Read Khoekhoegowab Nehemiab 1 Bible Online

Nehemiab 1 - Khoekhoegowab bible

Nehemiab 1

¹Nēdi ge ǃnaeǃkhaidi Nehemiab, Haxaljab ôab dide. Tsî i ge ǁkhâb Kisleub ǃnâ ge ī ǀgamdisiǁî kurib ǃnâ, Susas tawa î-ommi ǃnâ ta hâ hîa,

²ǃnubaib ge Hananib ti ǃgâsagu di ǀguiba ge hā, ǁîb tsî ǀnî aogu Judab digu tsîga, o ta ge ǁîga Jodeǁîn hîa ge ûiǃgaun xa ge dî, ǃkhōsisa xu ge ǃgauna, tsî Jerusalems xa.

³O gu ge tita ǁga ge mî: ǁNān hîa ǃkhōsisa xu ǃhūb ǃnâ ge ǃgaun xasa: ǁÎn ge kai ǀkhomǀkhomsasib tsî ǃharaxūb ǃnâ hâ, tsî Jerusalems di ǂnubiǂgoab ge ǂkhū hâ, tsî ǁāgu âb ge ǀaes ǀkha khauǃkhūhe hâ.

⁴O i ge nē mîde ta ge ǁnâu ǃnubai ge ī, ǂnû tsî ta ā tsî ǀnî tsēde ge ǃoa ǃkhaisa. Tsî ta ge ǂûtama hâ tsî ǀgore rase Elob ǀhommi dib di ais aiǃâ ge hâ.

⁵Tsî ta ge ge mî: ǃKhūtse, ǀhommi di Elotse, sats kai tsî ǃaoǃaosa Elotse, ǃgaeǀhaos tsî ǀkhomxaǂgaosib tsîkha ǁnān, satsa ǀnam hân tsî sa mîmāde ra dīna ra ǃkhōǀgaipebatse,

⁶as ǁnâi ǂgaes âtsa ǃgaoǃgâxa tsî mûs âtsa khowasase ī, ǁnâuts nîse ǁnā ǀgores sa ǃgāta dis hîa ta nētsē, tsēs tsî tsuxub tsîra Israeli ôada, sa ǃgāda, ais âts aiǃâ ra ǀgorebasa. Tsî ta ge ǁguiǁnâsa ra dī Israeli ôada di ǁoren, sa ǃoagu da ge ǁoren ǃaroma, tita tsî ti îb di ommi dida on ge sa ǃoagu ǁore hâ.

⁷Sida ge kaise ǁgao hâ sa ǃoa-ai tsî da ge mîmādi kas ǂnûiǂgādi kas, ǂhanu-aidi sa ǃgāb Mosebats ge mîmādi kas hoasa ǃkhōǀgaipe tama ge hâ i.

⁸ǂÂi re ǁnā mîs sa ǃgāb Mosebats ge mîmās xa, mî raǃâ: ǃÛǂam du kao, o ta ge tita sado ǁaedi ǃnâ nîra ǀgaruǀgaru,

⁹o du ge sado tita ǃoa nîra ǃhobasen tsî ti mîmāde ǃkhōǀgaipe tsî ǁîde nîra dī, tsî sa ǃhaexusan ga ǀhommi di ǀkhâuǀams tawa hâ xawe ta ge tita ǁnāpa xu ǁîna ǀhaoǀhao tsî ǁîna nîra ūsī, ǁnā ǃkhais tita ti ǀonsa ta nî ǁnāpa ǁan kaise ǁhûiǂuibasen hâs ǃoa.

¹⁰Sa ǃgān ge a ǁî tsî sa ǁaes, sa kai ǀgaib tsî sa ǀgaisa ǃommi ǀkhats ge oresa.

¹¹O ǃKhūtse, as sa ǂgaesa ǃgaoǃgâxase ī, ǀgores sa ǃgāta dis ai tsî ǀgores sa ǃgāda, sa ǀonsa da nî ǃaosa ǁkhore hâda dis ai, îts sa ǃgāta nētsē ǃgâiǃgâ kai, îts ǁî ta ǀkhomxaǂgaosiba mā nē aob di ais aiǃâ. Tsî tita ge gao-aob di ǁhamao ge i.