Read Khoekhoegowab Nehemiab 6 Bible Online

Nehemiab 6 - Khoekhoegowab bible

Nehemiab 6

¹Tsî i ge ǃaruǀî ge ī, Sanbalati tsî Tobiab tsî Gesemmi Arabiaǁîb tsî nau khākhoen sida din ge ǁnâuo, ǂnubiǂgoaba da ge ǂnubi tsî ǂapa-i xare-i ǁîb ǃnâ ǃgauhe tama ǃkhaisa, xawe ta ge ǁnā ǁaeb kōse dao-amde ǁāgu ǃnâ ǃamǂgā tama ge hâ i,

²o kha ge Sanbalati tsî Gesemmi tsîkha tita ǁga sî tsî: Hā î ge ǃhaidi, ǃgoaǃnāb Onob didi ǃnâ ǀhû, ti ge mî. Xawe kha ge ǁîkha tsūdī-ū te ǂgao ge hâ i;

³o ta ge sîsabega ǁîkha ǃoa ge sî, mî gu nîga: Tita ge kai sîsen-e ra dī, o ta ge a ǁgôa ǁoa. Tare xū-i ǃaromab kha nē sîsenna nî mâ, ǁîba ǁnāxū tsî ta ga sakho tawa ǁgôao?

⁴Xawe kha ge haka ǃnādi kōse ǁkhā dommi ai tita ǃoa ge sî. O ta ge tita ǁkhā dommi ai ǁîkha ge ǃeream.

⁵ǁGoasib ge Sanbalata ǁkhā dommi ai tita ǁga koroǁî ǃnās ai ǃgāb âb, khowa-aisa ǂkhani-e ǁîb ǃomǁae ūhâba ge sî.

⁶ǁÎs ǃnân ge nēna ge xoahe hâ i: ǁAedi ǃnâ i ge a ǂansa tsî Gesemmi ra mî: Sats tsî Jodeǁîn tsîdu ge ǁnāǁgôas xa ra ǂâiǂâisen, ǁnā-amaga du ge ǂnubiǂgoaba ra ǂnubi, tsî sats ge ǁîna xūn ī khami gao-aose nî ība.

⁷Tsîts ge ǁkhāti kēbo-aoga ge ǂnûibasen, sats xa gu Jerusalems ǃnâ ǂgai tsî: ǁÎb ge Judab ǃnâ a gao-ao, ti nî mîga. Tsî i ge ǁî-e gao-aob xa nî ǁnâuhe, nē ǃkhaidi khami; hā î ge ǁnâi ǀapeǀhao.

⁸O ta ge ǁîb ǁga sî tsî ge mîba kai bi: ǁNā ǃkhaidi, sats ra mî mîdi xas ge ǀguis xaresa ī tama hâ; sats ra ǁîde ǂgaob âtsa xu ǂhumi xui-ao.

⁹Hoatsaman ge sidan nî ǃaoǃao ǃkhaisa ge ôa-am xui-ao, mî rase: ǃOmgu ân kom nî sîsenǀûo, ob ge dīhe tide. Îts ǁnâi ti ǃomkha ǀgaiǀgai.

¹⁰Tsî Semajab, Delajab ôab, Mehetabeli (hîa ǂganamsen hâb) ôab di ommi ǃnâ ta ge sīo, ob ge ǁîba ge mî: A da ǀhû Elob ommi ǃnâ, tempeli ǁaegub ǃnâ, î da tempeli daode ǂganam, satsan nî ǃgamsen ge nîra hā xuige, ā, tsuxub ǃnân ge nîra hā ǃgam tsin nîga.

¹¹Xawe ta ge tita ge mî: Tita khami ī aoba kha nî ǁhai? Tsî tariba ǁnāb tita khami īb, tempeli ǃnâ ǂgâ tsî nî ûitsamase hâba? Tita ge ǂgâ tide ta.

¹²Tita ge hōǃâ xui-ao, Elob sî bi tama ǃkhaisa; nē kēbosisab ge ti ǂama ge ǃhoa, Tobiab tsî Sanbalati tsîkha ge ǁîba ǃgae amaga.

¹³ǁÎ ǃkhais ǃaromab ge ge ǃgaehe, ǃao tsî ta nî ǁnāti dī tsî ǁorese, ǂkhaba ǀons di xū-e kha nî ūhâga, î kha tita ǃhō.

¹⁴ǂÂi re, ti Elotse, Tobiab tsî Sanbalati tsîkha xa nē sîsengu âkha xa; tsî ǁkhāti kēbo-aos Noadjas xa tsî nau kēbo-aogu ǃaoǃao te gu nîsa ge ôa-amgu xa.

¹⁵Tsî ǂnubiǂgoab ge ge dītoahe ǀgamdisikoroǀaǁî tsēs Elulǁkhâb dis ai, korodisiǀgamǀa tsēdi ǃnâ.

¹⁶Tsî i ge ge ī, sida khākhoen hoan ge ǁnâuo, on ge ǀūben, sida ǂnamipe hân hoana ǃao tsî kaise ge ǂkhari ǁîn di mûǁae, ǁîn ge sîsenni Elob âda xa dīhe hâ ǃkhaisa mûǂan xui-ao.

¹⁷ǁKhāti gu ge Judab di ǀgapiǃgôasaga ǁnā tsēdi ǃnâ ǂgui ǂkhanide gere xoa, Tobiab ǃoa ge sīde, tsî Tobiaba xu ge ǀkhīdi ge ǁîgu tawa ge hā.

¹⁸ǂGuigu Judab digu ge ǁîba nūhoresase ge ība xui-ao, Sexanjab, Araxi ôab di ǀuiǀgôab a amaga tsî ǁîb ôab Johananni ge Mesulammi, Berexjab ôab di ôasa ū amaga.

¹⁹Tsîn ge ǁkhāti ǃgâidīgu âba ti ais aiǃâ ge ǃhoa, tsîn ge ti mîde ǁîba ge ūsība. Ob ge Tobiaba ǃaoǃao teb nîga ǂkhanide ge sî.