Read Khoekhoegowab Nehemiab 2 Bible Online

Nehemiab 2 - Khoekhoegowab bible

Nehemiab 2

¹Tsî i ge ǁkhâb Nisanni ǃnâ ge ī ǀgamdisiǁî kurib gao-aob Artasastab dib ǃnâ, ǂauxûib ais âb aiǃâ hâ hîa ta ge tita ǂauxûiba ūkhâi tsî gao-aoba ǁîba mā ǃkhaisa, tsî tātsē ta ge tita ǁîb di ais aiǃâ ǃoaxa tama ge hâ i.

²ǃNubaib ge gao-aoba tita ǁga ge mî: Tarexasa ais âts ǃoaxasa, ǀaesen tamats kom xawe hâo? Tsûaǂgaob kom ǁîbao. O ta ge îbe ge ǃao.

³Tsî ta ge gao-aob ǃoa ge mî: Ats gao-aotsa ǀamose ûi re! Matis kha ǁnâi ti aisa ǃoaxase ī tide, ǁnā ǃās ti îgu di ǀhobadi hâǃnâs a ǃū-aisa tsî ǁāgu âs ǀaes ǀkha khauǃkhūhe hâ hîa?

⁴Ob ge gao-aoba tita ǃoa ge mî: Tsî tare-ets ǁnâi ra ǂgao? O ta ge tita Elob ǀhommi dib ǃoa ge ǀgore

⁵tsî ta ge gao-aob ǃoa ge mî: Sats gao-aots ga ǃgâibaheo, tsî sa ǃgāta ga ais âts aiǃâ ǃkhōǃoahesa anuo, ǁnâi Judab ǃoa sî te, ǁnā ǃās ti îgu di ǁkhōǃkhaidi dis ǁga, î ta ǁîsa ǁkhawa ǂnubikhâi.

⁶ǃNubaib ge gao-aoba tita ǃoa, gao-aos ǁîb xōǀkhā ǂnôa hîa, ge mî: Matikōses nî ǀhawe sa ǃgûsa, tsî mâ ǁaets nî oa? Ob ge gao-aoba ge ǃgâibahe, titab nî sîs xa, mîmâisa ǁae-e ta ge mā bi ǃnubai.

⁷O ta ge gao-aob ǁga ge mî: Sats gao-aots ga ǃgâibaheo, o ta ǁnâi ǂkhanide māhe, ǃhūǃkhōmâi-aogu ǃāb nau ǃnanib ai hâgu ǃoa, î gu ǁnūǃgâu te, Judab ǃnâ ta nî sīs kōse.

⁸Tsî ǁkhāti ǂkhani-e Asafi, ǁnā haixa ǃhanab, sats gao-aots ūhâb di ǃûi-aob ǃoa îb haigu xa mā te, ǁāgu, î-ommi ǁnā ommi tawa hâb digu nî ǃgū-aihega, tsî ǃās di ǂnubiǂgoab digu tsî ǁnā ommi, ǁîb ǃnâ ta nî ǂgâb diga. Tsî gao-aob ge ǁîga tita ge mā, ǁnā ǃgâi ǃommi ti Elob dib ti ǂama hâb dib ǃoa.

⁹ǃNubai ta ge ǃhūǃkhōmâi-aogu, ǃāb nau ǃnanib ai hâgu tawa sī tsî gao-aob di ǂkhanide ǁîga ge mā, tsî gao-aob ge ǂamsagu ǂnubis digu tsî ǃgapi-aogu tsîga ge sîsao te.

¹⁰Tsî Sanbalab, Horonǁîb, tsî Tobiab, Amonǁî ǃgāb tsîkha ge ǁnâuo, o kha ge kaise ge tsūbahe, khoe-i go hā ǃkhais xa, ǃgâi xū-e i nî Israeli ôana ôabase.

¹¹Tsî Jerusalems tawa sī tsî ta ge ǃnona tsēde ǁnāpa hâo,

¹²o ta ge tsuxuba ge khâi, tita tsî ǀoro khoeron tita ǀkha, tsî ta ge khoe-i xare-e ǂanǂan tama, Elob ge ti ǂgaob ǃnâ mā xū-i Jerusalemsa ta dī-ū ǁkhā-e, tsî ǀnî ǃgaru-i ge tita ǀkha ge hâ tama hâ i, ǁîb ai ta ra ǃgapib ǀguib.

¹³Tsî ta ge tsuxuba ǃGoaǃnābǁāba-ū ǂoa tsî ǀAobǀausa ǃoa tsî ǂHauǁāb ǃoa ge ī, tsî ta ge Jerusalems di ǂnubiǂgoagu hîa ǂkhū hâga ge ôaǃnâ tsî ǁāgu, ǀaes ǀkha khauǃkhūhe hâga.

¹⁴Tsî ta ge aiǃâb ǃoa ge ī ǁāb ǀaus dib ǃoa tsî gao-aob di îǁgammi ǃoa; tsî ǁnāpa i ge dao-e ǃgapixū-e hâba tama ge hâ i, ǃgû-ū te i nîse.

¹⁵ǃNubai ta ge tsuxuba ǃāroba-ū ge ǃgûǃapa, tsî ta ge ǂnubiǂgoaba ge ôaǃnâ, tsî ta ge ǁkhawa oa tsî ǃgoaǃnāb di ǁāba-ū ge ǂgâ; ǁnāti ta ge ǁkhawa ge oa.

¹⁶Tsî ǂamkhoegu ge mâǀî ta go ī tsî tare-e ta go dī ǃkhaisa ǀū ge i, nēsis kōse ta ge Jodeǁîn tsî pristergu tsî ǀgapiǃgôasagu tsî ǂamkhoegu tsî naugu sîsenna ra dīgu tsîga xū-i xare-e ǂanǂan tama i xui-ao.

¹⁷ǃNubai ta ge ǁîgu ǃoa ge mî: Sago ge ǀkhomǀkhomsasib, ǁîb ǃnâ da hâba ra mû, Jerusalems a ǃū-aisa tsî ǁîs di ǁāgu ǀaes ǀkha khauǃkhūhe hâ ǃkhaisa. Hā, î da Jerusalems di ǂnubiǂgoaba ǂnubikhâi, î da ǃaruǀî tā ǃharaxūxūse ī.

¹⁸O ta ge ǁîna ǃommi ti Elob dib, ti ǂama ge ǃgâi iba ge ǂanǂan tsî ǁkhāti ǁnā mîdi gao-aob didi, ǁîb ge tita ǃhoa-ūde. On ge: Khâi î da ǂnubi! ti ge mî. Tsîn ge ǃomgu âna ǃgâibǀî ge ǀgaiǀgai.

¹⁹Tsî Sanbalati, Horonǁîb, tsî Tobiab, Amonǁî ǃgāb, tsî Gesemmi, Arabiaǁîb tsîgu ge ǁnâuo, o gu ge ǃhō tsî ge ǃharaxū da, tsî gu ge ge mî: Tarebe xū-e kha nē-e, sadu ra dī-e? Gao-aoba du ra mâǃoa?

²⁰O ta ge tita ǁîga ǃeream tsî ǁîgu ǃoa ge mî: Elob ǀhommi dib, ǁnāb ge nîra ǃgâiǃgâ kai da, tsî sida, ǁîb di ǃgāda ge khâi tsî nî ǂnubi, xawe sago ge Jerusalems ǃnâ amǃnâ-i xare-i tsî ǂhanu-aisi-i xare-i tsî ǂâiǂâisenai-i xare-e ūhâ tama hâ.