Read Khoekhoegowab Nehemiab 5 Bible Online

Nehemiab 5 - Khoekhoegowab bible

Nehemiab 5

¹Xawe ǂgais ǁaes dis tsî ǁîn taradi dis ge kai ge i ǁîn ǃgâsagu Jodeǁîguǀî.

²ǀNîn ge hâ, mî rana: Sida ôagu tsî sida ôadi tsîda ge a ǂgui; ǁnā-amaga a da ǃhoroba ūbasen, î da ǂû tsî ûi.

³Tsî ǀnîn ge ǁkhāti hâ, mî rana: A da sida ǃhanagu tsî sida ǂauxûiǂûǃhanagu tsî sida omdi tsîna māxū, î da nē ǃâtsūǀkhāb ǃnâ ǃhoroba ǁama ǁkhā.

⁴ǁNās ǁkhās xasen ge ǀnîna hâ, mî rana: A da mariba ǀkhupi gao-aob ǁguibas ǃaroma sida ǃhanagu tsî sida ǂauxûiǂûǃhanagu ama.

⁵Tsî ǁgans sida dis kom sida ǃgâsagu di ǁgans khami īo, sida ôan kom ǁîgu ôan khami io, tsî mû, sida ôagu tsî sida ôadi tsîna ra ǃgā kai, ā, ǀnîdi sida ôadi didi ge ǀnai ge ǃgā kai, o di ge sida ǃomǁae hâ tama hâ, tsî nau khoen ge sida ǃhanagu tsî sida ǂauxûiǂûǃhanagu tsîna ūhâ.

⁶Tsî ǁîn di ǂgais tsî nē mîde ta ge ǁnâuo, o ta ge kaise ge ǁaixa.

⁷Tsî ti ǂgaob ge ti ǃnâ ge ǀapeǀape, o ta ge ǀgapiǃgôasagu tsî ǂamkhoegu ǀkha ǂnoagu tsî ǁîgu ǃoa ge mî: Sago ge ǃgom ǃkhaisa ra ǂgaoǀkhā mâb hoaba ǃgâsab âb tawa. ǃAruǀî ta ge kai ǀapeǀhao-e ǁîgu ǃoagu ge ǀapeǁgui.

⁸Tsî ta ge ǁîgu ǃoa ge mî: Sida ge sida ǃgâsan, Jodeǁîn, ǀūben tawa ge ǁamaxūhe hâ ina, ǁkhā da ge is kōse ge ǁamaǂui, tsî sago kha ǁamaxū go nî sago di ǃgâsana? Sida tawan kha nî ǁamaxūhe? O gu ge ǃnō tsî ǃeream-i xare-e hō tama ge i.

⁹O ta ge tita ge mî: Nē ǃkhais, sago ra dīs ge ǃgâi tama hâ, sago kha ǃaoǃgâb sada Elob dib ǃnâ ǃgû go tide, ǁnā ǃharaxūb ǀūben, sada di khākhoen dib ǃaroma?

¹⁰Tita tsî ti ǃgâsagu tsî ti ǃgāgu tsîge ǂgaoǀkhā ge ra marib tsî ǃhorob tsîkha ǁîna? Î ge ǁnâi nē ǃgom ǃkhaisa ǁîna ǀûba!

¹¹Î go ǁnâi nētsē ǁîna ǃhanagu ân tsî ǂauxûiǂûǃhanagu ân tsî ǀkheraǃhanagu ân tsî omdi âna mādawa, tsî kaidisiǁî ǃâs marib dis tsî ǃhorob dis tsî ǂkhonxûib dis tsî olib dis, ǁîna go ge ǂgaoǀkhāsa.

¹²ǃNubai gu ge ge mî: Mādawa ge nî, tsî ge ge ǁîn tawa ǀnî xū-e ôa tide. Sige ge sats ra mîse nî dī. O ta ge pristerga ǂgai tsî ǁîga ge nū kai, nē mîs ǃoa gu nî dī ǃkhaisa.

¹³ǁKhāti ta ge ti ǃâǃnâba ǃhaebeǁnâ tsî ge mî: ǁNāti ab Eloba ǁnā aob, nē mîsa ga ǀgaiǀgai tama ib hoaba ǁîb di ommi tsî ǁîb di xūreba xu ǃhaebeǁnâ, îb ǁnāti ǃhaebeǂuiǃnâhe îb ǀkhaiǃnâ! Ob ge ǀhaohâb hoaba: Amen! ti mî tsî ǃKhūba ge kare. Os ge ǁaesa nē mîs ǃoa ge dī.

¹⁴Tsî ta ge ǁkhāti ǁnā tsēs, ǁîs aib ge tita Judaǃhūb ǃnâ ta nî ǃhūǃkhōmâi-ao ǃkhaisa mîmāsa xu, gao-aob Artasastab di ǀgamdisiǁî kuriba xu ǃnonadisiǀgamǀaǁî kurib âb kōse, ǁnās ge disiǀgamǀa kurigu kōse ta ge ti ǃgâsagu ǀkha ǃhūǃkhōmâi-aob di pereba ge ǂû tama hâ i.

¹⁵Tsî aibekam ǃhūǃkhōmâi-aogu ti aiǃâ ge hâ igu ge ǁaesa ge ǃgomdā tsî ǁîn xa pereb tsî ǂauxûib tsîkha ge ū tsî ǁnās khaoǃgâ hakadisi ǀhaiǀurimarin ona. ǁKhāti gu ge ǁîgu di ǃgāga ǁaesa ge gaoǂam, xawe tita ge ǁnāti ge dī tama i eloǃaoǃgâsib ǃaroma.

¹⁶ǁNās tawa ta ge ǁkhāti sîsenni nē ǂnubiǂgoab dib tawa ge sîsenhui, tsî ge ge ǁkhāti ǃhū-i xare-e ǁamabasen tama. Tsî ti ǃgāgu hoagu ge ǁnāpa sîsenni tawa ge ǀhû hâ i.

¹⁷Tsî ǁkhāti Jodeǁîn tsî ǂamkhoegu tsîn xa gu ge ǀguikaidisi tsî korodisi khoegu ǁnā ǀūben sida ǂnamipe hâna xu sida ǃoa ge hāga ti tāb tawa ge hâ i.

¹⁸Tsî tsēkorobe ta gere ǁāǁābahe xūn ge ǀgui gomab tsî ǃnani ǃkhōǂuisa gūn tsîna ge i; ǁkhāti ta ge anin xa gere ǁāǁābahe tsî disi tsēdi ǃnâ mâ ǂauxûi-i hoa-i xa kaise ǃnāsase, tsî ti i ī xawe ta ge ǃhūǃkhōmâi-aob di pereba ǂgao tama ge i, sîsenni xas ge nē ǁaesa ǃgomdāhe xui-ao.

¹⁹Tita ǃgâibǀî ǂâiba re, ti Elotse, nē ǁaesa ta ge dī-ūn hoan xa.