Read Khoekhoegowab Esrab 9 Bible Online

Esrab 9 - Khoekhoegowab bible

Esrab 9

¹Tsî nē xūn ge dītoaheo, o gu ge gaosaga ti tawa dāhā tsî ge mî: Israeli ǁaes tsî pristergu tsî Leviǁîgu tsîn ge khaisen tama ge hâ i nē ǃhūgu di ǁaede xu ǁîn di ǁgaidīgu ǃoa, ǁnān ge Kanaanǁîn, Hetiǁîn, Perisiǁîn, Jebusǁîn, Amonǁîn, Moabǁîn, Egipteǁîn tsî Amorǁîn tsîna.

²ǁÎn ôade gu ge ǁîga aitsama ge ūbasen tsî ǁîn ôaga ge ūba xui-ao, on ge nēti ǃanu suriba nē ǃhūgu di ǁaedi ǀkha ge haba, tsî ǃommi gaosagu tsî ǂamkhoegu tsîgu dib ge nē ǃûǂams ǃnâ ǂguro ge i.

³Tsî nē ǃkhaisa ta ge ǁnâuo, o ta ge ti sarab tsî ti anaǂamxūb tsîkha ge ǀkhauǃā, tsî ta ge ǀûn ti danas tsî ti ǀhō-ams tsîra dina tsuruǂui tsî burugâ hâse ge ǂnû.

⁴ǃNubai gu ge Israeli Elob di mîdi aiǃâ ǂgaeǂguibēsan di ǃûǂams xa ra ǀkhūgu hoaga ti tawa ge ǀhû, xawe tita ge burugâ hâse ǃuiǁguibas kōse ge ǂnôa i.

⁵Tsî ǁaupe ǃuiǁguibas di ǁaeb ai ta ge ti ǁgâiǀāba xu ge khâi tsî ti sarab tsî ti anaǂamxūb tsîkha ǀkhauǃā hâǃâ ta ge ti ǁgoara ai ǁnāǁgoe tsî ti ǃomkha ǃKhūb, ti Elobǀî ge khoraǂui,

⁶tsî ge mî: Ti Elotse, tao ta hâ, tsî taob xa ta dāhe hâ, ti aisa ta nî sa ǃoa ūkhâise, ti Elotse, sida di dīsādi ge sida di danas ǂamǃnâs kōse a ǂgui, tsî sida di ǀhapis ge ǀhommi kōse a kai.

⁷Sida îgu di tsēde xu da ge kai ǀhapis ǃnâ ge hâ i nē tsēs kōse, tsî sida di dīsādi ǃaroma da ge māǁnâhe hâ, sida tsî sida gao-aogu tsî sida pristergu tsî sida ǃhūgu gao-aogu ǃomǁae tsî gôab ǃnâ, tsî ǃkhōsis ǃnâ tsî ǁkhâuǁnâs ǃnâ tsî taob ais dib ǃnâ, nētsē i īse.

⁸Tsî nēsi i ge ǂkhari mûsǀapirob kōse ǀkhomxaǂgaosi-e go hā ǃKhūb, sida Eloba xu ǃgaoro-e da nî ǁnāxūbahese, tsî ǀurida-e da nî māhese ǁîb di ǃanu ǃkhais ǃnâ sida mûdets nî ǃnâǃnâse, sida di Elotse, tsî ǂkhari ûiro-ets nî mā dase, sida di ǃgāsis ǃnâ.

⁹Sida ge a ǃgā xui-ao, xawe sida di ǃgāsis ǃnâts ge sida di Elotsa ǁnāxū da tama hâ, tsîts ge ǃgâidība ge ǃnare da Persiab gao-aogu di ais aiǃâ, ǂkhari ûiro-ets nî mā dase, sida Elots di omma ǀgapiǀgapi, tsî da nî ǂkhū hâ ǃkhaidi âba dī-unuga, tsî ǃhara-ets nî sida māse Judab ǃnâ tsî Jerusalems tawa.

¹⁰Tsî nēsi, tare-e da kha nî mî, sida di Elotse, nēn khaoǃgâ? Sa mîmāde da ge ǁnāxū xui-ao.

¹¹Sats ge sa ǃgāgu, kēbo-aogu di ǃoabasa xu mîmāde ge mā da, mî rase: ǁNā ǃhūb, ǁîb ǃnâ du ǀumi bi nîse nî sīb ge a ǀurisa ǃhū, ǀurisasib ǁnā ǃhūgu di ǁaedi diba xu ǁîn di ǁgaidīgu ǃaroma, ǁîgu ǀkhan ge ǁîba ge ǀoaǀoaga nē ǀkhāba xu nau ǀkhāb kōse ǃanuoǃnâsib ân ǀkha.

¹²O du ge sadu ôade ǁîn ôaga mā tide tsî ǁîn ôade sadu ôaga ūba tide, tsî du ge ǁîn di ǂkhîb tsî ǁîn di ǃgâib tsîkha ǀamos kōse ôa tide î du ǀgaisa î du ǃgâib ǃhūb diba ǂû, î du ǁîba sadu ôana ǀumi kai ǀamosib kōse.

¹³Tsî nēn hoan, sida ǂama sida di ǂkhaba dīgu ǃaroma tsî sida di kai ǀhapis ǃaroma ge hān khaoǃgâ, sats, sida di Elots, ge ge dī, sida di dīsās xa da dāhe tidesa tsî ǃgaoro-e da nî māhesa, nē xū-i īse,

¹⁴mati da kha ǁnâi oa tsî sa mîmāde nî hîkākā tsî nî ǀuigu ǁaedi nē ǁgaidīgu didi ǀkha? ǁAixaǂam dats kha tide, hapuhe da nîs kōse, khauǃgau hâ ǃgaoro-i xare-i tsî ûi-i xare-i nî ǀkhais kōse?

¹⁵O ǃKhūtse, Israeli di Elotse, sats ge a ǂhanu-ai, sida ge ûi hâ xū-i ase ǃgau hâ xui-ao, nētsē i īs ase. Mû, sida ge sa ais aiǃâ sida di ǀhapis ǃnâ hâ, khoe-i xare-i hîa nē ǃkhais ǃnâ sa ais aiǃâ a mâ ǁkhā-i a ǀkhai xui-ao.