Read Khoekhoegowab Nehemiab 3 Bible Online

Nehemiab 3 - Khoekhoegowab bible

Nehemiab 3

¹Tsî Eljasib, ǀgapipristeri ge ǃgâsagu âb pristergu ǀkha khâi tsî Gūǁāba ge ǂnubi. ǁÎba khai tsî gu ge dao-amra âba ge ǃamǂgā, ā, ǂgō-ommi Meab kōse, ǂgō-ommi Hananeli kōse gu ge ǁîba ge khai.

²Tsî ǁîb xōǀkhā gu ge Jerixos di aoga ge ǂnubi, ǁkhātib ge Sakuri, Imrib ôaba ǁîb xōǀkhā ge ǂnubi.

³ǁAuǁāban ge Senaab ôana ge ǂnubi, ǁîn ge ǁîba ǃgū-ai tsî dao-amra âba ge ǃamǂgā, ǂganamxūdi âb tsî ǁkhaeǀurigu âb ǀkha.

⁴Tsî ǁîgu xōǀkhāb ge Meremoti, Uriab ôab, Hakob ôaba ge dī-unu, tsî ǁîgu xōǀkhāb ge Mesulammi, Berexjab ôab, Mesesabeli ôaba ge dī-unu, tsî ǁîgu xōǀkhāb ge Sadoki, Baanab ôaba ge dī-unu.

⁵ǃAruǀîn ge Tekoaǁîna ǁîgu xōǀkhā ge dī-unu, xawe ǀgapiǃgôasagu ân ge ǃaob âga ǃKhūb di ǃoabasa ūhâba tama ge i.

⁶Tsî ǁāb kaiba kha ge Jojadab, Paseaxi ôab, tsî Mesulammi, Besodjab ôab tsîkha ge dī-unu; ǁîba kha ge ǃgū-ai tsî dao-amra ge ǃamǂgā, ǁîra di ǂganamxūdi tsî ǁîra di ǁkhaeǀurigu ǀkha.

⁷Tsî ǁîkha xōǀkhā kha ge Melatjab, Gibeonǁîb tsî Jadonni, Meronotǁîb tsîkha aogu Gibeons tsî Mispas tsîra digu ǀkha ge dī-unu, ǃhūǃkhōmâi-aob di ǂnû-aiǃnaos kōse, ǃāb nauǃanib ai.

⁸ǁÎb xōǀkhāb ge Usieli, Harhajab ôab, ǃhuniǀuriǂnau-aogu di ǀguiba ge dī-unu, tsî ǁîb xōǀkhāb ge Hananjab, ǂkhauxūhaba-aogu ǀguib di ôaba ge dī-unu, tsî kha ge Jerusalemsa ge ǂnubihui, ǂhaba ǂnubiǂgoab kōse.

⁹Tsî ǁîkha xōǀkhāb ge Refajab, Huri ôab, ǂamsab Jerusalems di ǃkhareǃâs diba ge dī-unu.

¹⁰ǃAruǀîb ge Jedajab, Harumafi ôaba, ǁîb ǃoagu ge dī-unu, tsî ǁîb di ǃommi xōǀkhāb ge Hatub, Hasabnejab ôaba ge dī-unu.

¹¹Tsî nau ǃâsab ge Malkiab, Harimmi ôaba ge dī-unu, tsî Hasub, Pahat-Moab ôab, ǁnās tawa ǁganoms ǂgō-omma.

¹²Tsî ǁîb xōǀkhāb ge Salummi, Haloheb ôab, ǂamsab Jerusalems di nau ǃkhareb diba ge dī-unu, ǁîb tsî ǁîb ôadi tsîna.

¹³ǃGoaǃnāb di ǁāban ge Hanunni tsî Sanoaxs di ǁansabena ge dī-unu, ǁîn ge ǁîba ǂnubi tsî dao-amdi âba ge ǃamǂgā ǂganamxūdi âb tsî ǁkhaeǀurigu âb ǀkha. ǁNās tawa ǀguiǀoadisi ǂhâgu ǂgoab tawa, ǂHaub di ǁāb kōse.

¹⁴Tsî ǂHaub di ǁābab ge Malkiab, Rexab ôab, Bet-Hakerems ǃâs di ǂamsaba ge dī-unu, ǁîb ge ǁîba ǂnubi tsî dao-amra âba ge ǃamǂgā ǂganamxūdi âb tsî ǁkhaeǀurigu âb ǀkha.

¹⁵Tsî ǁāb ǀaus dibab ge Salummi, Kolhoseb ôab, Mispas ǃâs di ǂamsaba ge dī-unu, ǁîb ge ǁîba ǂnubi tsî ge ǃgū-ai ǂganamxūdi âb tsî ǁkhaeǀurigu âb ǀkha, ǁnās tawa ǂgoab îǁgammi Selaxi dib, gao-aob di ǃhanab tawa ǁgoeb, tsî ǁnā ǃapa-ūdadi Davib di ǃāsa xu garu ǁgôa-ūdadi kōse.

¹⁶ǁÎb khaoǃgâb ge Nehemiab, Asbuki ôab, Bet-Surs ǃâs di ǂamsaba ge dī-unu, Davib di ǀhobadi ǃoa-ai tsî dīhe hâ îǁgammi kōse tsî ǁē-aogu di ommi kōse.

¹⁷ǁÎb khaoǃgâ gu ge Leviǁîga ge dī-unu, Rehummi, Banib ôaba, ǁîb xōǀkhāb ge Hasabjab, Keilas ǃkhareb di ǂamsaba, amǃnâs âb ǃnâ ge dī-unu.

¹⁸ǁÎb khaoǃgâ gu ge ǁîgu ǃgâsaga ge dī-unu, Bivaib, Henadadi ôab, nau ǃâs Keilas ǃkhareb dis di ǂamsaba.

¹⁹ǁÎb xōǀkhāb ge Eseri, Jesuab ôab, Mispas di ǂamsaba ǀnî ǃâsa ge dī-unu, ǀāxūn ommi ǃoa garu daob ǃoa-ai ǁhôas tawa.

²⁰ǁÎ xōǀkhāb ge Baruxi, Sabaib ôaba ǀnî ǃâsa ǀaexase ge dī-unu, ǁhôasa xu Eljasib, ǀgapipristeri ommi di dao-ams kōse.

²¹ǁÎb khaoǃgâb ge Meremoti, Uriab ôab, Hakob ôaba ǀnî ǃâsa ge dī-unu, Eljasib ommi di dao-amsa xu Eljasib ommi di ǀams kōse.

²²Tsî ǁîb khaoǃgâ gu ge pristergu, ǂgādi ai ǁan hâga ge dī-unu.

²³ǁNās khaoǃgâ kha ge Benjaminni tsî Hasub tsîkha ǁîkha di ommi ǃoa-ai ge dī-unu, ǁîb khaoǃgâb ge Asariab, Maasejab ôab, Ananjab ôaba, ommi âb tawa ge dī-unu.

²⁴ǁÎb khaoǃgâb ge Binuib, Henadadi ôaba ǀnî ǃâsa ge dī-unu, Asariab omma xu ǁhôas kōse tsî ǀams kōse.

²⁵Palali, Usaib ôab, ǁhôas ǃoa-ai tsî ǀgapi ǂgō-ommi, gao-aob di omma xu ra ǂoas, ǃkhō-oms di ai-ommi tawa hâs kōse, ǁîb khaoǃgâ Pedajab, Parob ôab,

²⁶tsî tempelǃgāgu ge Ofels ǃnâ ge ǁan, ǁGammi ǁĀb ǃoa-ai, aiǂoasǀîb ra ǂgō-omma ǀkhīs kōse.

²⁷ǁNās khaoǃgân ge Tekoaǁîna ǀnî ǃâsa ge dī-unu ǁnā kai ǂgō-ommi hîa ra ǀkhīb ǃoa-ai tsî Ofels di ǂnubiǂgoab kōse.

²⁸Hān di ǁāba xu gu ge pristerga, mâb hoab âga ǁîb di ommi ǃoagu ge dī-unu.

²⁹ǁNās khaoǃgâb ge Sadoki, Imeri ôaba ǁîb di ommi ǃoa-ai ge dī-unu. Tsî ǁîb khaoǃgâb ge Semajab, Sexanjab ôab, aiǂoas ǁāb di ǃûi-aoba ge dī-unu.

³⁰ǁÎb khaoǃgâ kha ge Hananjab, Selemjab ôab, tsî Hanunni, Salafi ôab ǃnaniǁîb, tsîkha ǀnî ǃâsa ge dī-unu. ǁÎb khaoǃgâb ge Mesulammi, Berexjab ôaba ǃnā-oms âb ǃoagu ge dī-unu.

³¹ǁÎb khaoǃgâb ge Malkiab, ǃhuniǀurikuru-aob ôaba tempelǃgāgu tsî ǁama-aogu di ommi ǃoa-ais kōse ge dī-unu, Mifkab di ǁāb ǃoa-ai tsî ǀams di ǀgapise hâ ǃnā-oms kōse;

³²tsî ǀgapise hâ ǃnā-omsa xu Gūǁāb kōse gu ge ǃhuniǀurikuru-aogu tsî ǃgâihamxūn di ǁama-aogu tsîga ge dī-unu.

³³Tsî Sanbalati ge ǁnâuo, ǂnubiǂgoaba da ra ǂnubi ǃkhaisa, ob ge ǁaixa tsî kaise ge ǁgôa, tsîb ge Jodeǁîna ge ǃhō.

³⁴Tsîb ge ǁîb ǃgâsagu tsî Samariab di ǂnubis aiǃâ ge mî: Tare-en ra dī nē ǁkhoatsama Jodeǁîna? Mā-amhen nî ǁîna? ǁGuiban nî? ǀGui tsēs ain nî dītoa? ǀUiden tsara kai hâ ǂgoaba xu nî ûi-ûi khauǃkhūhedi hâ xawe?

³⁵Tsî Tobiab, Amonǁîb ge ǁîb ǀkha ge hâ i, tsî ge mî: Tsî ǂnubin ra xawe, ǀgiri-i ga ǀkhīo, ob ga ǀuiǂnubiǂgoab âna khôaǂkhū.

³⁶ǁNâu re, sida di Elotse, matikōse da ǃharaxūhe hâ ǃkhaisa, îts ǃharaxūb âna ǁîn di danas ai mādawa, îts ǁîna ǁkhâuǁnâxūse ǃkhōsis di ǃhū-i ǃnâ māǁnâ.

³⁷Îts dīsās âna tā ǃgū-ai, îb ǁoreb âna tā ais âts aiǃâba xu ǀarihe, satsan ge ǂoeǂoe xuige, ǂnubi-aona ra mâǃoase.

³⁸Xawe sida ge ǂnubiǂgoaba ge ǂnubi, ǂnubiǂgoab ge ǃkhareb âb ǁgā ǃgaeǁaehes kōse, ǂgaob ǁaes dib ge sîsenxa i xui-ao.