Read Khoekhoegowab Nehemiab 4 Bible Online

Nehemiab 4 - Khoekhoegowab bible

Nehemiab 4

¹Tsî i ge ge ī, Sanbalati, Tobiab, Arabiaǁîn, Amonǁîn tsî Asdodǁîn tsîn ge ǁnâuo, Jerusalems ǂnubiǂgoagu di dī-unus ra ǃgûa-am tsî ǂapaǃkhaidi ra ǂganamhe ǃkhaisa, on ge kaise ge ǁaixa,

²tsîn ge hoatsama ge ǃgaeǁaesen, hā tsîn nî Jerusalemsa ǃkhamūse, tsî ǂkhupi-en nî ǁîs ǃnâ hā kaise.

³Xawe sida ge sida di Elob ǃoa ǀgore, tsî ǃûi-aoga ǁîn ǃoagu ge ǂnûi, tsēa tsî tsuxuba ǁîn ǃaroma.

⁴ǁGoasib ge Judaba ge mî: ǀGaib tani-aogu dib ge go ǂkhabu, tsî tsarab ge a kai, ǂnubiǂgoab tawa da ǂnubi ǁkhā tides kōse.

⁵On ge mâǃoasaben âda ge mî: ǁÎn ge nî ǀū tsî tātsē mû tide ǁîn ǁaegu sī tsî da ǁîna sī nî ǃgams kōse, nēti da sîsenna nî mâ kai.

⁶Tsî i ge ge ī, ǁnā Jodeǁîn, ǁîn tawa ǁan hân ge hāo, disi nî ī ǃnādi kōsen ǁî ǃkhaisa ge mîba da ǃkhaisa, ǁnā ǃkhaidi, ǁîde xun ge sida ǃoa oadi hoadi xa.

⁷ǁNā-amaga ta ge khoena ge ǂnûi ǂnubiǂgoab ǃgâb ai ǃnaga hâ ǃkhaidi tsî ǀgapigu ai, tsî ta ge ǁaesa ge ǂnûi ǃhaodi ǃoa ǁîn di gôagu ǀkha, ǁîn di ǁhâigôagu tsî ǁîn di khādi tsîn ǀkha.

⁸O ta ge kō tsî khâi tsî ǀgapiǃgôasagu tsî ǂamkhoegu tsî nau ǁaes tsîn ǃoa ge mî: ǁÎna tā ǃao, î du ǂâi ǁnā kai tsî ǃaoǃaosa ǃKhūb xa, î du sadu ǃgâsagu tsî sadu ôagu tsî sadu ôadi tsî sadu taradi tsî sadu omgu din tsîna ǃkhamba.

⁹ǁNās khaoǃgâ i ge ge ī, sida khākhoen ge ǁnâuo, hōhōhe da ge tsî Elob ge ǀapes âna dīǁauǁau ǃkhaisa, o da ge hoatsama ǂnubiǂgoab ǃoa ge oa, mâb hoaba ǁîb di sîsenni ǃoa.

¹⁰Tsî i ge ǁnā tsēsa xu ge ī, ǃkhareb ti ǃgāgu dib ge sîsenni ǃnâ a dīxūxa ǃkhaisa, tsî nau ǃkhareb ge ǁhâigôagu tsî khōsikhōgu tsî khādi tsî ǁâtanin tsîna ǃkhō ǃkhaisa, tsî ǂamsagu ge Judab ommi hoaragab khaoǃgâ ge hâ.

¹¹ǂNubiǂgoaba ra ǂnubigu tsî ǃgomma ra tanigu tsî ǁnāgu hîa ra ǃnaogu xab ge mâb hoaba ǀgui ǃommi ǀkha sîsenna dī tsî naub ǀkha ǁhâigôaba gere ǃkhō.

¹²Tsî ǂnubi ra gu xab ge mâb hoaba gôab âba ǁîb di kamanab ai ǃgae tsî ge ǂnubi tsî ǀgapadasa ra xâib ge tita ǀkha ge hâ i.

¹³O ta ge ǀgapiǃgôasagu tsî ǂamkhoegu tsî nau ǁaes tsîn ǃoa ge mî: Sîsenni ge a kai tsî a hara, tsî sida ge ǂnubiǂgoab ai ǀgaru hâ, nēb nauba xu ǃnūse.

¹⁴ǁNā ǃkhais ǁîsǀî go ǀgapadas di ǀōba nî ǁnâus hoas, ǁnāǀî go sige ǀkha ǀhû. Sada di Elob sada nî ǃkhamba xuige!

¹⁵Nēti ge ge sige sîsenna gere dī, tsî ǃkhareb âgu ge ǁhâigôaga gere ǃkhō ǁgoaǂnobosa xu ǀgamirodi ge ǁhais kōse.

¹⁶Tsî ta ge ǁkhāti ǁnā ǁaeb ǁkhāb ai ǁaes ǃoa ge mî: Ab mâb hoaba ǃgāb âb ǀkha Jerusalems ǃnâ hâǁgoa, î gu tsuxuba ǃûi-aose ība da, î gu tsēa sîsenna dī.

¹⁷O ge ge tita tsî ti ǃgâsagu tsî ti ǃgāgu tsî ǃûis di aogu ti ǃgâb ai hâgu tsîge sige di sarana ǂgaeǂui tama ge hâ i, mâb hoab âge ge ǁhâigôab âb tsî ǁgam-i âba ge ūhâ i.