Read Khoekhoegowab Nehemiab 8 Bible Online

Nehemiab 8 - Khoekhoegowab bible

Nehemiab 8

¹Tsî hûǁî ǁkhâb ge hā tsî Israeli ôan ge ǃādi ân ǃnâ hâ i ǃnubais ge ǁaes hoasa ǀguiǂâixase ǁGammi ǁĀb di daob ai ǀhû, tsî Esrab, xoaǂansabeba ge mîba, îb ǂkhanis Moseb di ǂhanub, ǃKhūb ge Israela mîmāb disa ūhā.

²Ob ge Esrab, pristera, ǂhanuba ǀhaohâb hoab di aogu tsî taradi tsî ǃgâsa ǁnâuǃāxaban hoan aiǃâ ge ūhā, ǂguro tsēs hûǁî ǁkhâb dis ai.

³Tsîb ge ǁîb ǃnâ ǁnā daob, ǁGammi ǁĀb aiǃâ hâb ai ge khomai, ǁgoas ra ǃnâsa xu tsēǃgâǁaeb kōse, aogu tsî taradi tsî ǁnâuǃāxan tsîn aiǃâ, o di ge ǂgaedi ǁaes hoas dide ǂhanub di ǂkhanisǀî ge hâ i.

⁴Tsî Esrab, xoaǂansabeb ge ǀgapi haiǃkhai-i, ǁî ǃkhais ǃaroman ge dī-i ai ge mâ i, tsî ǁîb xōǀkhā gu ge Matitjab, Semab, Anajab, Uriab, Hilkiab tsî Maasejab tsîga ge mâ i amǀkhāb âb ai, tsî ǁareǀkhāb âb ai Pedajab, Misaeli, Malkiab, Hasummi, Hasbanadab, Saxariab tsî Mesulammi tsîga.

⁵Ob ge Esraba ǂkhanisa ǁaes hoas mûǁae ge khowa, ǁaes hoas xab ge ǀgapi ǃkhaib ai mâ i xui-ao, tsî khowa sib geo, os ge ǁaes hoasa ge mâ.

⁶Tsî Esrab ge ǃKhūb, kai Eloba ge koa, tsî ǁaes hoas ge Amen! Amen! ti ge ǃeream, ǃomgu âna ra ǀhōǃapase, tsîn ge ǃhonǁgoa tsî ǃKhūba ge ǀgoreǀî, aidi ân ǀkha ǃhūb ai ǁgoese.

⁷Tsî Jesuab, Banib, Serebjab, Jaminni, Akub, Sabetaib, Hodiab, Maasejab, Kelitab, Asariab, Josabadi, Hananni, Pelajab tsî Leviǁîgu tsîgu ge ǁaesa ǂhanuba gere ǁgau. Tsî ǁaes ge ǁîn di ǃkhais ai ge mâ i.

⁸Tsî gu ge ǂkhanis ǃnâ ǃgāsase ge khomai Elob di ǂhanub ǃnâ, tsî gu ge ǂâibasens, khomai gu ra ǃkhais disa ǁguiǃā tsî ge dī, khomai gu ra hîas ra ǁnâuǃāhese.

⁹Tsî Nehemiab, ǁnāb ge ǃhūǃkhōmâi-aoba, tsî Esrab, pristeri, xoaǂansabeb, tsî Leviǁîgu ǁaesa ra ǁgaugu tsîgu ge ǁaes hoas ǃoa ge mî: Nē tsēs ge ǃKhūb, sadu di Eloba a ǃanuba, tā ǃoa, î du tā ā. ǁAes hoas ge ā mîdi ǂhanub diden ge ǁnâu ǃnubai amaga.

¹⁰ǃAruǀîb ge ǁîn ǃoa ge mî: ǃGû î du kausa ǂû-e ǂû î du ǂkhon ā-e ā, î du ǁnān xū-i xare-e ǁāǁābahe tama hâna amǃnâde sîba, nē tsēs ge ǃKhūb sadu Eloba a ǃanuba xuige, î du ǁnâi tā ǃoa. ǃGâiaǂgaob ǃKhūb ǃnâ du ūhâb ge a sadu di ǀgai xuige.

¹¹Tsî Leviǁîgu ge ǁaes hoasa ǃnōǃnō tsî ge mî: ǃNō, nē tsēs ge a ǃanu xuige, ǁnā-amaga tā ǃoa.

¹²ǃNubais ge ǁaes hoasa ge ǃgû, ǂû tsîn nî āse, tsî amǃnâden nî sîse tsî kai ǃgâiaǂgaoban nî dīse, ǁnā mîdi hîan ge ǂanǂanheden ge ǁnâuǃā xui-ao.

¹³Tsî sao ra tsē gu ge ǁgûgu ǁaes hoas digu di danagu tsî pristergu tsî Leviǁîgu tsîga Esrab, xoaǂansabeb tawa ge ǀhû, mîdi ǂhanub dide gu nî ǁnâuǃā kaihese.

¹⁴Tsî gu ge ǂhanub ǃnâ xoahe hâ ǃkhaisa ge hō, ǃKhūb ge Moseb ǃomǁaeba xu mîmāsa, Israeli ôan ǁhaogu ǃnâ nî ǁan, ti kaitsēs ai hûǁî ǁkhâb ǃnâ,

¹⁵tsî ǁî ǃkhaisan nî ǂanǂan ǁîn di ǃādi hoadi ǃnâ tsî Jerusalems tawan nî ǂgaiǂui kaisa, mî rase: ǃGûǂoa ǃhommi ai î du ū ǁnâugu ǀkherahaidi diga tsî ǁnâugu nau ǀkherahaiǃnôadi diga tsî ǁnâugu mirdehaidi diga tsî ǁnâugu palmhaidi diga tsî ǁnâugu nau ǁau haiǃnôadi diga, ǁhaoga du nî dīse, xoahe hâse.

¹⁶Nētis ge ǁaesa ǂoa tsî ǁîga ūhā tsî ǁhaoga ge kurubasen, mâ-i hoa-e ǁî-i di oms ǂamais ai tsî ǁîn di ai-omgu ǃnâ tsî Elob ommi di ai-omgu ǃnâ tsî ǁGammi ǁĀb di daob ai tsî Efraimmi ǁĀb di daob ai.

¹⁷Tsî ǀhaohâb ǁnān ǃkhōsisa xu ge ǁkhawa hān dib hoab ge ǁhaoga ge kurubasen tsî ǁhaogu ǃnâ ge ǁan, Israeli ôan ge ǁnāti dī tama ge hâ i Jesuab, Nunni ôab di tsēde xu nē tsēs kōse xui-ao, tsî i ge kaise kai ǃgâiaǂgao-e ge hâ i.

¹⁸Tsîn ge ǂhanub di ǂkhanis Elob dis ǃnâ tsēsa xu tsēs ǁga gere khomai, ǂguro tsēsa xu ǀuni tsēs kōse. Tsîn ge kaitsēsa hû tsēdi kōse ge tsēdī tsî ǁkhaisaǁî tsēsa ǃkhâihe hâ tsēse ǂhanub ǃoa.