Read Khoekhoegowab Esrab 8 Bible Online

Esrab 8 - Khoekhoegowab bible

Esrab 8

¹Tsî nēgu ge ǁîn îgu di danaga, ǃhaos ǃgôakhâis âgu ǀkha tita ǀkha Babilonsa xu ge doeǃapaga gao-aob Artasastab di gaosis ǃnâ:

²ǀGôan Pinehab din xa, Gersomma; ǀgôan Itamari din xa, Daniela; ǀgôan Davib din xa, Hatuba,

³ǀgôan Sexanjab din xa; ǀgôan Parob din xa, Saxariab, tsî ǁîb ǀkha ge ǃhaos ǃgôakhâis di ǂkhanis ǃnâ ǃgôakhâihe aore khoegu xa ǀguikaidisi tsî korodisigu kōse;

⁴ǀgôan Pahat-Moab din xa, Eljoenaib Seraxjab ôaba, tsî ǀgamkaidisi aore khoega ǁîb ǀkha;

⁵ǀgôan Satub din xa, Sexanjab, Jahasieli ôaba, tsî ǃnonakaidisi aore khoega ǁîb ǀkha;

⁶tsî ǀgôan Adinni din xa, Ebedi Jonatanni ôaba, tsî korodisi aore khoega ǁîb ǀkha;

⁷tsî ǀgôan Elammi din, Jesajab, Ataliab ôaba, tsî hûdisi aore khoega ǁîb ǀkha;

⁸tsî ǀgôan Sefatjab din xa, Sebadjab, Mixaeli ôaba, tsî ǁkhaisadisi aore khoega ǁîb ǀkha;

⁹ǀgôan Joab din xa, Obadjab, Jehieli ôaba, tsî ǀgamkaidisi tsî disiǁkhaisaǀa aore khoega ǁîb ǀkha;

¹⁰tsî ǀgôan Banib din xa, Selomiti, Josifjab ôaba, tsî ǀguikaidisi tsî ǃnanidisi aore khoega ǁîb ǀkha;

¹¹tsî ǀgôan Bebaib din xa, Saxariab, Bebaib ôaba, tsî ǀgamdisiǁkhaisaǀa aore khoega ǁîb ǀkha;

¹²tsî ǀgôan Asgadi din xa, Johananni, Hakatanni ôaba, tsî ǀguikaidisi tsî disi aore khoega ǁîb ǀkha;

¹³tsî ǃgaoǀgôan Adonikammi din xa, nēdi ge ǀondi âna: Elifeleti, Jeueli tsî Semajab tsîga, tsî ǃnanidisi aore khoega ǁîgu ǀkha;

¹⁴tsî ǀgôan Bigvaib din xa, Utaib tsî Sakuri tsîkha, tsî hûdisi aore khoega ǁîkha ǀkha.

¹⁵Tsî ta ge tita ǁîna ǃāb Ahavab ǃoa ra dâub tawa ge ǀhaoǀhao, tsî da ge ǁnāpa ǃnona tsēde ge ǁgoe. ǃNubai ta ge ǁaes tsî pristergu tsîna ǃgaoǃgâ tsî ǁnāpa Leviǁîgu xa ǀguib xareba hō tama ge i.

¹⁶O ta ge tita Elieseri, Arieli, Semajab, Elnatanni, Jarib, Elnatanni, Natanni, Saxariab tsî Mesulammi tsîgu, danakhoegu, tsî Jojarib tsî Elnatanni tsîkha, ǁkhāǁkhā-aokha ǃoa ge sî,

¹⁷tsî ta ge ǁîga mîmāsa ge mā Idob, ǃās Kasifjas di danakhoeb ǁga, tsî ta ge mîde ǁîgu di ams ǃnâ ge ǁgui Idob tsî ǁîb di ǃgâsagu tsî tempelǃgāgu ǃās Kasifjas ǃnâ hâgu ǃoa, î gu Elob ommi di ǃoabasabena ūhāba daga.

¹⁸O gu ge ǃgâi ǃommi sida Elob dib, sida ǂama hâb ǃoa ǁnâuǃāsa khoeb Maxlib ôan dib, Levib ôab, Israeli ôab, Serebja ti ǀon hâba ǀgôagu âb tsî ǃgâsagu âb ǀkha ge ūhāba da disiǁkhaisaǀagu kōse;

¹⁹tsî Hasabjab tsî Jesajab, Merarib ôan diba, ǃgâsagu âb tsî ǀgôagu âb ǀkha ǀgamdisiga.

²⁰Tsî ǁnā tempelǃgāgu, Davib tsî gaosagu tsîgu ge Leviǁîga ǃoaba-aose māgu, ǀgamkaidisi tsî ǀgamdisigu, hoatsama ǀondi ǀkha ge ǂgaihega.

²¹ǁGoasi ta ge tita ǁnāpa ǃāb Ahavab tawa ǂûtama hâ-e ge ǂgaiǂui, sida Elob di ais aiǃâ da nî ǃgamǃgamsense, î da ga ǁîba sida tsî sida ôaron tsî ū da hân hoana ǂhau dao-e ǂgaoba, ti.

²²Tita ge gao-aoba ǂnubi-i tsî ǃgapi-aoga ǂgaoǀkhāsa ge tao amaga, daob ai nî hui daga khākhoeba xu, gao-aoba ǃhoa-ū tsî da ge: ǃOmmi sida Elob dib ge ǁîba ra ǂann hoan ǂama hâ ǃgâib ǃoa, xawe ǀgaib âb tsî ǁaib âb ǁîba ra ǁnāxūn hoan ǂama, ti ge mî xui-ao.

²³Nēti da ge ǂûtama hâ tsî nēna sida Elob tawa gere ǂgao, tsî ǁîb ge sida xa ge ǁnâuhōkaisen.

²⁴ǃNubai ta ge tita pristerdanagu di disiǀgamǀaga ǁîga xu ge khai, Serebjab tsî Hasabjab tsîkha tsî disigu, ǃgâsagu âkha digu tsîga ǁîkha ǀkha,

²⁵tsî ta ge ǁîga ǀhaiǀurib tsî ǃhuniǀurib tsî xapan tsîna ge ǀnēba, ǁguibas sida Elob ommi dis ge ǁîsa, gao-aob tsî ǁîb di ǀapemā-aogu tsî ǁîb gaosagu tsî Israeli hoab, hōheb ges kōse ge ǁguibasa.

²⁶Tita ge ǁîgu di ǃommi ǃnâ ǃnanikaidisi tsî korodisi talende ǀhaiǀurib xa ge ǀnē tsî ǀhaiǀurixapana ǀguikaidisi talendi kōse, tsî ǃhuniǀurib xa ǀguikaidisi talendi kōse,

²⁷tsî ǀgamdisi ǃhuniǀuriǀgabidi, ǀguiǀoadisi draxmen kōse, tsî ǀgam soara, ǂkhaisa ǃgâi ǂaib ǀkha dīhe hâra, ǃhuniǀurib khami a îsara.

²⁸O ta ge tita ǁîgu ǃoa ge mî: Sago ge ǃKhūba a ǃanuba, tsî nē xapan ge a ǃanu, tsî nē ǀhaiǀurib on tsî nē ǃhuniǀurib ona māsenxase, hōs ǃKhūb sadu îgu Elob dis ase.

²⁹ǃÛi î go ǁîna sâu, ǁîna go ǂamkhoegu pristergu tsî Leviǁîgu digu tsî gaosagu Israeli ǁgûgu digu aiǃâ nî ǀnōs kōse Jerusalems tawa ǃKhūb ommi di ǃnā-omdi ǃnâ.

³⁰ǃNubai gu ge pristergu tsî Leviǁîgu tsîga ǃgommi ǀhaiǀurib tsî ǃhuniǀurib tsîkha dib tsî xapan diba ge hō, Jerusalems ǃoa gu nî ǁîba ūsīga, sida Elob di ommi ǃoa.

³¹Nēti da ge ǃāb Ahavaba xu ge ǂnauǁnâ disiǀgamǀaǁî tsēs ǂguro ǁkhâb dis ai, Jerusalems ǃoa da nî ǃgûse. Tsî ǃommi sida Elob dib ge sida ǂama ge hâ i, tsîb ge sida khākhoeb di ǃomma xu ge ore tsî ǁnāb, daob ai ǁnoaga sida ge ǁguibaba xu.

³²Tsî da ge Jerusalems tawa ge sī, tsî da ge ǁnāpa ǃnona tsēde ge hâ.

³³Tsî hakaǁî tsēs ain ge ǀhaiǀurib tsî ǃhuniǀurib tsî soan tsîna ge ǀnōbahe sida Elob di ommi ǃnâ Meremoti, Uriab ôab, pristeri ǃomǁae, tsî ǁîb ǀkhab ge Eleasari, Pinehab ôaba ge hâ i tsî ǁîb xōǀkhā Josabadi, Jesuab ôab, tsî Noadjab, Binuib ôab tsîkha, Leviǁîkha.

³⁴Nēn hoan di ǃgôab tsî ǃgommi ǃoa, tsî ǃgommi hoab ge ǁnā ǁaeb ǁkhāb ai ge xoamâihe.

³⁵Tsî ǂgaeǂguibēhe ge hâ in, ǃkhōsisa xu ge hān ge Israeli di Eloba khauǁguibade ge ǁguiba: Disiǀgamǀa ǁgōga Israeli hoab ǂama, khoesedisiǃnaniǀa bairagu, hûdisihûǀa ǁkhaogu, disiǀgamǀa piriga ǁoreǁguibase, hoatsama khauǁguibas ǃKhūb dis ase.

³⁶ǁNās khaoǃgâ gu ge ǂhanugu gao-aob diga gao-aob di ǃāǃkhōmâi-aogu tsî ǃhūǃkhōmâi-aogu tsîga ge mā ǃāb nēxa ǃnanib ai, o gu ge ǁaes tsî Elob di omma ge ǃhaeǃhae.