Read Khoekhoegowab Nehemiab 9 Bible Online

Nehemiab 9 - Khoekhoegowab bible

Nehemiab 9

¹ǃAruǀîn ge Israeli ôana ǀgamdisihakaǀaǁî tsēs nē ǁkhâb dis ai ge ǀhû, ǂûtamahâ tsî ǁhōga ǂgaeǂgā hâse tsî ǃhūxaǀkhāse.

²Tsî surib Israeli dib ge ǃhaokhoen hoana xu ge ǀgorasen, tsîn ge mâ tsî ǁguiǁnâsa ge dī ǁîn di ǁoren ǃaroma tsî ǁîn di dīsādi ǃaroma.

³ǁÎn di mâǃkhais ain ge khâio, on ge ǂhanub di ǂkhanis ǁîn Elob dis ǃnâ hakaǁî ǃâs tsēs dis kōse ge khomai xui-ao, tsî nau hakaǁî ǃâs ain ge ǁguiǁnâsa dī tsî ǃKhūb, ǁîn di Eloba ge ǀgoreǀî.

⁴Tsî Jesuab, Banib, Kadmieli, Sebanjab, Bunib, Serebjab, Banib tsî Kenanib tsîgu ge ǀgapi ǃkhais Leviǁîgu dis ai mâ tsî ǃgari dommi ǀkha ǃKhūb, ǁîn di Elob ǃoa ge ǂgai.

⁵Tsî Leviǁîgu, Jesuab, Kadmieli, Banib, Hasabnejab, Serebjab, Hodiab, Sebanjab tsî Petaxjab tsîgu ge ge mî: Khâi î du ǃkhōǀkhā ǃKhūb, sadu Eloba, ǀamosib kōse. Îs ǀons sa ǂkhaisib disa koahe, koas tsî kares hoasa ǃnā hâsa.

⁶Sats ǀguits ge a ǁnā ǃKhū, sats ge ǀhommi, ā, hoan xa ǀgapi ǀhomma ge dī tsî ǁîb di ǂnubis hoas, ǃhūbaib tsî ǁîb ai hân hoan, hurigu tsî ǁîgu ǃnâ hân hoana, tsî sats ra ǁîn hoana ûi-ûi, tsî ǂnubis ǀhommi dis ra satsa ǀgoreǀî.

⁷Sats ge ǁnā ǃKhū Elots, Abramma ǃkhōǂuibasen tsî ǁîba Urs Xaldeaǁîn disa xu ge ǂgaeǂguiǂuitsa, tsî sats ge ǀons âba Abraham ti ge ǂnûiǃkhuni.

⁸Tsî sats ge ǂgaob âba sa ais aiǃâ îǂhôase ge hō, tsîts ge ǃgaeǀhao-e ǁîb ǀkha ge dī, ǃhūb Kanaanǁîn, Hetiǁîn, Amorǁîn, Perisiǁîn, Jebusǁîn tsî Girgasiǁîn tsîn dibats nî ǁîba mā ti, ǁîb di suribats nî ǁîba mā ti, tsîts ge mîs âtsa ge ǁapoǁapo ǂhanu-aits a amaga.

⁹Tsîts ge ge ǃgapaǀî sida îgu di ǀkhomǀkhomsasiba Egipteb ǃnâ, tsîts ge ǂgais âna ge ǁnâu ǂĀxahurib tawa.

¹⁰Tsîts ge saodi tsî buruxa dīn tsîna ge dī Faraob tawa tsî ǁîb di ǃgāgu hoagu tawa tsî ǃhūb âb di ǁaes hoas tawa, ǃguriǂgaoxasen ra ǁîna sîsenū ǃkhaisats ge ǂan i xui-ao, tsîts ge ǀonsa ge dībasen, nētsē i īs ǁkhās xase.

¹¹Tsîts ge huriba ais ân aiǃâ ge dīǃā, on ge hurib di ǁaeguba-ū ǂnâsa ǃhūb ai ge ǃgûǃgâu, tsî ǃgôaǃgonaon ânats ge ǃgammi ǃnâ ge aoǂgā, ǀui-i ǀgaisa ǁgamgu ǃnâ ra aoǂgāhes ǁkhās xase.

¹²Tsîts ge ǁîna tsēa ǀnanuǂkhâǃnâ-i ǀkha gere ǂgaeǂgui tsî tsuxuba ǀaeǂkhâǃnâ-i ǀkha ǁnā daob, ǁîba-ūn nî ǃgûbats nî ǁîna ǃnâǃnâbase.

¹³Tsîts ge Sinaiǃhommi ai ǁgôaxa tsî ǁîn ǀkha ǀhomma xu ge ǃhoa, tsîts ge ǁîna ǂhauǃnâ ǂhanugu tsî ǂgomǂgomsa ǂhanugu tsî ǃgâi ǂnûiǂgādi tsî mîmādi tsîna ge mā.

¹⁴Tsîts ge ǁîna sa ǃanu sâtsēsa ge ǂanǂan, tsîts ge ǁîna mîmādi tsî ǂnûiǂgādi tsî ǂhanub tsîna ge mîmā, sa ǃgāb Moseb di ǃomma xu.

¹⁵Tsîts ge ǁîna ǀhomma xu pere-e ge mā ǃâs ân ǃaroma, tsîts ge ǁîna ǃhaoba xu ǁgam-e ge ūǀkhība ǁgâs ân ǃaroma, tsîts ge ǁîn ǃoa ge mî, ǂgâ tsîn nî ǁnā ǃhūba ūsa, ǁîb ǂamats ge ǃommi âtsa ūkhâiba, ǁînats nî ǁîba māse.

¹⁶Xawe ǁîn tsî sida di îgu tsîn ge ǃguriǂgaoxase gere dī, tsîn ge ǃaob âna ge karokaro tsî sa mîmāde ǃgâ ǂgao tama ge i.

¹⁷Tsîn ge ǁnâusa ge ǂkhā tsî sa buruxa dīn ǁîn aiǃâts ge dīn xa ǂâi tama i, tsîn ge ǃaogu âna karokaro tsî mâǃoaxasib ân ǃnâ danakhoeba ge ǂnûibasen, în ǃgāsis ân ǃoa ǁkhawa oa, ti. Xawe sats hîa ǀûbaxa Elots, ǀkhomxa tsî ǀkhomxaǂgaots, ǃnūǃnâxa tsî kaise a ǃgâidīxats ge ǁîna, ti i ī xawe, ǁnāxū tama ge i,

¹⁸tsî ǂnâhe hâ tsâu-en ge dībasen tsî: Nēb ge sadu di Elob, Egipteba xu ge sado ǂgaeǂguiǂuiba, ti mî, tsî kai tsūdīgan ge dī xawe.

¹⁹Xawets ge satsa sa kai ǀkhomxaǂgaosib ǃaroma ǁîna ǁnāxū tama ge i ǃgaroǃhūb ǃnâ. ǀNanus di ǂkhâǃnâb ge tsēa ǁîna xu ǂgō tama ge i, daobab nî ǁîna ǁnaeǁgause, tsî ǀaes di ǂkhâǃnâb tsuxuba, ǁînab nî daoba ǃnâǃnâbase, ǁîba-ūn nî ǃgûba.

²⁰Tsîts ge sa ǃgâi Gagaba ǁîna ge mā, ǁînats nî ǁgauga, tsî manab âtsats ge ǁîn di amsa xu ǂkhā tama ge i, tsîts ge ǁîna ǁgam-e ge mā ǁgâs ân ǃaroma.

²¹Nētits ge satsa ǁîna hakadisi kurigu kōse ge ǃkhōmâi ǃgaroǃhūb ǃnâ, xū-i xare-en ge tôasi tama ge hâ i, ǁîn di saran ge ǀoro tama, tsî ǂaidi ân ge xâi tama ge i.

²²ǃAruǀîts ge ǁîna gaosidi tsî ǁaedi tsîna ge mā tsî ǁîna ǁhôadi ǃnâ ge ǀgora. Nētin ge Sihonni di ǃhūba ǀumise ge ū, ǁnāb ge ǃhūb, Hesbons gao-aob dib tsî Ogi, Basanni gao-aob ǃhūba.

²³Tsîts ge ǁkhāti ǁîn di ôana ǀhommi di ǀgamirodi xase ge ǂguiǂgui, tsîts ge ǁîna ǁnā ǃhūb ǃnâ ge ūsī, ǁîb xats ǁîn di îgu ǃoa ǂgâ, tsîn nî ǁîna ǀumise ūhâ, ti ge mîba.

²⁴Nētin ge ǀgôana ǁîb ǃnâ ǂgâ tsî ǃhūba ǀumise ge ū, tsîts ge ǃhūb di ǁansaben, Kanaanǁîna, ais ân aiǃâ ge dā, tsîts ge ǁîna ǁîn ǃomǁae ge mā ǁîn di gao-aogu tsî ǃhūb di ǁaedi tsîn ǀkha, ǁîn ra ǃgâibahe khamin nî ǁîna dī-ūga.

²⁵On ge ǁaposa ǃādi tsî ǃgâi ǃhū-i tsîna ū tsî ǀumise ge ūhâ, omdi mâ xū-i hoa-i xa ǀoa hâdi tsî ǁhāǂuihe hâ ǂgâdi tsî ǂauxûiǂûǃhanagu tsî ǀkherahaiǃhanagu tsî kaise ǂgui ǃgâiǂûsa haiǃnôan tsîna, on ge ǂû tsî ge ǁâ tsî ge kau tsî sa ǃgâidība xu ǃgâiaǂgaoxase gere ûi.

²⁶Xawen ge mâǃoaxa tsî sa ǃoagu ge khâima, tsîn ge ǂhanub âtsa ǃgâb ân ai ao tsî sa kēbo-aoga ge ǃgam, ǁîn ǃoagu ra ǀhûǀguitimîga, în sa ǃoa oa, ti; nētin ge kai tsūdīga gere dī.

²⁷ǁNā-amagats ge satsa ǁîna ǂōǂō-aon ǃomǁae ge mā, xawe ǂōǂōsib di ǁaeb ain ge sa ǃoa ǂgaio, ots ge ǀhomma xu ǁnâu tsî kai ǀkhomxaǂgaosigu âtsa xu ore-aoga ǁîna ge mā, ǂōǂō-aon ân ǃomǁaeba xu ǁîna ge orega.

²⁸Xawe sân geo, on ge ǁkhawa ǂkhabadīs ǃoa ge oa sa ais aiǃâ, ots ge ǁîna khākhoen ân ǃomǁae ge māǁnâ, în ǁîna gaoǂam, tsî ǃhobasen tsîn ge satsa ǂgaiǀîo, ots ge ǁîna ǀhomma xu ǁnâu tsî ǂgui ǃnāde ǀkhomxaǂgaosigu âtsa xu ge tsubuǂui.

²⁹Tsîts ge ǁîna ge ǃkhō-amba sa ǂhanub ǃoa, în oa xawen ge ǃguriǂgaoxase dī tsî sa mîmāde ǁnâu ǂgao tama ge i, tsîn ge sa ǂhanugu ǃoagu ge ǁore, ǁîgu xats nî sats khoetsa, ǁîgats ga dī ǃnubai, ûiga, tsîn ge ǃhōs âna ge ǂgaedawa tsî ǃaob âna ge karokaro tsî ǁnâu ǂgao tama ge i.

³⁰Xawe sats ge ǂgui kuriga ǁîna ge tani, tsîts ge Gagab âts ǀkha sa kēbo-aogu di ǃoabasa xu ge ǀhûǀguitimîǀî, xawen ge ǁnâuǀnamsa ge ǂkhā, ǁnā-amagats ge ǁîna ǁaedi ǃhūgu didi ǃomǁae ge mā.

³¹Xawe sa kai ǀkhomxaǂgaosiga xus ge ǁînats hîkākā tsî ǁnāxū tamasa, ǀkhomxa tsî ǀkhomxaǃnâ Elots a xui-ao.

³²Tsî nēsi sida di Elots, sats kai tsî ǀgaisa tsî ǃaoǃaosa Elots, ǃgaeǀhaos tsî ǃgâidīb tsîra ra ǃkhōǀgaipetse, ab sa aiǃâ tā ǂkharise ī ǁnā ǀhupub hoab, ǁîb xa da ge hāǂamheba, sida gao-aogu tsî sida gaosagu tsî sida pristergu tsî sida kēbo-aogu tsî sida îgu tsî sa ǁaeda hoada Asiriab gao-aogu di tsēde xu nē tsēs kōse.

³³Xawe sats ge a ǂhanu-ai sida ge hāǂam xūn hoan ǃnâ, îǂhôasets satsa ge dī xui-ao, xawe sida ge eloxoresase ge dī.

³⁴Tsî sida gao-aogu tsî sida gaosagu tsî sida pristergu tsî sida îgu tsîgu ge sa ǂhanuba dī tama ge i, tsî gu ge sa mîmādi tsî sa ǀhûǀguitimîdi, sats ge ǁîga ǃkhō-am kaide ǃgâ tama ge i.

³⁵Satsa gu ge ǃoaba tama i xui-ao sa gaosib ǃnâ tsî ǂguiǃnâgu xūn, ǁînats ge mān ǃnâ, tsî ǁnā hara tsî kausa ǃhūb ǁîn di ais aiǃâts ge ǁîna māb ǃnâ, tsî gu ge ǃhobasen tama ge i ǂkhabadīgu âga xu.

³⁶Mû, sida ge nētsē a ǃgā, ā, ǁnā ǃhūb, sida îgats ge ǁîb di ǂûtanin tsî ǃgâib âba gu nî ǂûga māb ǃnâ da ge a ǃgā.

³⁷Tsî ǁîb di ūǀkhīn ge gao-aogu, sida ǂamats ge mâiga ra ǂgui kaiba sida di ǁoren ǃaroma, tsî gu ge sida sorodi tsî sida ǀgoan tsîna ra gaoǂam ǁîgu ra ǃgâiǂâi khami, nēti da ge kai ǂōǂōsib ǃnâ hâ.

³⁸Tsî nēn hoan ǃnâ da ge ǁaposa ǃgaeǀhao-e dī tsî ǁî-e ra xoa; tsî sida gaosagu tsî Leviǁîgu tsî pristergu tsîgu ge ǁî-e nî ǂganamǀgaiǀgai.