ǀkhomma ge māba. O ta ge go ǀgaiǀgaisen ǃKhūb, ti Elob di ǃommi, tita ǂama hâb ǃoa, tsî Israeli di danaga ge ǀhaoǀhaoba, tita ǀkha gu nî doese.