Read Khoekhoegowab Nehemiab 13 Bible Online

Nehemiab 13 - Khoekhoegowab bible

Nehemiab 13

¹ǁNā tsēs ǁkhās ai gu ge ǂkhanis Moseb dis ǃnâ ge khomai ǁaes di ǂgaedi ǃnâ, o i ge xoaǃkhai-e ǁîs ǃnâ ge hōhe, Amonǁîn tsî Moabǁîn tsîn ge ǀhaohâb Elob dib ǃnâ hā tide, ǀamosib kōse, ti.

²Israeli ôanan ge pereb tsî ǁgammi tsîkha ǀkha ǃgûǃoa tama i amaga, tsî Bileamman ge ǁîn ǃoagu ǃgae amaga, ǁînab nî ǀâxarese, sida Elob ge ǁnā ǀâxareba ǀkhaeb ǃnâ ǀkharaǀkhara xawe.

³Tsî i ge ge ī, nē ǂhanuban ge ǁnâuo, on ge ǃhaokhoeǃnôan hoana Israela xu ge ǁkhaeǂui.

⁴Tsî Eljasib, ǁnā pristeri, ǃnā-oms sida Elob ommi disa ge mâiǂamhe hâ ib ge nēn aiǃâ Tobiab di ǀaokhoe ge i.

⁵Tsîb ge ǁîba kai ǃnā-omsa ge dība, tsî ǁîs ǃnân ge ǂûǁguibas tsî ǀanǀanxūn tsî xapan tsî ǃhorob di disiǁîn tsî ǂkhonxûib tsî olib tsîkha dina ge ǂgā, Leviǁîgu tsî ǁnae-aogu tsî ǁāb ǃûi-aogu tsîgu ǂama mîmāhe hâna, ǁguibadi pristergu didi ǀkha.

⁶Xawe nēn hoan ra ī hîa ta ge tita Jerusalems ǃnâ hâ tama ge i, ǃnonadisiǀgamǀaǁî kurib Artasastab, Babilons gao-aob dib ǃnâ ta ge tita gao-aob tawa sī xui-ao. Tsî ǀnî tsēdi khaoǃgâ ta ge gao-aoba xu ǁkhawa mā-amsa ge hō.

⁷Tsî ta ge Jerusalems tawa hā tsî ge ǁnâuǃā ǁnā ǂkhabab, Eljasib ge Tobiaba dī-ūba, ǃnā-omsa ra dība biǃâ Elob ommi di ai-omgu ǃnâ.

⁸O ta ge kaise ge tsūbahe, tsî ta ge oms xūn Tobiab din hoana ǃnā-omsa xu ǃaugab ǃoa ge aoǂui.

⁹Tsî mîmā ta ge ǃnubain ge ǃnā-omde ge ǃanuǃanu, o ta ge soan Elob ommi dina ǁkhawa ge ūǂgā, ǂûǁguibadi tsî ǀanǀanxūn tsîn ǀkha.

¹⁰Tsî ta ge ǁkhāti ge hōǃâ Leviǁîgu amǃnâs âga māhe tama hâ ǃkhaisa, o gu ge Leviǁîgu tsî ǁnae-aogu tsîgu, sîsenna ra dīga ge ǁhâ, mâb hoaba ǃhanab âb ǃoa.

¹¹O ta ge ǂamkhoegu ǀkha ǂnoagu tsî: Tare xū-i ǃaromasa ǃKhūb di ommi ǁnāxūhe hâsa? ti ge mî. Tsî ta ge ǁîga ǀhaoǀhao tsî ǁîgu di ǃkhais ai ǁkhawa ge mâi.

¹²ǃNubaib ge Judab hoaba disiǁî ǃân ǃhorob din tsî ǂkhonxûib din tsî olib dina ge ūhā, ǁuigu ǃnâ.

¹³Tsî ta ge ǁuigu ǂama ǁuiǃkhōmâi-aose ge mâi Selemjab, pristeri, tsî Sadoki xoa-aob, tsî Pedajab Leviǁîgu dib tsîga, tsî ǁîgu xōǀkhā Hananni, Sakuri ôab, Matanjab ôab tsîkha, îǂhôase kha ge ūhe tsî ǃgâsagu âkha kha nî xūna ǀgoraǂuisa ǁguiǂamhe xui-ao.

¹⁴Tita xa ǂâi re, ti Elotse, nē xūn xa, îts ti ǃgâidīgu, ti Elob di ommi tsî ǁîb di ǃûis tsîna ta ge dī-ūga tā ǀari.

¹⁵ǁNā tsēdi ǁkhādi ai ta ge Judab ǃnâ ǁnān sâtsēs ai ǂauxûiǂûn di ǃoreba ra dāǃnân tsî ǃgaeǀkhādadi eseln ain ra ǃnaode ra ūǂgāna ge mû, tsî ǁkhāti ǂauxûib tsî ǂauxûiǂûn tsî ǀnoman tsî mâ ǃgom-i hoa-e Jerusalems ǃnâ sâtsēs ai ra ūǂgāna, o ta ge ǁnātsē ǁîna ge ǃkhâikhom, ǂûxūnan ra ǁamaxū hîa.

¹⁶Tsî Tireǁîn on ge ǁîs ǃnâ ge ǁan, ǁaun tsî mâ ǁamaxūn hoana ūhā tsî sâtsēs ai Judaǁîn tsî Jerusalems din tawa ra ǁamaxūna.

¹⁷ǁGoasi ta ge ǀgapiǃgôasagu Judab digu ǀkha ǂnoagu tsî ǁîga ge mîǀî: Mâ ǂkhaba xū-e kha nē-i, sago ra dī-e, sâtsēsa ra ǀuriǀurise?

¹⁸Sago îga ǁnāti dī tama gu ge i, ob sada Eloba nē tsūb hoaba sada ǂama tsî nē ǃās ǂama ge ūhā? Tsî sago ge ǀgamsa ǁgôasiba Israeli ǂama ǃaruǀîǀgui ra kaikai, sâtsēsa ra ǀuriǀurise.

¹⁹Tsî i ge ge ī, ǁāgu Jerusalems digu sâtsēs aiǃâ sommi xa ra ǃkhae kaihe ǃnubai ta ge ge mîmā, î gu ǁāga ǂganamhe, tsî ta ge ge mîmā, sâtsēs khaoǃgâ ǀgui gu nî ǁkhowa-amhe ǃkhaisa, tsî ta ge ti ǃgāga ǁāgu tawa ge mâi, ǃgom-i xare-i sâtsēs ai ǂgâxa tidega.

²⁰ǃNubai gu ge ǁama-aogu tsî xūn hoan di ǁamaxū-aogu tsîna Jerusalems ǃauga ge hâǂkhai, ǀgui ǃnās ais kas, ǀgam ǃnāra ais kas hoasa.

²¹O ta ge tita ǁîga ǃkhâikhom tsî ge mîǀî gu: Tarexa go ǂnubiǂgoab aiǃâ ra ǁomǂkhai? ǁKhawa go ga ǁî ǃkhaisa dīo, o ta ge ti ǃomma sago tawa nî ǁgui. ǁNā ǁaeba xun ge sâtsēs ai hā tama ge i.

²²ǃAruǀî ta ge Leviǁîgu ǃoa ge mî a gu ǃanuǃanusen, î gu ǁāga hā ǃûi, sâtsēs nî khaihese. Tita xa ǁkhāti nē ǃkhais ǂama ǂâi re, ti Elotse, îts sâu te re kaisib sa ǀkhomxaǂgaosib dib ǃaroma.

²³ǁKhāti ta ge ǁnā tsēdi ǃnâ Jodeǁîga ge mû, Asdodǁî tsî Amonǁî tsî Moabǁî tarade ge ǁîgu ǀkha ǁan kaiga.

²⁴Tsî ǀgôan âgu ge ǃkharese Asdodǁî gowaba gere ǃhoa, tsîn ge Jodeǁî gowaba ǃhoa ǁoa ge i tsî mâ ǁaes hoas diba gere ǃhoa.

²⁵O ta ge ǁîgu ǀkha ǂnoagu tsî ǁîga ǀâxare tsî ǀnî aogu âga ǂnau tsî ǀûn âga ge tsuruǂui. Tsî ta ge ǁîga Elob tawa ge nū kai: Sago ôade go ge ǁîn ôaga mā tide tsî ǁîn ôade go ge sago ôaga ūba tide tsî sago ona ūbasen tide, ti.

²⁶Salomob, Israeli gao-aoba ǁî ǃkhais ǀkha ǁore tamab hâ? ǂGui ǀūben ǃnâ ǁîb khami ī gao-ao-i tsî Eloba ǀnamǀnamsase ība-e tsî Elob xa Israeli hoab ǂama gao-aose ge mâihe-e hâ tama hâ i xawe, ǁîb ǂûb ona di ge ǃhao tarade ge ǁore kai.

²⁷Tsî sida ǁnâi ǁnâu go da nî xare, nē kai ǂkhababa go nî dīse, Elob âda ǃoagu ra ǁorese, ǃhao tarade sago ǀkha ra ǁan kaise?

²⁸ǁKhātib ge ǀguib Jojadab, Eljasib, ǀgapipristeri ôan diba Sanbalati, Horonǁîb, di ǀuiǀgôa ge i. ǁNā-amaga ta ge ǁîba tita xu ge ǃhaebē.

²⁹ǁÎgu xa ǂâi re, ti Elotse, pristersisa gu ge ǀuriǀuri xuige, ā, ǃgaeǀhaos pristersis tsî Leviǁîgu tsîn disa.

³⁰Nēti ta ge tita ǁîna ǃhao xūǃnôan hoana xu ge ǃanuǃanu, tsî ta ge ǃûidi pristergu tsî Leviǁîgu dide ge mîmā, mâb hoaba sîsenni âba.

³¹ǁKhāti ǁguibas ǀaen disa mîmâihesa ǁaegu ai tsî ǂguron disa. Tita xa ǂâi re, ti Elotse, ǃgâiba ǃoa.