Read Khoekhoegowab Esters 1 Bible Online

Esters 1 - Khoekhoegowab bible

Esters 1

¹Tsî i ge Ahasverob di tsēdi ǃnâ ge ī (ǁîb ge ǁnā Ahasverob, Indiaba xu Etiopiab kōse ǀguikaidisiǀgamdisihûǀa ǃhūǃâde ge gaoǂamma),

²ǁnā tsēdi ǃnâ, gao-aob Ahasverob ge gaosis âb di trons Susas di ǁaposa ǃkhais ai hâs ai ǂnôa i ǃnubai,

³ǃnonaǁî kurib ǁîb gaosis dib ǃnâb ge ǁîb gaosagu tsî ǁîb ǃgāgu hoaga ǂûǁae-e ge dība. ǀGaib Persiab tsî Mediab tsîkha dib ǂgurosa ǃkhūkhoegu tsî ǃhūǃâdi di ǂamsagu tsîgu ge ǁîb di ais aiǃâ ge hâ i.

⁴ǃNubaib ge ǃkhūsib ǂkhaisa gaosis âb dib tsî ǃgomǀgausasib anusa kaisib âb diba ǂgui tsēde ge ǁgauǂui ǀguikaidisi tsî ǁkhaisadisi tsēdi kōse.

⁵Tsî ǁnā tsēdi ge ǀoa ǃnubaib ge gao-aoba hoaraga ǁaes, ǁaposa ǃkhais Susas dis ai ge hōhesa, kaina xu ǂkharin kōse, ǂûǁae-e ge dība ǃhanab gao-aosi î-ommi dib di ai-ommi ǃnâ.

⁶ǁNāpa gu ge ǃuri tsî ǃam tsî ǀhomǂhoa ǂgāǃkhaigu, ǀui line tsî purpur ǃgaexūdi ǀkha ǃgaehe hâgu, ǀhaiǀuriǃganudi ǃnâ hâgu, marmerǂkhâǃnâgu tawa ǂgāhe hâga ge hâ i, ǁgoe-aixūgu ge ǃhuniǀuri tsî ǀhaiǀuri ge i, porfiri tsî marmeri tsî albas tsî ǃgomǀgausa ǀuiǃnôan hoan ai mâga.

⁷Tsîn ge āxūna ǃhuniǀurixapan ǃnâ ge ā, tsî nē xapas ge nausa xu ǀkharase ge ī i, tsî gao-aosi ǂauxûib ge ǀoasase ge hâ i, gao-aob ge ǁkhā is kōse.

⁸Tsî ās ge ǂhanub di dommi ai gere ī, khoe-i xare-i ge ǁgarihe tama ge hâ i, gao-aob ge ǁnāti ǁîb ommi di ǂamkhoegu hoaga mîmā xui-ao, mâb hoaba ab dī ǁîb ra ǂgao khami.

⁹Gao-aos Vastis on ge tarade ǂûǁae-e ge dība gao-aosi ommi, gao-aob Ahasverob dib ǃnâ.

¹⁰Hûǁî tsēs ai, gao-aob di ǂgaob ge ǂauxûib xa a ǃgâiaǂgao ǃnubaib ge Mehumanni, Bisetab, Harbonab, Bigtab, Abagtab, Setari tsî Karkab tsîgu ǁnā hû omǃoabasabegu, gao-aob Ahasverob di ais aiǃâ ra ǃoabagu ǃoa ge mî,

¹¹î gu Vastis, gao-aosa, gao-aob di ais aiǃâ ūhā gao-aosi krons ǀkha, îb ǁaedi tsî gaosabegu tsîna îsasib âsa ǁgau, ama îsa ais â-i ge i taras a xui-ao.

¹²Xawe gao-aos Vastis ge mîs gao-aob dis, omǃoabasabega xus ge mîbahes ai hāsa ge ǂkhā. Ob ge gao-aoba kaise ge ǁaixa, tsî ǁaib âb ge ǁîb ǃnâ ge ǂhubi.

¹³ǃNubaib ge gao-aoba gā-aigu, ǁaega a ǂangu ǃoa ge mî, gao-aob di ǃkhais ge ǁnāti ǁnāgu, ǂhanub tsî ǂhanu-aisigu tsîga a ǂangu hoagu aiǃâ nî dīhe ǃkhaisa a anu xui-ao,

¹⁴tsî ǁîb ǀgūse hâgu ge Karsenab, Setari, Admatab, Tarsib, Mereb, Marsenab tsî Memuxanni tsîga ge i, ǁnā hû gaosagu Persiaǁîn tsî Mediaǁîn digu, gao-aob di aisa ra mûgu tsî gaosis ǃnâ ra aiǂnûga.

¹⁵Tare-es Vastisa ǂhanub ǃoa nî dī-ūhe, mîs gao-aob Ahasverob dis omǃoabasabega xus ge mîbahesas dī tamao?

¹⁶ǃNubaib ge Memuxanna gao-aob tsî gaosagu tsîgu di ais aiǃâ ge mî: Gao-aos Vastis ge gao-aob ǀguib ǃoagu dīsā tama hâ, tsîs ge gaosagu hoagu tsî ǁaedi, gao-aob Ahasverob di ǃhūǃâdi hoadi ǃnâ hâdi ǃoagu ge dīsā.

¹⁷Nē dīs gao-aos dis ge taradi hoadi tawa nî ǂansa xui-ao, o di ge aogu âde nîra ǃharaxū ǁîdi mûǁae, mîn kao: Gao-aob Ahasverob ge as gao-aos Vastisa ais âb aiǃâ ūsīhe, ti ge mî, xawes ge sī tama ge i.

¹⁸ǁNā tsēs ǁkhās ai di ge gaosadi Persiab tsî Mediab tsîkha didi ona ǁnās ǁkhās xase nîra mî, nē dīs gao-aos disa di ga ǁnâuo, o ra ge ǃharaxūs tsî ǁaib tsîra ǂâu hâse nîra hâ.

¹⁹Gao-aots ga ǃgâibaheo, as gao-aosi mîmāsa ǁîtsa xu ǂoa, îs xoahe Persiaǁîn tsî Mediaǁîn tsîn di ǂhanugu ǃnâ, îs tā ǃûǂamhe, Vastis ge gao-aots Ahasverots di ais aiǃâ hā tide ti, îts gao-aotsa gaosis âsa ǁîs di ǀgūkhoes, ǁîs xa a ǃgâisa mā.

²⁰Tsî mîmās gao-aob nî mās ga gaosis âts hoas, ǁîs a kai xui-ao ǁnâuheo, o di ge taradi hoade ǁîdi di aoga ǃgôasiba nîra mā, kaisa xu ǂkharis kōse.

²¹Nē mîs ge gao-aob tsî gaosagu tsîgu mûǁae ǃgâi ge i, tsî gao-aob ge Memuxanni di mîs ǃoa ge dī.

²²Ob ge ǁîba ǂkhanide gao-aob di ǃhūǃâdi hoadi ǃoa ge sî, mâ ǃhūǃâs hoasa ǁîs di xoadommi ai tsî mâ ǁaes hoasa ǁîs di gowab ǂûb ǃnâ, îb mâ aob hoaba ǁîb oms di gaoǂamaose ī, îb ǁaes âb di gowaba ǃhoa.